TAHATAHA BA WANGEHAOGӦ MANGAWULI FA’AURI (Falukhata Si-1 APP 2022)

 A.   OHITÖ DÖDÖ

Ena’ö ngambatö tola :

1.    Aboto ba dӧdӧra dahataha ba wangehaogӧ mangawuli fa’auri.

2.    La’asiwai ngawalӧ dahataha ba wangehaogӧ mangawuli fa’auri.

 

B.   FAMOBÖRÖ

(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre:)

1.    Sinunö Famobörö: Laudate No. 55A.

2.    Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.

“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ba † Tanda Röfa.

 

C.   FAMASAO

 Ira Ama, Ina, ba Talifusӧ ni’omasi’ӧ.

I’otarai dungӧ Korona-19 (covid-19) itӧrӧi zi sagӧrӧ ulidanӧ, farahu gӧi ita ba da’ӧ ba zi sambua Keuskupan Sibolga, ba bӧrӧ da’ӧ lala wa’aurida tewu’a. Ofanӧwa wa’aurida i’olaini ia Goigoi  Famareta sabe’e sibai i’otarai ba zabӧlӧ alawa (pusat) irugi misa ba mbanubanua (daerah). Fa’atewu’a lala wa’aurida andre, alua ia ba zi arakhagӧ fefu ngasi wa’auri, dumadumania: Latenawa ita ba wara’usatanga awӧ wa’owulo sifao niha sato.  Lӧ latehegӧ ba wamaigi niha sofӧkhӧ ba nomo zofӧkhӧ (rumah sakit). Na mofanӧ ba na mangawuli ba nomo si lӧ tola lӧ’ӧ mufake wondruhӧ nikhu faoma bawa (masker). Inӧtӧ wamokai toko, lafo, naha wemanga ba tanӧbӧ’ӧnia na ba tenga simane si to’ӧlӧ. Alua wangalӧsi sohalӧwӧ ba fabiri (perusahaan) bӧrӧ me ambӧ sinӧndra. Fefu ndraono sekola latema wamahaӧ moroi ba nomo sifao fangoguna’ӧ HP (online). Falӧwa ba wangowalu, fangandrӧ saohagӧlӧ ba hegӧi lala wamalua hada tefalua ia fondrege wa lӧ atoto niha (si ӧna’ӧna sibai). Niha samati tebai lafalua wangandrӧ ba Gereja ba ma na’i tebai mufalua walukhata Wangabakha’ӧ Buku Ni’amoni’ӧ. Fefu niha auri ira bakha ba wa’ata’u awӧ ba wa’abasaki ba wangotomosi fa’auri, he noso ba he gӧi boto.

Ira Ama, Ina, ba Talifusӧ ni’omasi’ӧ.

Ya’ita niha samati khӧ Keriso, no tarasoi ba wa’aurida  ambӧtӧra dua fakhe wa’ara ba ginӧtӧ dungӧ korona, lӧ wa i’ohe ita ba wa’aetu wanӧtӧna. Moroi ba da’ӧ, si lӧ tola lӧ’ӧ ta’ehaogӧ mangawuli lala wa’aurida, hewa’ae oya dahataha soya sibai simane si no mudunӧdunӧ nomege. Bӧrӧ da’ӧ Tuho sebua ba Aksi Puasa Pembangunan (APP) dӧfi 2022 andre ya’ia da’ӧ: MANGEHAOGÖ MANGAWULI FA’AURI (Sifasui lӧ wӧkhӧfӧkhӧ, Ngambatӧ Ohauhau dӧdӧ). Tuho andre mufaosatӧ tobali 5 Duho si de’ide ya’iada’ӧ : Falukhta si Sara: TAHATAHA BA WANGEHAOGÖ MANGAWULI FA’AURI. Falukhata si Dua: MANGEHAOGÖ FA’AURI BA GINÖTÖ WÖKHÖ KORONA. Falukhata si Tӧlu: AURI BAKHA BA LALA WA’AURI SI BOHOU. Falukhata si Ӧfa: FOGAONI BA WAMOHOUNI FA’AURI AWÖ NIFALUA BA GINÖTÖ KORONA. Falukhata si Lima: SIFASUI LӦ WӦKHӦFӦKHӦ NGAMBATӦ OHAUHAU DӦDӦ. Data’abakhai’ӧ walukhatasada ba migu si fӧfӧna andre sifao folo’ӧ bosibosi andre:

 

D.  BOSIBOSI WAMALUA FANGABAKHA’Ӧ FAMATI BA APP FAOMA LALA WOMBAGISI BUA ZӦNDRA INJIL SI-7 BOSI

(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).

 

1.   MANGANDRÖ FE’ASO ZO’AYA

·       Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.

 

Damangandrӧ ita:

He Lowalangi Fondrege zi Sӧkhi, ma’andrӧ saohagӧlӧ khӧU bӧrӧ kuaso awӧ we’ebua dӧdӧU bakha ba wa’aurima. Ma’ӧkhӧ andre Ӧ’owuloi ndra’aga ba wamӧrӧgӧ fangabakha’ӧ famati ba Aksi Puasa Pembangunan ba ginӧtӧ Fӧna Paskah 2022 andre. Taromaliu nirongoma dania itutunӧ khӧma sanandrӧsa ba zi no larasoi ira nifahaӧ  si falukha fa’ata’u bӧrӧ me gӧna ira dulu ba angi sabӧlӧ. Ba hiza sa’atӧ tola Ӧfahono nangi ba bade sebua. Bakha ba zalua ba wa’aurima ba ginӧtӧ da’e, marasoi dahataha bӧrӧ dungӧ korona-19, akhari sibai dӧdӧma ba we’asoMö ba wangehaogӧ mangawuli lala wa’aurima tobali abӧlӧ sӧkhi. Ya so Ndra’ugӧ ba torӧi’Ö awӧma iada’a. Fangandrӧma andre mafasao khӧU sifao fama’ema Keriso, So’aya ya’aga, Amen.

 

 

2.   FOMBASO BUKU NI’AMONI’Ö (Luka 8:22-25)

Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.

Ia da’a databaso Mbuku Ni’amoni’ö

·       Mibokai Injil Luka,...

·       Ufuli uwa’ö samuza tö : Injil Luka, faza 8

·       Samuza tö ufuli u’ombakha’ö : Injil Luka, faza 8 ayati 22 irugi ayati 25

·       Sakali tӧ : Injil Luka, faza 8 ayati 22 irugi ayati 25

·       Ube’e ginötö fasamösa moroi ba gotaluada wombaso Injil andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.

·       Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.

 

3.   FANGOMBAKHA’Ö NGAWUA WEHEDE MOROI BA MBUKU NI’AMONI’Ö SADÖNI DÖDÖDA, TEFAUDU BA WA’AURIDA BA TA’ERÖNUSI

·       Ube’e ginӧtӧ khöda gofu haniha manӧ ba gotaluada nitufa Yesu tӧdӧ sifao fanguma’ӧ ngawua wehede ma ngaroto wehede sadogodogo ma zui ayati sadӧni dӧdӧda moroi ba wombaso Mbuku Ni’amoni’ӧ si no mubaso no mege, hulӧ simane ngawua gara sebua bӧli ma manimani si no tobini bakha ba wombaso andrӧ.

·       Tebe’e ginötö ba wamaehagö fehede sadogodogo andrö, 3 kali muwa’ögö, sifao fa’ebua li, mudai’da’i ba bakha ba ginötö wa’ahono ba bakha ba gofanöwa wangandrö tefalua.

·       Sakali tӧ databaso wombaso moroi ba Mbuku Ni’amoni’ӧ andre.

 

4.   TAHAOGÖ DÖDÖDA BA TALULU ZO’AYA FAHUHUO IA KHÖDA BA GINÖTÖ SI LÖ NINININI

·       Datahonogö ita 2 meniti wa’ara, tafaigi hadia ia zi no alua ba wa’aurida, talulu ba tabe’e ginötö  khö Yesu fahuhuo Ia khöda sifao fangerönusi.

·       Hadia tola utema’ӧ ba u’asiwai ngawalӧ dahataha bakha ba wangehaogӧ mangawuli fa’aurima sifao ӧsi nomogu.

 

o   Tola gӧi mufaogӧ faoma sinunӧ ba wa’ahono  (lagu taize). ma Sinunö Laudate No. 18B.

 

5.   TABAGISI KHÖ NAWÖDA, HADIA MANÖ ZI NO TARONGO MOROI KHÖ LOWALANGI WEHEDENIA SI SO BAKHA BA DÖDÖDA

·       No muhede khӧda Yesu ero zamӧsana ba fahuhuo ia khöda moroi ba ngawalӧ wehede si no amaedola manimani sebua böli si tumbu bakha ba dödöda sitobali tandra ba wango’aurifagӧ lala wamatida.

·       Ube’e ginötö khöda ba wamaehagö sanandrösa ba wehede ma ngaroto wehede sadogodogo ma ngawalö ayati sifatöfa khöda samösa moroi ba wombaso Buku Ni’amoni’ö si no tarongo ba ni’erönuisida ba ginötö ia da’e, sitefaudu molo’ö ohitӧ dӧdӧ  ba waosatӧ duho walukhatada ba ginӧtӧ andre. Hana wa fehede andre fatӧfa ba dӧdӧgu...?

·       Tetötöna khöda, ena’ö tenga samalua khotbah ita ma sama’ema famahaö fa’aboto ba dödö ita ba niha bö’ö ma zui fahuohuosa ba nawö; ba hiza’i, tafatunö sanandrösa ba ngawalö zalua nirasoida ba wa’aurida samösa.

 

6.   MAMATUNÖ NGAWALÖ HALÖWÖ SEDÖNA TAFALUA BA NIKAONI LOWALANGI ITA BA WAMALUA YA’IA

Sondrӧnia’ӧ: Ihalӧ gamarahuta gohitӧ dӧdӧ moroi ba waosatӧ duho walukhata fakhai ia ba wombaso Buku Ni’amoni’ӧ si no muhonogӧi.

 

Ira Ama, Ina, ba Talifusӧ ni’omasi’ö.

Mege ba wamobӧrӧ walukhatada, no tafatunӧ ngawalӧ dahataha ba wangehaogӧ mangawuli fa’auri ba ginӧtӧ dungӧ Korona-19. Ba hiza tahataha sabӧlӧ tarasoi ya’ia da’ӧ: tetaha gamakhaita wariawӧsa ba gotalua niha sato, awuwu wa’atedou lala wangalui  soguna ba niha, mӧi tou wa’asӧkhi wamahaӧ iraono ba sekola, ambӧ ato niha samati simӧi ba Gereja ba wamalua fangandrӧ saohagӧlӧ ba fasӧmbata khӧ Lowalangi, ba tanӧbӧ’ӧnia na. Hewa’ae simanӧ me ya’ita no niha samati khӧ Lowalangi, tebai ha tatalagui manӧ dӧdӧda ma tatema’ӧ manӧ hadia zalua; ba hiza sifao famati, fanӧtӧna ba fa’omasi si so khӧda,  datafuli ita mangawuli khӧ Yesu, Sangorifi ya’ita. Faulo, sinenge i’a’aro’ӧ wamatida khӧ Yesu Keriso sifao fanguma’ӧ: "Haniha zi tola mamabali ya’ita ba wa’omasi Keriso? Hadia famakao ba ma fa’afӧkhӧ, ba ma  folohi, ba ma fa’olofo, ba ma fa lӧ nukha, ba ma ameta’uӧ, ba ma famunu?" (fahela Roma 8:35).

 

Ira Ama, Ina, ba Talifusӧ ni’omasi’ӧ.

Mege no tabaso, ta’erӧnusi ba tafosasi nibaso ba Mbuku Ni’amoni’ӧ moroi ba Luka 8:22-25. Bakha ba wombaso andrӧ oroma sibai, wa ira nifahaӧ soloyo miyefo sifao Yesu falukha ira dahataha sebua ya’ia da’ӧ bade ba angi sabӧlӧ. Ba zalua andrӧ, ira nifahaӧ mangiwa dӧdӧ, ata’u ba lӧ la’ila hadia nifaluara. Bӧrӧ da’ӧ hadia nifalua ndra nifahaӧ ba wangefa’ӧ ya’ira moroi ba wa’atekiko nosora? Ha sambua lala si tola lafalua ya’ia da’ӧ lasusugi Yesu simane niwa’ӧ bakha ba ayati 24, ba buania, Yesu Ifadӧhӧ mbade ba angi sabӧlӧ, irege ira nifahaӧ aheta ira moroi ba wa’atau’ra. Ba moroi ba da’ӧ, si lӧ tola lӧ’ӧ gӧi ita ta’odӧdӧgӧ ta’ehaogӧ mangawuli wa’aurida ba ginӧtӧ dungӧ Korona-19 andre sifao famalalini era’era, mombaso Buku Ni’amoni’ӧ ero ma’ӧkhӧ, lӧ farӧi ba wangandrӧ, oya tafalua wa’omasi khӧ nawӧda niha awӧ wa ta’ehaogӧ mangawuli gamakhaitada khӧ Lowalangi, awӧda niha ba hegӧi si so ba zifasui ya’ita. Baero da’ӧ, bӧi gӧi mamalӧmalö ta’o’ӧ ba tafalua goigoi sanandrӧsa ba wa lö wökhöfökhö (=Protokol Kesehatan) si no ihonogӧi famareta. Amen.

 

·       Hadia halöwö si bohou si tola tafalua ba wangorama’ö Turia Somuso Dödö bakha ba migu andre...?

·       Haniha zamalua? (owuloa haniha) ba hadia nifalua, hezo nahiania ba ha’uga bӧzi..?

·       Fangowuloi Kolekte Solidaritas: Sinunö Laudate No. 101.

 

7.   FANGANDRÖ SITUMBU MOROI BA DÖDÖ

·         Tebe’e khöda ginötö ba wangandrö situmbu moroi ba dödö

(tani ni’angandrӧi ma fangandrӧ niha samati)

S :  Datafa’ema gangandrӧwada khӧ Zo’aya si lӧ mamalӧ mamondrongo ngarӧngarӧ dӧdӧ zamati khӧNia:

     

1.     Soguna ba niha fefu sorasoi fa’ata’u ba ginötö dungö Korona-19

He Ama Fondrege Zabӧlӧ, abӧlӧ’ӧ fefu niha sorasoi fa’ata’u ba ginӧtӧ dungӧ Korona-19 andre. Ya lӧ aetu wanӧtӧnara ba lӧ lalulu manӧ ira ba zalua. Be’e khӧra wehi’a dӧdӧ ena’ӧ maoso ira moroi ba wa’ata’u, irege ba gafuriatania lasӧndra wa’ahono dӧdӧ ba wangalui ngawalӧ zoguna ero ma’ӧkhӧ.

 

Ma’andrö khöU ...   Tehe wangandröma, he So’aya.

 

2.     Soguna khӧ Famareta awӧ ndra Sohalöwö ba Medis sanoloni ira niha si gӧna tungӧ Korona-19

He Ama Fondrege zi Sӧkhi ba Solomasi. Tolo ndra Famareta khӧma i’otarai zabӧlӧ alawa irugi ba mbanubanua misa ba we’amӧi ngoningoni ba gotalua niha sato, ena’ӧ so khӧra wa’atuatua ba wamalua fanimbagӧ wa’amanana dungö Korona-19, ya lӧ mamalӧ lӧ mofӧkhӧ ira ba mohi’a dӧdӧra ba wamalua halӧwӧ ba we’amӧi enoni ba gotalua niha sato.

 

Ma’andrö khöU ...   Tehe wangandröma, he So’aya.

 

 

 

3.     Soguna khӧda sowulo ba da’e

He Lowalangi, Ama ba zorugo. Duwagӧ howuhowuMӧ khӧma ya’aga sowulo ba da’e.  Ya TaromaliU ni’erӧnusima i’a’aro’ӧ wamatima ba wa lӧ ata’u awӧ wangiwa dӧdӧ ba wangofanӧi fa’aurima ba ginӧtӧ dungӧ Korona-19 andre. Ya lӧ mamalӧ faofao Ndra’ugӧ khӧma bakha ba wa’auri wongambatӧsama, ba gowuloa ba bakha ba gotalua niha sato, ena’ӧ tola ma’ehaogӧ mangawuli wa’aurima hewa’ae falukha ndra’aga dahataha soya.

 

Ma’andrö khöU ...   Tehe wangandröma, he So’aya.

 

·         Data’osambua’ӧ fefu gangandrӧwada andre ba wangandrӧ si no Ifahaӧ Yesu Keriso samӧsa, He Ama khӧma …

 

·       Fangandrö Fangasiwai sifao Fangandrö Howuhowu Zo’aya.

He Ama Fondrege Zabölӧ, ma’andrӧ saohagӧlӧ khӧU bӧrӧ me no Ӧtolo ndra’aga sagӧtӧ wamaluama falukhata si fӧfӧna ba ginӧtӧ Fӧna Paskah 2022 andre. Fatenge khӧma Geheha Ni’amoni’ӧ ba wohagaini ya’aga, ena’ӧ itugu atuatua ba mangidengide’ӧ ndra’aga bakha ba wanema’ӧ fefu dahataha si falukhaga ba wa’aurima sero ma’ӧkhӧ. Lӧ mamalӧ faduhu dӧdӧma wa faofao Ndra’ugӧ khӧma ba wangehaogӧ mangawuli fa’aurima numalӧ ba zabӧlӧ sӧkhi soguna ba wangorifi ya’aga. Sifao fama’ema Zo’aya ya’aga, Yesu Keriso, OnoU sauri ba samatӧrӧ awӧU ba wahasambua khӧ Geheha Ni’amoni’ӧ, Lowalangi gӧtӧgӧtӧ wa’ara, Amen.

 

Sinunö Fangasiwai: Laudate No. 84.