FOGAONI BA WAMOHOUNI FA’AURI AWÖ NIFALUA BA GINÖTÖ KORONA (Falukhata Si-4 APP 2022)

 A.   OHITÖ DÖDÖ

Ena’ö ngambatö tola :

1.    Lafalua wangehaogö ba fondrorogӧ ombӧita Lowalangi si so ba zifasui ya’ira, he gӧi fa’aurira samӧsa ba mendrua manӧ wa’auri nawӧra niha.

2.    Laforoma’ӧ wamalalini era’era, sifao folo’ӧ goigoi ba wa’auri sibohou.

 

B.   FAMOBÖRÖ

(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre:)

1.    Sinunö Famobörö: Laudate No. 52.

2.    Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.

“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ba † Tanda Röfa.

 C.   FAMASAO

 

Ama, Ina ba Talifuso ni’omasi’ӧ ba khӧ Keriso.

Ba walukhata si-4 andre, tuho ni’amatunӧisida ya’ia da’ӧ Fogaoni ba wamohouni fa’auri awӧ nifalua ba ginӧtӧ korona. Bakha ba duho da’e tefarou dödöda ba wamalalini era’era ba tatӧrӧ tӧdӧda wa dozi ita si no tebayagӧ idanӧ, tefotӧi Ono Lowalangi ba tobali ndrotondroto bakha ba gereja Katolik. Bӧrӧ da’ӧ, sambua lala ena’ӧ alua wamalalini era’era, andrö mufalua nifotöi Sakramen Fangaku horӧ ena’ö te’ehaogö ita mangawuli moroi ba ngawalö horö ba olalöwa. Fefu da’ae tefalua ena’ö tola tetenawa ita moroi ba ngawalӧ horӧ sifao famatida ba wogamӧ fa’auri silӧ’aetu. Bӧrӧ da’ӧ ohitӧ dӧdӧ ba walukhata si-4 andre ya’ia da’ӧ: 1.Ena’ӧ dozi ngambatӧ lafalua wangehaogö ba fondrorogӧ ombӧita Lowalangi si so ba zifasui ya’ira. 2.Ena’ӧ laforoma’ӧ wamalalini era’era, sifao folo’ӧ goigoi ba wa’auri sibohou. Databӧrӧtaigӧ walukhatada andre sifao fa’ahono ba bakha ba gofanöwa wangandrö tefalua.

 

 

 

D.  BOSIBOSI WAMALUA FANGABAKHA’Ӧ FAMATI BA APP FAOMA LALA WOMBAGISI BUA ZӦNDRA INJIL SI-7 BOSI

(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).

 

1.   MANGANDRÖ FE’ASO ZO’AYA

·       Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.

 

Damangandrӧ ita:

He So’aya ya’aga Yesu Keriso, owulo zui ndra’aga iada’a ba wangabakhai’ӧ famatima sifao tuho ni’erӧnuisima “Fogaoni ba wamohouni fa’auri awӧ nifalua ba ginӧtӧ korona. ” Aboto ba dӧdӧma wa ulidanӧ awӧ wa’aurima andre no tekiko bӧrӧ gamuatama samӧsa. Mendrua manӧ ba wa’abudӧdӧ sifalukha ndra’aga sagӧto dungӧ wӧkhӧ korona-19 andre. Sata’u ndra’aga ba sangiwa tӧdӧ. Bӧrӧ da’ӧ ia da’e ma’andrӧ ya so’Ӧ ba gotaluama, ena’ӧ tola tefadöhö ba te’abӧlӧ’ӧ ndra’aga irege tola ma’okhӧgӧ wehi’a dӧdӧ sibohou ba wanga’azӧkhi fa’aurima. Ya’ugӧ sa Zo’aya ba sanoloni ya’aga, ia’da’a ba irugi zi lö aetu. Amen.

 2.   FOMBASO BUKU NI’AMONI’Ö (Mareko 1:4-7)

Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.

 

Ia da’a databaso Mbuku Ni’amoni’ö

·       Mibokai Injil Mareko,...

·       Ufuli uwa’ö samuza tö : Injil Mareko, faza 1

·       Samuza tö ufuli u’ombakha’ö : Injil Mareko faza 1 ayati 4 irugi ayati 7

·       Sakali tӧ : Injil Mareko faza 1 ayati 4 irugi ayati 7

·       Ube’e ginötö fasamösa moroi ba gotaluada wombaso Injil andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.

·       Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.

 3.   FANGOMBAKHA’Ö NGAWUA WEHEDE MOROI BA MBUKU NI’AMONI’Ö SADÖNI DÖDÖDA, TEFAUDU BA WA’AURIDA BA TA’ERÖNUSI

·       Ube’e ginӧtӧ khöda gofu haniha manӧ ba gotaluada nitufa Yesu tӧdӧ sifao fanguma’ӧ ngawua wehede ma ngaroto wehede sadogodogo ma zui ayati sadӧni dӧdӧda moroi ba wombaso Mbuku Ni’amoni’ӧ si no mubaso no mege, hulӧ simane ngawua gara sebua bӧli ma manimani si no tobini bakha ba wombaso andrӧ.

·       Tebe’e ginötö ba wamaehagö fehede sadogodogo andrö, 3 kali muwa’ögö, sifao fa’ebua li, mudai’da’i ba bakha ba ginötö wa’ahono ba bakha ba gofanöwa wangandrö tefalua.

·       Sakali tӧ databaso wombaso moroi ba Mbuku Ni’amoni’ӧ andre.

 

4.   TAHAOGÖ DÖDÖDA BA TALULU ZO’AYA FAHUHUO IA KHÖDA BA GINÖTÖ SI LÖ NINININI

·       Datahonogö ita 2 meniti wa’ara, tafaigi hadia ia zi no alua ba wa’aurida, talulu ba tabe’e ginötö  khö Yesu fahuhuo Ia khöda sifao fangabakhai’ö DaromaliNia ba sifao tuho ni’erönuisida ia da’a ya’ia da’ö: “Fogaoni ba Wamohouni Fa’auri”.

 

o   Tola gӧi mufaogӧ faoma sinunӧ ba wa’ahono  (lagu taize). ma Sinunö Laudate No. 92B.

 5.   TABAGISI KHÖ NAWÖDA, HADIA MANÖ ZI NO TARONGO MOROI KHÖ LOWALANGI WEHEDENIA SI SO BAKHA BA DÖDÖDA

·       No muhede khӧda Yesu ero zamӧsana ba fahuhuo ia khöda moroi ba ngawalӧ wehede si no amaedola manimani sebua böli si tumbu bakha ba dödöda sitobali tandra ba wango’aurifagӧ lala wamatida.

·       Ube’e ginötö khöda ba wamaehagö sanandrösa ba wehede ma ngaroto wehede sadogodogo ma ngawalö ayati sifatöfa khöda samösa moroi ba wombaso Buku Ni’amoni’ö si no tarongo ba ni’erönuisida ba ginötö ia da’e, sitefaudu molo’ö ohitӧ dӧdӧ  ba waosatӧ duho walukhatada ba ginӧtӧ andre. Hana wa fehede andre fatӧfa ba dӧdӧgu...?

·       Tetötöna khöda, ena’ö tenga samalua khotbah ita ma sama’ema famahaö fa’aboto ba dödö ita ba niha bö’ö ma zui fahuohuosa ba nawö; ba hiza’i, tafatunö sanandrösa ba ngawalö zalua nirasoida ba wa’aurida samösa.

 6.   MAMATUNÖ NGAWALÖ HALÖWÖ SEDÖNA TAFALUA BA NIKAONI LOWALANGI ITA BA WAMALUA YA’IA

Sondrӧnia’ӧ: Ihalӧ gamarahuta gohitӧ dӧdӧ moroi ba waosatӧ duho walukhata fakhai ia ba wombaso Buku Ni’amoni’ӧ si no muhonogӧi.

 

Ira Ama, Ina ba Talifusӧ ni’omasi’ӧ.

Fogaoni ba wamalalini era’era ena’ӧ I’ehaogӧ wa’aurida Lowalangi,  tola ta’ila ta’aurifagö ba tarasoi ba ngawalö faosatö andre: 1).Fombayaigӧ Idanӧ Ni’amoni’ö, zanasai horӧ ondrӧita moroi khӧ Gadamo ba Khawa, ena’ӧ bӧi tebӧbӧ bakha ba wa’aurida, ba hiza’i te’ehaogö ita mangawuli ba wa’atobali Ono Lowalangi ba sifao ita bakha ba ndrotondroto gereja Katolik. 2).Sakramen Fangaku Horӧ, zanayaigӧ fefu golalӧwada ba te’ehaogö ita mangawuli, irege sinangea ita tobali Ono Lowalangi. 3).Sifao fangidengide’ӧ tafalalini gera’erada, ta’akui fefu ngawalӧ horӧda ba tafati me’imane: "Mifalalini gera’erami, mifabayagӧ’ӧ ami idanӧ, miakui horӧmi tanӧ fӧna Lowalangi ba I’efa’ӧ horӧmi andrӧ" 4).Fefu oi alua da’e na so khöda wa’aboto ba dӧdӧ wa bӧrӧta wamatida ya’ia ba wogamӧ fa’auri si lӧ aetu. Andrö moguna tatörö tödöda ba ta’angeraigö mangawuli sanandrösa ba lala halöwöda ba wogaoni Zo’aya ya’ita ba ngawalö lala halöwö nifaluada barö migu silalö sifao famalua nösi dödöda ba lala halöwö sibohou sitola tafalua ba migu si so mifönada:

 

• Hadia halöwö si bohou si tola tafalua ba wangorama’ö Turia Somuso Dödö bakha ba migu andre...?
• Haniha zamalua? (owuloa haniha) ba hadia nifalua, hezo nahiania ba ha’uga bӧzi..?
• Fangowuloi Kolekte Solidaritas: Sinunö Laudate No. 57.

 7.   FANGANDRÖ SITUMBU MOROI BA DÖDÖ

·       Tebe’e khöda ginötö ba wangandrö situmbu moroi ba dödö

      (tani ni’angandrӧi ma fangandrӧ niha samati)

 

S : Datafa’ema gangandrӧwada khӧ Zo’aya si lӧ mamalӧ mamondrongo ngarӧngarӧ dӧdӧ zamati khӧNia:

 

1.   Soguna ba niha fefu sorasoi fa’ata’u ba ginötö dungö wökhö Korona

     He Ama, ya dozi niha sata’u ba sanizinizi tӧdӧ bӧrӧ wӧkhӧ korona andre te’abӧlӧ’ӧ bӧrӧ wamatira khӧU, ba ya silӧmamalӧmalö faofao Ndra’ugӧ khӧra ma’afefu bongi ba ma’ӧkhӧ.

 

     Ma’andrӧ khӧU… Tehe wangandrӧma he So’aya.

 

2.   Soguna khӧ Famareta awӧ ndra Sohalöwö ba Medis sanoloni ira niha si gӧna tungӧ wökhö Korona-19

     He Ama, tuturu lala ndra samatӧrӧ ya’aga ena’ӧ si sӧkhi ba si tefaudu nifaluara ba wolawaini fӧkhӧ korona andre. Ba be’e khӧra wa’abӧlӧ awӧ wanaha tӧdӧ irege tola larorogӧ ba lafadӧhӧ niha si no gӧna fӧkhӧ korona. Ya simane fa’omasi nonoU Yesu Keriso khӧma niha gulidanӧ, simanӧ gӧi mafalua ba wangomasi’ӧ awӧma niha tanӧbӧ’ӧ.

 

     Ma’andrӧ khӧU... Tehe wangandrӧma he So’aya

3.   Soguna ba niha samati ba Stasi ba KBG khöda

     He Ama, ya fefu ndra’aga ӧsi Stasi ba KBG andre, lömamalö sifao ndra’aga bakha ba wolumӧ’ӧU. Ya Ӧlumӧ’ӧ ndra’aga moroi ba ngawalӧ wa’abu dӧdӧ bӧrӧ dungӧ wӧkhӧ korona andre. Ba ya EhehaU zondrӧnia’ӧ ya’aga ba wolo’ӧ goigoi wa’auri sibohou afu lӧ gönaga ngawalӧ wӧkhӧ andrӧ.

 

     Ma’andrӧ khӧU... Tehe wangandrӧma he So’aya

 

4.   Soguna ba ngawalö gangandröwa dödö ba ngambatöda zamösana

 

     Ma’andrö khöU he So’aya ...   Tehe wangandröma, he So’aya.

 

·       Data’osambua’ӧ fefu gangandrӧwada andre ba wangandrӧ si no Ifahaӧ Yesu Keriso samӧsa, He Ama khӧma …

 

·       Fangandrö Fangasiwai sifao Fangandrö Howuhowu Zo’aya.

He Ama fondrege zi sӧkhi, ma’andrӧ saohagӧlӧ khӧU ginӧtӧ si no ma’oguna’ӧ sagӧtӧ falukhatama andre. Sindruhu aboto ba dӧdӧma wa no arӧu ndra’aga moroi khӧU, awӧ walӧfa’afaduhu dӧdӧma moroi ba wa’abӧlӧU ba fa’ahakhö dödöU khöma. Tuturu lalama ena’ӧ makhamӧ gohitӧ dӧdӧma ba wogamö fa’owuawua dӧdӧ ba fa’ohauhau dӧdӧ. Ya nisuno Ndra’ugö, iada’e ba irugi zi lӧ aetu. Amen.

 

Sinunö Fangasiwai: Laudate No. 86.