AURI BAKHA BA LALA WA’AURI SI BOHOU (Falukhata Si-3 APP)

 A.   OHITÖ DÖDÖ

Ena’ö ngambatö tola :

1.    Lafalua gamuata si sökhi bakha ba lala wa’auri si bohou

2.    Labe’e dumaduma satulö ba gotalua niha sato ba wango’aurifagö lala wa’auri si bohou

B.   FAMOBÖRÖ

(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre:)

 

1.    Sinunö Famobörö: Laudate No. 97.

2.    Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.

Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ba † Tanda Röfa.

 

C.   FAMASAO

 

Ira Ama, Ina, ba Talifusӧ ni’omasi’ӧ.

Ma’ökhö andre ifuli falukha ita ba wanohugö falukhatada sitölu ba wangabakhai’ö lala wamati ba APP 2022. Tuho sedöna ta’erönusi ba walukhata si tölu andre ya’ia da’ö: AURI BAKHA BA LALA WA’AURI SI BOHOU. Lala wa’auri si bohou eluahania ta’aurifagö lala wa’auri si bohou molo’ö inötö si so ya’ita ia da’e ya’ia da’ö inötö wökhö Korona (=situasi pandemi). Ba ginötö wökhö Korona ba zi so ya’ita ia da’e, so ngawalö zi lö tola lö’ö tafalua soguna ba khöda samösa ba bakha ba ngambötöda he göi ba zi sambua angowuloa nifotöi angowuloa side’ide ma nifotöi KBG. Sambua dumaduma zi tola tafalua bakha ba wogamö lala wa’auri sibohou andre ya’ia da’ö: fondrorogö fa’auri ena’ö lö wökhöfökhö ma nifotöi 5M (manasai danga faoma sabu, tafake masker, muzago wa’ahatö ba gotaluada, mangaröu’ö ya’ita moroi ba gangowuloa niha sato ba lö asese mofanö fanö manö ita ba zagaröu, ena’ö lö göna khöda ngawalö wökhö). Moroi ba zi lima ngawalö andre, ena’ö tola tafalua irege tola tasöndra wa’omuso dödö ba fa’ohahau dödö. Fefu da’e göi tobali tandra wefaoda ba halöwö fangobadödöi awöda niha sifao fotundreheni halöwö wamareta ba wolawa wökhö korona-19 andre. Ia da’a, hewisa ita göi ba ngawalö zi no alua andre, hadia no tafalua ba wa’aurida ba ta’aurifagö lala wa’auri si bohou andre. Datafaoma ta’amatunöisi ba tabagisi ba nawöda ngawalö zi no tarasoi ba wa’aurida ba ginötö ia da’e, sitobali fanga’aro’ö tödöda ba wogamö fa’ohahau dödö.

 

 D.  BOSIBOSI WAMALUA FANGABAKHA’Ӧ FAMATI BA APP FAOMA LALA WOMBAGISI BUA ZӦNDRA INJIL SI-7 BOSI

(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).

 

1.   MANGANDRÖ FE’ASO ZO’AYA

·       Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.

 

·       Damangandrӧ ita:

So’aya ya’aga Yesu Keriso,  no möi Ndra’ugö ba gulidanö ba wanhehaogö fa’aurima. Ba ginötö ia da’e edöna ndra’aga ma’erönusi lala wogaonima ena’ö sauri ndra’aga bakha ba lala wa’auri si bohou ba ginötö ngawalö wökhö korona andre. Ya so Ndra’ugӧ ba torӧi’Ö awӧma iada’a ba wamohouni fa’aurima andre. Amen.

 

2.   FOMBASO BUKU NI’AMONI’Ö (Matai’o 5:17-20) 

Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.

Ia da’a databaso Mbuku Ni’amoni’ö

·       Mibokai Injil Matai’o,...

·       Ufuli uwa’ö samuza tö : Injil Matai’o, faza 5

·       Samuza tö ufuli u’ombakha’ö: Injil Matai’o faza 5 ayati 17 irugi ayati 20

·       Sakali tӧ : Injil Matai’o, faza 5 ayati 17 irugi ayati 20

·       Ube’e ginötö fasamösa moroi ba gotaluada wombaso Injil andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.

·       Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.

 

 3.   FANGOMBAKHA’Ö NGAWUA WEHEDE MOROI BA MBUKU NI’AMONI’Ö SADÖNI DÖDÖDA, TEFAUDU BA WA’AURIDA BA TA’ERÖNUSI

·       Ube’e ginӧtӧ khöda gofu haniha manӧ ba gotaluada nitufa Yesu tӧdӧ sifao fanguma’ӧ ngawua wehede ma ngaroto wehede sadogodogo ma zui ayati sadӧni dӧdӧda moroi ba wombaso Mbuku Ni’amoni’ӧ si no mubaso no mege, hulӧ simane ngawua gara sebua bӧli ma manimani si no tobini bakha ba wombaso andrӧ.

·       Tebe’e ginötö ba wamaehagö fehede sadogodogo andrö, 3 kali muwa’ögö, sifao fa’ebua li, mudai’da’i ba bakha ba ginötö wa’ahono ba bakha ba gofanöwa wangandrö tefalua.

·       Sakali tӧ databaso wombaso moroi ba Mbuku Ni’amoni’ӧ andre.

 

4.   TAHAOGÖ DÖDÖDA BA TALULU ZO’AYA FAHUHUO IA KHÖDA BA GINÖTÖ SI LÖ NINININI

·       Datahonogö ita 2 meniti wa’ara, tafaigi hadia ia zi no alua ba wa’aurida, talulu ba tabe’e ginötö  khö Yesu fahuhuo Ia khöda sifao fangerönusi, mendrua manö ba ngawalö zagalua ba ginötö ia’da’a.

·       Hadia no göi ube’e dumaduma si sökhi ba gotalua niha sato ba wamalua ngawalö halöwö fondrorogö fa’auri ena’ö lö alua ngawalö wökhöfökhö. Ufarou dödö nösi nomogu ena’ö sauri ndra’aga bakha ba lala wa’auri si bohou.

o   Tola gӧi mufaogӧ faoma sinunӧ ba wa’ahono  (lagu taize). ma Sinunö Laudate No. 47A.

 

5.   TABAGISI KHÖ NAWÖDA, HADIA MANÖ ZI NO TARONGO MOROI KHÖ LOWALANGI WEHEDENIA SI SO BAKHA BA DÖDÖDA

·       No muhede khӧda Yesu ero zamӧsana ba fahuhuo ia khöda moroi ba ngawalӧ wehede si no amaedola manimani sebua böli si tumbu bakha ba dödöda sitobali tandra ba wango’aurifagӧ lala wamatida.

·       Ube’e ginötö khöda ba wamaehagö sanandrösa ba wehede ma ngaroto wehede sadogodogo ma ngawalö ayati sifatöfa khöda samösa moroi ba wombaso Buku Ni’amoni’ö si no tarongo ba ni’erönuisida ba ginötö ia da’e, sitefaudu molo’ö ohitӧ dӧdӧ  ba waosatӧ duho walukhatada ba ginӧtӧ andre. Hana wa fehede andre fatӧfa ba dӧdӧgu...?

·       Tetötöna khöda, ena’ö tenga samalua khotbah ita ma sama’ema famahaö fa’aboto ba dödö ita ba niha bö’ö ma zui fahuohuosa ba nawö; ba hiza’i, tafatunö sanandrösa ba ngawalö zalua nirasoida ba wa’aurida samösa.

 

6.   MAMATUNÖ NGAWALÖ HALÖWÖ SEDÖNA TAFALUA BA NIKAONI LOWALANGI ITA BA WAMALUA YA’IA

Sondrӧnia’ӧ: Ihalӧ gamarahuta gohitӧ dӧdӧ moroi ba waosatӧ duho walukhata fakhai ia ba wombaso Buku Ni’amoni’ӧ si no muhonogӧi.

 

Ira Ama, Ina, ba Talifusӧ ni’omasi’ö.

No muhede khöda Yesu Keriso bakha ba DaromaliNia si no tafondrondrongo, fe’asoNia tou ba gulidanö andre, tenga ba wowu’ai ngawalö huku ma goi goi ba hiza’i ba wobönökhi ngawalö huku ma goi goi si no so andrö, simanö göi ba ginötö si so ya’ita ia da’e, wa lala ba wa’auri si bohou andre tenga ba wamabali ya’ita moroi ba khö ndra talifusöda ba niha sifahuwu khöda, ba hiza’i, ena’ö sifaoma ita ba wondrorogö fa’aurida sifao fangomasi’ö ba lala wa’auri sabölö sökhi. Ato niha si no mamalua ba wolohi fa’auri si sökhi andre ba ato göi niha si no mondrugi lala ba wanöndra fa’auri sibohou ba ginötö ia da’e. Andrö ya’ita niha samati, ya faduhu dödöda wa ha  sambalö te’abölö’ö ita ba sauri ita bakha ba lala wa’auri sibohou ba ya tobali ita göi dumaduma si sökhi ba gotalua niha sato. Börö da’ö, datafalua ba ta’aurifagö lala ba wa’auri si bohou andre, me no tebohouni ba tebotokhi bakha ba dödöda Daromili Zo’aya andrö, irege tola tafalua halöwö sibohou ba tobali tandra soroma ba wamalua halöwö fanuriaigö Turia Somuso Dödö bakha ba wa’aurida samösa ba ngambatöda ba bakha gangowuloada ba KBG khöda.

 

·       Hadia halöwö si bohou si tola tafalua ba wangorama’ö Turia Somuso Dödö bakha ba migu andre...?

·       Haniha zamalua? (owuloa haniha) ba hadia nifalua, hezo nahiania ba ha’uga bӧzi..?

·       Fangowuloi Kolekte Solidaritas: Sinunö Laudate No. 7.

 

7.   FANGANDRÖ SITUMBU MOROI BA DÖDÖ

·        Tebe’e khöda ginötö ba wangandrö situmbu moroi ba dödö

(tani ni’angandrӧi ma fangandrӧ niha samati)

 

S :  Datafa’ema gangandrӧwada khӧ Zo’aya si lӧ mamalӧ mamondrongo ngarӧngarӧ dӧdӧ zamati khӧNia:

 

1.     Soguna khӧ Famareta awӧ ndra Sohalöwö ba Medis sanoloni ira niha si gӧna tungӧ Korona-19

He Lowalangi Ama fondrege zabölö, Ya Ö’amualagö khö ndra samatörö ya’aga ba negarama andre wa’atuatua si’oroi Ndra’ugö, ena’ö tola la’alui lala ba wolohe ya’aga ba wa’ohahahu dödö ba ginötö wökhö Korona si no manöröi fefu ngawalö soi ia da’e, mendrua manö khöra ndra sohalöwö ba nahia zofökhö, ya Ö’abölö’ö ira ba wonolo ira talifusöma si no göna fökhö Korona. Ya fa’atuatua moroi ba nifaluara tola te’olehesi ndra’aga bakha ba wa’atulö ba wa’ohahau dödö.

 

S : Damangandrö ita ...       U : Tehe wamangandröma he So’aya.

 

 

 2.     Soguna ba niha samati ba Stasi ba KBG khöda

He Lowalangi Ama, mangandrö ndra’aga salahi nösi stasima sifao angowuloama ba KBG khöma si no owulo ia da’a, ena’ö ba ginötö wangowasaini föna Paska andre tola tefasao ndra’aga bakha ba wamalalini era’era sifao famahouni fa’aurima bakha ba lala wa’auri sibohou, sifao ohitö dödö niha sato ba ngawalö soi fefu, irege amuata si sökhi andrö, tefaudu molo’ö goi’goi wa’auri niha ero zamösana, mendrua manö ba ngawalö wökhö si no alua andre.

 

S : Damangandrö ita ...       U : Tehe wamangandröma he So’aya.

 

3.     Soguna ba ngawalö gangandröwa dödö ba ngambatöda zamösana

He Lowalangi fondrege zolamasi, ya’aga sowulo ba nahia andre mafa’ema gangandröwama khöU (tebe’e ginötö ba wa’ahono dödö); Ya Öfondrondrongo gangandröwama ya’aga iraonoU si no owulo ba nahia andre. Faduhu dödöma wa Öbe’e khöma zabölö sökhi moroi ba ni’andröma, me no Ama Ndra’ugö khöma, andrö lö aiwö ndra’aga ba wanötöi töiMö, me no Ifahaö ndra’aga Yesu Keriso samösa ba wanguma’ö: He Ama khöma si so ba zorugo …”.

 

·        Fangandrö Fangasiwai sifao Fangandrö Howuhowu Zo’aya.

         He Ama Lowalangima ma’andrö saohagölö khöU fefu ngawalö howuhowu si no Öbe’e khöma sagötö ba wamaluama fangabakhai’ö famatima ba nahia andre. Ya fefu gohitö dödöma si sökhi sifao famalua famalalini era’erama ba ginötö föna Paska andre, tola te’oroma’ö ba lala wa’aurima sero ma’ökhö, he bakha ba ngambatöma mendrua manö ba wariawösama ba gotalua niha sato, simanö göi ba wefaoma bakha ba gereja ba gofu he zo misa Öfatenge ndra’aga.  Ya fangandröma sifao gangandröwa dödöma andre mafasao tanöfönaU sifao fama’ema Keriso So’aya ya’aga ba sama’ema khöma, sa’auri ba samatörö ia da’a ba sagötö fa’ara. Amen.

 

Sinunö Fangasiwai: Laudate No. 109.