A. OHITÖ DÖDÖ
Ena’ö ngambatö tola :
1. Aboto ba dödöra lala wangehaogö fa’auri si sökhi ena’ö ngambatö ba zifasui lö wökhöfökhö.
2. Lafalua ngawalö halöwö ba wogamö fa’ohauhau dödö ngambatö ba ginötö wökhö Korona-19.
B. FAMOBÖRÖ
(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre:)
1. Sinunö Famobörö: Laudate No. 163.
2. Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.
“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ba † Tanda Röfa.
C. FAMASAO
Ama, Ina ba talifusö ni’omasi’ö ma’afefu.
Ba ginötö wökhö korona andre, arakhagö fefu ngawalö soi ba ngasi wa’auri niha sato, mo’ohitö dödö ba wangehaögö ba ba wanuturu lala sanandrösa ba lala wa’auri si sökhi ena’ö lö göna fökhö niha. Lala nifalua ena’ö lö göna khöda ngawalö wökhö korona andrö, no oföna labe’e khöda wa’aboto ba dödö ira sohalöwö ba wamareta, ya’ia da’ö ba wamalua nifotöi 5M (ena’ö tafake masker, manasai danga faoma sabu, muzago wa’ahatö ba gotaluada, mangaröu’ö ya’ita moroi ba gangowuloa niha sato ba lö asese mofanö fanö manö ita ba zagaröu, ena’ö lö göna khöda ngawalö wökhö). Lala ba wongehaogö fa’auri si sökhi andre ena’ö lö mofökhö, no göi sambua ohitö dödö ba nidönadöna niha ma’afefu, ena’ö itugu tola aboto ba dödöda hewisa lala ba wariawösa si sökhi mendrua manö ba ginötö ia’da’a, ena’ö ba zifasui ya’ita lö wökhöfökhö irege tasöndra waohauhau dödö sifao fa’auri bakha ba wa’auri sibohou.
Ena’ö ohitö dödö andre moroi yawa tola tefalua, andrö moguna tarorogö mbotoda ba wa’auri si sökhi, ena’ö lö mofökhöfökhö ita, ya’ia ba wamalua ba wangoguna’ö soguna ni’a ba mboto, folombase ba famadu idanö safusi molo’ö fa’amoguna ba tazago göi wangoguna’ö ngawalö gö salio mu’oguna’ö ba lö oya mbariaga ba ngawalö gö si no mufa’anö andrö sifao famalua famehia’a mboto sero ma’ökhö. Ohitö dödö ba wondrorogö fa’auri mbotoda andre ya’ia da’ö, ena’ö lö göna ba mbotoda ngawalö wökhö, irege lö tobali fökhö sebua ba wangerangerada. Börö da’ö, ba ginötö wökhö korona andre, si lö tola lö’ö moguna ta’aröu’ö ita moroi gangowuloa niha sato ba simanö göi ba lala halöwö nifaluada baero nomoda, irege tola manötöna ita wa fökhö korona andre tola te’alösi ba te’aröu’ö ngambatöda moroi ba ngawalö wökhöfökhö salua ba wa’aurida.
Moroi ba ngawalö wökhö korona si no alua andre, tebe’e göi khöda wa’aboto ba dödö sifao fangerangera si sökhi wa tenga ha ya’ita manö göi ni’ageraigöda samösa ba hiza,i moguna lala halöwö sinangea ba si tola tafalua ya’ia nifotöi “fangobadödöi”=Solidaritas. Halöwö fangobadödöi awö andre, no sambua lala halöwö ba wanoloni niha tanö bö’ö ba tobali göi sambua halöwö fogaoni ba wangahatö’ö ba ba wangehaogö lala wa’auri niha ba zi so miföna, ena’ö fa’auri niha andrö itugu sökhi ba mo’adu moroi ba lala wa’auri niha si to’ölö. Paus Fransiskus, imane wa fa’alowalangi ba niha ba fangobadödöi ba niha, no sambua halöwö sitebai mufaefa faoma fatambai, börö me Lowalangi faofao Ia khöda ba Lowalangi andrö no oföna Ia wangobadödöi niha ba tefotandro bakha ba lala wa’auri niha.
Sifao famalua ba fangodödögö ba wanöndra fa’ohauhau dödö ngambatö ba ginötö wökhö korona andre, moguna sibai tabokai dödöda sifao fangerangerada ba wangalui lala halöwö sinangea tafalua ya’ia da’ö: 1.Tola mubagisi wangoguna’ö kefe soguna ba ngambatö, andrö sifaoma mube’e wa’aboto ba dödö, ena’ö kefe ni’oguna’ö andrö moguna mu’atalisi ba te’oguna’ö ia molo’ö fa’amoguna. 2.Tesöndra lala ba wa’auri si to’ölö, ya’ia fetaro ba lala wa’auri sero ma’ökhö, ena’ö fefu gofu hadia ia nifalua andrö tola tefalua ia molo’ö fa’abölö ba fa’amoguna sifao fa lö fangaohangaoha, ba hiza’i moguna ta’owölöwölö’ö ita ba wangirö’ö kefe. 3.Tesöndra lala ba wondrou’ö ngawalö gonönöta ba wangalui sinöndra, da’e itaria soguna ba ngawalö ni’oguna’ö bakha ba ngambatö itugu tedou, irege lö tola tefagölösi moroi ba zinöndra si no musöndra börö wa’tedou mböli gamawaö. Andrö moguna mu’alui lala si sökhi, ena’ö sinöndra ni’alui sero ma’ökhö tola tedou ba mo’onönöta, tatu manö halöwö da’e, tefaudu molo’ö fa’atuatua, fangi’ila ba fa’aterou dödö ba tefaudugö göi molo’ö inötö ba ginötö ia’da’a, dumadumania: na ira ama, ina sifao iraono so wangi’ila, fa’atuatua ba fa’aterou dödö ba wamazökhi kue, ba baga mena’ö na mufalua wamazökhi ba ba wamawa kue andrö. 4.Ngawalö harato si so bakha ba ngambatö, na no ta’okhögö harato sebua beli andrö, ba tola göi fabali ba wa’atedou mböli gokhöta ma harato si no so andrö, dumadumania: Harato ba wa’atuatua, ya’ia fa’atuatua, fangi’ila ba howuhowu Ni’amualagö Lowalangi ba niha, Harato soroma, ya’ia ngawalö gokhöta si no ta’okhögö, simane ngawalö gurifö, tanö, fangokosi nahia omo, nahia wamawa, laza sebolo, btn, irege tola te’oguna’ö ba tedou’ö mböli ba wangokosi nahia andrö ba zi ero’ero döfi. Harato nga’örö sura sura sebua böli, ena’ö okhöta ma kefe si so khöda andrö tola mohalöwö ia ba wondrou’ö onönöta ba wangaluida, simane na mangirö’ö kefe ba bank ma ba CU. Harato salio oroma, simane ba wangoguna’ö internet, na tola ta’oguna’ö ia ba si sökhi ba tola göi tobali fondrou’ö fangalui sebua. Moroi ba ngawalö zi te’ombakha’ö andrö moroi yawa, manötöna ita ena’ö tola tobali lala khöda ba wondrou’ö fa’ohauhau dödö bakha ba ngambatöda ba ba zifasui si so ya’ita.
Ira talifusö ni’omasi’ö.
Ba wangehaogö fa’auri si sökhi ena’ö lö wökhöfökhö moguna tafalua ngawalö halöwö ba wogamö fa’ohauhau dödö bakha ba ngambatö ba zifasui ya’ita, mendrua manö ba ginötö wökhö korona andre. Lala halöwö saoha nifalua ba wangehaogö fa’auri si sökhi andrö moguna sibai tefalua ia bakha ba gangowuloa niha sato ba ba gangowuloa side’ide, ena’ö lö göna khöda ngawalö wökhö andrö, irege tola tasöndra wa’ohauhau dödö, he soguna ba mboto ba simanö göi ba zoguna ba noso. Moroi ba da’ö, Tuho sebua ba Aksi Puasa Pembangunan (APP) dӧfi 2022 andre ya’ia da’ӧ: “MANGEHAOGÖ MANGAWULI FA’AURI”. Ba walukhatasada andre data’abakhai’ö faosatö walukhata si-lima andre, ya’ia da’ö: “SIFASUI LӦ WӦKHӦFӦKHӦ NGAMBATӦ OHAUHAU DӦDӦ”. Ba walukhata si-5 andre, tefasugi ba dödöda mangawuli, ena’ö tola itugu aboto ba dödöda lala wangehaogö fa’auri si sökhi ena’ö ngambatö ba zifasui lö wöfökhöfökhö sifao famalua ngawalö halöwö saoha ba wogamö fa’ohauhau dödö bakha ba ngambatöda mendrua manö ba ginötö wökhö korona-19 si no alua andre. Moroi ba da’ö, manötöna ita ena’ö sifaoma ita ba wo’angeraigö halöwö fangobadödöi andrö ba zifasui ya’ita mendrua manö ba gotalua niha side’ide ba sinumana, börö me da’e sambua gohitö dödö ba wogamö lala ba wa’auri satulö ba lala si sökhi ba “famalua fa’ahakhö dödö, fangobadödöi ba fo’ame’egö tödö nawöda niha” (LS 231, 58). Data’abakhai’ӧ walukhatasada ba walukhata si-5 andre sifao folo’ӧ bosibosi andre:
D. BOSIBOSI WAMALUA FANGABAKHA’Ö FAMATI BA APP FAOMA LALA WOMBAGISI BUA ZÖNDRA INJIL SI-7 BOSI
(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).
1. MANGANDRÖ FE’ASO ZO’AYA
· Datahonogö ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrö fe’aso Yesu bakha ba wangandrö.
Damangandrö ita:
He Lowalangi Ama Fondrege zi Sökhi, ma’andrö saohagölö khöU börö kuaso fa’ahakhö dödöU bakha ba wa’aurima. Ba walukhatama andre, no’owulo ndra’aga fefu ba wangabakhai’ö famati ba Aksi Puasa Pembangunan ba ginötö Föna Paskah 2022 andre. TaromaliU nirongoma dania itutunö khöma ena’ö tola mafasömba’ö mbotoma sifao nösima andre tobali fasömbata sauri, ni’oniagö khö Lowalangi ba si fatema badödöU, me da’e sa lala ba wamosumange Lowalangi ba wa’asinangea, irege buala moroi ba howuhowuMö andrö, tola masöndra lala ba wa’auri si sökhi ba faohauhau dödö. Ba hiza ba ginötö wökhö korona-19 andre, ma’andrö we’asoMö ba gotaluama mendrua manö ba gangowuloama side’ide andre, ena’ö ngambatöma ba zifasui ndra’aga, lö mamalömalö Örorogö ba Ölumö’ö moroi ba wa’omasiU. Moroi ba da’ö, Ya tohare Ndra’ugö khöma ba Ya toroi Ndra’ugö khöma ia da’e. Fangandröma andre, mafasao khöU sifao fama’ema Keriso, So’aya ya’aga. Amen.
2. FOMBASO BUKU NI’AMONI’Ö (Roma 12:1-8)
Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.
Ia da’a databaso Mbuku Ni’amoni’ö
· Mibokai Zura Roma,...
· Ufuli uwa’ö samuza tö : Sura Roma, faza 12
· Samuza tö ufuli u’ombakha’ö : Sura Roma, faza 12 ayati 1 irugi ayati 8
· Sakali tö : Sura Roma, faza 12 ayati 1 irugi ayati 8
· Ube’e ginötö fasamösa moroi ba gotaluada wombaso taroma li andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.
· Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.
3. FANGOMBAKHA’Ö NGAWUA WEHEDE MOROI BA MBUKU NI’AMONI’Ö SADÖNI DÖDÖDA, TEFAUDU BA WA’AURIDA BA TA’ERÖNUSI.
· Ube’e ginӧtӧ khöda gofu haniha manӧ ba gotaluada nitufa Yesu tӧdӧ sifao fanguma’ӧ ngawua wehede ma ngaroto wehede sadogodogo ma zui ayati sadӧni dӧdӧda moroi ba wombaso Mbuku Ni’amoni’ӧ si no mubaso no mege, hulӧ simane ngawua gara sebua bӧli ma manimani si no tobini bakha ba wombaso andrӧ.
· Tebe’e ginötö ba wamaehagö fehede sadogodogo andrö, 3 kali muwa’ögö, sifao fa’ebua li, mudai’da’i ba bakha ba ginötö wa’ahono ba bakha ba gofanöwa wangandrö tefalua.
· Sakali tӧ databaso wombaso moroi ba Mbuku Ni’amoni’ӧ andre.
4. TAHAOGÖ DÖDÖDA BA TALULU ZO’AYA FAHUHUO IA KHÖDA BA GINÖTÖ SI LÖ NINININI.
· Datahonogö ita 2 meniti wa’ara, tafaigi hadia ia zi no alua ba wa’aurida, talulu ba tabe’e ginötö khö Yesu fahuhuo Ia khöda sifao fangerönusi, mendrua manö ba ngawalö zagalua ba ginötö ia’da’a.
· Hadia no ufalua wondrorogö fa’auri si sökhi andrö sifao famalua ngawalö lala halöwö saoha ba wogamö fa’ohauhau dödö ba wa’aurima sifao ösi nomogu, mendrua manö ba ginötö wökhö korona andre.
o Tola gӧi mufaogӧ faoma sinunӧ ba wa’ahono (taize). ma Sinunö Laudate No. 58.
5. TABAGISI KHÖ NAWÖDA, HADIA MANÖ ZI NO TARONGO MOROI KHÖ LOWALANGI WEHEDENIA SI SO BAKHA BA DÖDÖDA.
· Faulo i’be’e khöda wa’aboto ba dödö ba i’amenesi ita sifao fehede si sökhi si no amaedola manimani sebua böli, ena’ö tedou wangi’ilada ba sitedou ita ba wamati, börö wa’ahakhö dödö Lowalangi andrö, ena’ö mifasömba’ö mbotomi sifao nösimi andrö tobali fasömbata sauri, ni’oniagö khö Lowalangi ba si fatema ba dödöNia.
· Ube’e ginötö khöda ba wamaehagö sanandrösa ba wehede ma ngaroto wehede sadogodogo ma ngawalö ayati sifatöfa khöda samösa moroi ba wombaso Buku Ni’amoni’ö si no tarongo ba ni’erönuisida ba ginötö ia da’e. Hana wa fehede andre fatöfa ba dödögu...?
· Tetötöna khöda, ena’ö tenga samalua khotbah ita ma sama’ema famahaö fa’aboto ba dödö ita ba niha bö’ö ma zui fahuohuosa ba nawö; ba hiza’i, tafatunö sanandrösa ba ngawalö zalua nirasoida ba wa’aurida samösa.
6. MAMATUNÖ NGAWALÖ HALÖWÖ SEDÖNA TAFALUA BA NIKAONI LOWALANGI ITA BA WAMALUA YA’IA
Sondrӧnia’ӧ: Ihalӧ gamarahuta gohitӧ dӧdӧ moroi ba waosatӧ duho walukhata fakhai ia ba wombaso Buku Ni’amoni’ӧ si no muhonogӧi.
Ira ama, ina, ba talifusö ni’omasi’ö.
Tuho sebua Aksi Puasa Pembangunan (APP) döfi 2022 ya’ia da’ö: MANGEHAOGӦ MANGAWULI FA’AURI (Sifasui lӧ wӧkhӧfӧkhӧ, Ngambatӧ Ohauhau dӧdӧ). No ta’erönusi duho sebua andre ba zi 4 falukhata ba zi no numalö sanandrösa ba dahataha ba wangehaogö mangawuli fa’auri ba ginötö wökhö korona-19 andre, da’e no ohitö dödöda ma’afefu ena’ö tola auri ita bakha ba lala wa’auri sibohou, si no modanedane bakha ba wamati niha keriso. Ba da’e, tekaoni ita ba wamalalini era’era awö wa ta’oigö dödöda ba wandrou’ö wa’asökhi zi fasui ya’ita, ena’ö lö wökhöfökhö, irege tasöndra wa’omuso dödö ba fa’ohauhau dödö bakha ba ngambatöda. “Moroi ba da’ö, bakha ba wa’auri niha sato ba zi sambua orahua ba simanö göi ba wa’auri niha ero zamösana, tola tefönui wa’amohadu wa’aurinia” (Gaudium et Spes [GS] 26). Fa’auri ba wa’ohauhau dödö tola tesöndra ia na fefu ngawalö zoguna ba niha tola tefenui, he soguna ba mboto ba simanö göi zoguna ba noso, börö me ohitö dödö safuria ba wa’ohauhau dödö sabölö ebua ya’ia da’ö Lowalangi samösa. (Konpendium Ajaran Sosial Gereja [K.ASG] 170).
Börö ngawalö wökhö korona ba ginötö si so ya’ita iada’a, lö tola lö’ö oya ngawalö tahataha ba lala halöwö nifaluada ba nahia bö’ö ba aoha sibai göi ba niha ba wa’aekhu bakha wa wa’ato’ölö si lö sökhi. Börö ngawalö wökhö andre, tola manö ba zisamösamösa niha lö ifalua zi to’ölö si sökhi sasese ifalua. Fa’ato’ölö si sökhi ba wangehaogö nahia ena’ö lö oya ngawalö da’unö, no göi sambua halöwö bakha ba wamati, andrö moguna tarorogö wa’asökhi zi fasui ya’ita, irege tola te’oroma’ö wa’asökhi andrö ba gotalua niha bö’ö. Nahia ba zifasui ya’ita lö tesöndra ngawalö wökhöfökhö na ba zifasui ya’ita andrö sökhi ba mo’adu, börö oya nasa geu awö zinanö solohe nangi si sökhi (=oksigen) ba lö tesöndra ngawalö zasao. Baero wananö geu ma sinanö andrö, tola göi sökhi nahia ba zi fasui ya’ita andrö na asese ta’ehaogö nahia andrö, ena’ö lö tesöndra ngawalö dungö ma (=bakteri atau virus) solohe fökhö ba mboto niha.
Ba wamalua sifao fondrorogö fa’auri ba wa lö wökhöfökhö, lö moguna mangiwa dödöda awö wangerangerada irege botoda andre tola tefa’anö ba wanörö ngawalö fa’abasaki ba ginötö wökhö andre. Sambua lala nitörö sabölö moguna ya’ia daö mo’angenanöi (=mencegah) ya’ia daö mamalua gamuata wa’auri si sökhi sifao fangehaogö nahia si sökhi ena’ö lö wökhöfökhö. Oya ngawalö zinangea tafalua, ya’ia da’ö:
1. Faduhusi tödö ua wa ya’ita samösa lö mofökhö na edöna ita mofanö ba nahia bö’ö ba abölö sökhi na ta’oguna’ö honda ma moto si so khöda zamösana.
2. Ta’a gö si sökhi. Ba ngawalö gö ni’ada, manötöna ita wa tesöndra khönia ngawalö Vitamin C ba Vitamin E sitola mondrou’ö fa’ataha mbotoda moroi ba ngawalö wökhö.
3. Talau olah raga. Fa’asese wamalua wamadögö mboto ma (=olah raga) tola itahaini wökhö sedöna möi bakha ba mbotoda. Famalua ba wamadögö mboto andre ma olah raga tenga ha baero ba nomo mufalua, tola göi bakha ba nomo ma ba golayama nomo.
4. Abölö sökhi na tabe’e mböli ni’ölida tenga faoma kefe karate (=non tunai) ba hiza’i abölö sökhi na tola mufa’ema ba bank (=transfer). Na no tatema ba tagogohe gefe andrö moroi ba niha bö’ö, moguna tasasai dangada faoma handsanitizer.
5. Fa’asese manasai danga. Na möi ita ba nahia niha sato, simane ba gödo, nahia wamawa, nahia wemanga, abölö sökhi na tasasai dangada fondrege wa’ara 20 deti, faoma sabu ba idanö sangele, da’e moguna sibai ba wofa’ala ngawalö dungö si falemba ba dangada. Tasasai dangada faoma handsanitizer na lö hadöi fanasa danga si no tohöna so ba nahia andrö. Abölö sökhi na ta’ohe handsanitizer gofu heza möi ita ba tahenagö ba tasi side’ide ni’oheda.
6. Böi tababaya zikhalada ma mbawada. Fa’ato’ölö ba wombambaya hörö, ikhu ba bawa tola göi tobali lala we’amöi dungö korona bakha ba mbotoda. Andrö moguna mu’oguna’ö folosi (=tissue) si lö ta’unö.
7. Famake balubalu mbawa ba ikhu (=masker). Tungö korona tola fatöfa ia ba tefetefe nidanö sikalua na inötö mo’eha, bahö, mazui na fahuhuo ita. Börö da’ö, na tafake masker, no göi tandra soroma ba wondrorogöda niha bö’ö, irege tola te’efa’ö ia moroi ba ngawalö wökhö si so ba mbotoda. Ato zi sala ba wangoguna’ö masker, dumadumania labokai masker na ero fahuhuo ira.
8. So ginötö ba wolombase. Inötö ba wemörö abölö sökhi na 7 irugi 8 za ero ma’ökhö, irege tola tedou’ö wa’abölö ba mbotoda ba wanahaini ngawalö wökhö. Ba böi talafo alawa mbongi wemöröda.
9. Fo’eha ma bahö satulö. Böi taduhö mbawada faoma tangada na inötö mo’eha ma bahö ita, ba hiza’i oguna’ö tissue ma sapu tangan ma taduhö mbawa faoma fatöfatö dalinga zi’u.
10. Tarorogö wo’ehao ba zifasui ya’ita. Ba ginötö da’e, oya mufalua wo semprot singa nomo faoma famunu dungö. Ba nomo, abölö sökhi na mubözini (=mengepel) daluzalo nomoda ero ma’ökhö. Ta’oguna’ö dalinga zi’uda ba wobokai mbawa ndruhö faoma ba wohöndrögö numero lift ba ta’ehao ngawalö fakake ni’oguna’ö ba sasese tababaya faoma tangada faoma disinfektan, simane lohelohe danga mbawa ndruhö, lohelohe dangan kulkas, leholohe danga ba nora lote, hand phone, sörömi hörö, tasi, meza, kurusi, btn.
11. Böi möi ba gotalua niha sato ba tazago wa’afandröndröu ba gotalua niha bö’ö. Otaluada ba niha bö’ö si lö’ölö’önia 1 mete. Tazago wa’afatöfa dangada, ena’ö böi fara’u tanga, börö me tola fatöfa dungö ba dangada na talau fara’u tanga.
12. Na no tarugi nomo, talau mondi ba tasasai nukha nifakeda. Böi tababaya ba fatöfa ita ba nösi nomoda fatua lö tasasai ita.
Ira talifusö ni’omasi’ö.
Bakha ba zura Roma 12:1-8 si no tabaso no mege ba si no tafosasi ba si no tefaehagö khöda ero zamösana, wa i’ombakha’ö khöda Faulo, wa niha si no manema fangorifi andrö, so khöra wa’auri sifaehu moroi ba zi to’ölö, ya’ia da’ö so wanaha tödö ba lö fagölö simane ba wa’auri niha ba gulidanö andre ba hiza’i, ha sambua boto ba khö Keriso, ena’ö mufasömba’ö mboto andre tobali fasömbata sauri, ni’amoni’ö ba sinangea ba khö Lowalangi, me da’e lala ba wangowasaini fa’auri sindruhu. Moroi ba da’ö, datafasömba’ö wa’aurida andre tobali fasömbata sebua bakha ba lala halöwö ba khö Lowalangi ba wangöhöli ba wa’alö mofökhöfökhö ba ba wa’ohauhau dödö ba niha gulidanö. Irege ba wamatida andrö tenga ha ba wanema buala Lowalangi, ba hiza famati andrö ba wolohe famohouni wangerangera ba fa’atuatua, andrö moguna tafasömba’ö wa’aurida sifao fohalöwö ba khö Lowalangi.
Tandra soroma moroi ba mbuabua wamati andrö ya’ia da’ö, famalua fangowasaini fa’auri sindruhu ba te’orama’ö ia bakha ba ngasi wa’auri niha sifaduhu tödö khö Keriso (fah. ayati, 3).
Börö da’ö, so 3 duho si lö tola lö’ö mufalua ba wa’auri andre:
1. Ya’ita no ndrotondroto moroi ba niha bö’ö ba sifagölö tanö föna Lowalangi hewa’ae fabö’öbö’ö wa’atuatua ba hasambua ba khö Keriso.
2. Buala Lowalangi andrö tefalua sifao famati, hewa’ae oya wa’onekhe ba fa’abölö si fabö’öbö’ö ba hiza tenga mu’irö’ö ma mu’oguna’ö ba khöda samösa, ba hiza no I’amualagö khöda Lowalangi ena’ö tola ta’oguna’ö ba wanolo niha bö’ö. “famalua fa’ahakhö dödö, fangobadödöi ba fo’ame’egö tödö” (LS 231, 58).
3. Mamalua sifao fa’ahele dödö, fangodödögö ba sifao fa’omuso dödö.
Börö da’ö, lala wangalui sitola lafalua dozi ngambatö oya sibai, iada’a hewisa ita ba wamalua halöwö andrö ba moguna tafaigi hadia zabölö adöni dödö niha ba lala halöwö andrö. Töratöra ba ginötö dungö wökhö korona-19 ba zi so ya’ita iada’a, oya manö ngawalö wanolo nibe’e famareta, dumadumania: BLT (bantuan langsung tunai) ba BST (bantuan setor tunai), ba hiza itaria ita hatatema manö, lö ta’alui lala ba wangoguna’ö ya’ia ba wondrou’ö lala halöwöda. Moroi ba da’ö, data’oguna’ö ginötö si sökhi andre ena’ö moroi ba lala halöwö nifaluada, tola tasöndra mbua si sökhi ba so khöda göi wangodödögö. Oya ngawalö lala halöwö si tola tafalua bakha ba ngambatö ya’ia da’ö:
1. Lala wangalui sitola mufalua ba wohalöwö ba danö (fo’urifö ba fananö sinanö). Lala wangalui da’e sökhi na tefalua ba mudou’ö, börö me lala ba halöwö andre, mo’amakhaita sibai ia ba ngawalö zoguna ni’oguna’ö niha ero ma’ökhö, dumadumania:
a. Manga’asogö tanömö zinanö (=bibit tanaman) si sökhi. Ba wamawa ba ba wanga’asogö tanömö zinanö andre tenga halöwö saoha töratöra börö me lö irai tababaya ia. Ba hiza tola tafaguru’ö ita khö ndra sohalöwö ba wamareta (=penyuluh pertanian) ma ba niha sogonekhe ba danömö zinanö, ma zui tola ta’alui ba tafaguru’ö ita moroi ba internet ma Youtube.
b. Lala halöwö ba ngawalö zinanö sifao lala nifalua ba wananö zinanö andrö (simane fananö sayu ba ngawalö zinanö sowua). So mato hauga ngawalö zinanö sitola mutanögö, ya’ia da’ö: salidi, lada, sawi, höwa, lidah buaya, selada, la’izu, föria, brokoli, tomat, semangka, dima, melon, apel, anggur, btn. Fefu ngawalö sayu ba sinanö sowua andre omasiö niha sato, börö me sökhi ba ta’oguna’ö ia soguna ba mbotoda. Ba wananö sinanö andre tola tatanögö ia ba pipa (=sistim hidroponik) lö moguna danö sebolo ba hiza ba nahia side’ide ba zinga nomoda tola tatanö zinanö da’e.
c. Fanga’asogö ba fangehaogö ngawalö zinanö si sökhi ba adöni dödö niha (=Budidaya tanaman hias). Ba wanga’azökhi zinanö so bowo mbunga andre, tobali sambua lala wangalui ba same’e hare sebua börö me ato niha zadöni tödö khönia, dumadumania: anggrek, mawar, bonsoi, bunga kertas, suplir, pucuk merah, bunga keladi, janda bolong (monstera), lidah mertua, tanduk rusa, kaktus, kuping gajah, puring, bunga sri rejeki (aglaonema), bunga kenanga, sedap malam, melati, anthurium, bunga niana, bunga walisongo, bunga kalifah kuning, begonia, calathea, bunga alocasia, bunga sakura dan bunga gelombang cinta, btn.
d. Fanga’asogö ba fangehaogö sinanö sitobali daludalu ma Toga (=tanaman obat keluarga). Sinanö da’e tola tobali daludalu ba tola göi mufamawa, ba tola mutanö ba zifasui omo, ba nowi ma ba kabu. dumadumania: Temulawak, Kencur, Lahia, Undre, Asam jawa, Alvukat, Alang-alang, Bakung, Bayam duri, Belimbing manis, Brotowali, maziambu, Lidah buaya, Sogambi mao, Daun sambung nyawa, Daun jinten, Bawa soyo, Bawang dayak, Cocor bebek, Daun ungu, Delima, Mengkudu, Sereh wangi, Sirih merah, btn.
e. Lala halöwö ba wo’urifö. Na so nahia ba zifasui ya’ita si lö mu’oguna’ö, tola ta’oguna’ö ba wo’urifö, simane: mamaliaro manu, bawi, zawi, öröbao, nambi, bakhu, i’a nila, i’a mas, ba tanö bö’önia. Na so khöda wangodödögö ba fa’endroro, tola tedou gurifö andrö ba tola mufamawa, irege tobali lala ba wondrou’ö wangaluida.
f. Lala halöwö ba ngawalö zinanö si tola ni’a. (fakhe, rigi, gowi balanda, gowiria, gowi, saku, btn). Ngawalö zinanö andre tola mu’a soguna mba mboto ba tola göi tobali lala wangalui na mufamawa.
2. Lala wangalui sitola mufalua ba ngawalö wogale ma ba waniaga. Ngawalö waniaga andre asese sibai lafotöi ia fogale, ya’ia da’ö famawa ba fowöli ma tola göi tefotöi ia sama’ema. Oya lala halöwö ba da’e zi tola tefalua ero sambua fongambatösa, dumadumania:
a. Lala halöwö ba wamawa ngawalö mbua zinanö. Ngawalö ni’oguna’ö soguna tobali ö si’ero ma’ökhö lö manö i’ila mo’aetufa börö me soguna bongi ma’ökhö si lö tola lö’ö mu’asogö. Ba zimanö moguna la’alui zamawa ngawalö mbua zinanö si sökhi ba tola lataba’ö mböli ba wa’alio, irege niha sowöli lö khöra fa’atebulö wangerangera ba lö mo’aetufa wowölira. Töratöra na ya’ia samösa zokhö ngawalö zinanö andrö, tola manö fabali hare ba wamawa.
b. Lala halöwö ba wamawa pulsa Hp, paket internet, btn. Tola göi ta’oguna’ö ginötö andre ba wamawa pulsa ba simanö göi ba wamu’a ngawalö hadia ia irege tola tasöndra hare.
c. Lala halöwö ba wamokai lafo kofi. Haniha zi lö omasi kofi? Tola manö fefu niha ba omasi. Foko ni’a’asogö ba wamazökhi lafo kofi ba no ide’ide, ba hiza na lö mamalö la’ondrasi niha sowöli, si lö tola lö’ö tola lasöndra hare irege tobali juta. Nahia ni’oguna’ö göi lö moguna muhaogö sibai, me tola la’oguna’ö falefale nomo si tola mubali’ö nahia si sökhi ba ohahau dödö niha sowöli, irege omasi ira mudadao ba wangalui nangi si sökhi.
d. Lala halöwö ba wamawa fanikha hondra, btn. Lala halöwö andre ba no nönönönö lala halöwö, andrö moguna muhönagö ma to ha’uga boto wanikha hondra, ba labe’e ba nahia sino lahönagö sahatö ba ngai lala tanö föna nomo ba tola göi labokai nahia wamawa wanikha hondra side’ide simane (pertamini). Ba zimane da’e, sowöli ma sangoguna’ö hondra tola tetoloni.
e. Lala halöwö ba wamawa idanö sauli nifo’ösi. Sangoguna’ö idanö nibadu ba si sökhi lö mo’aetufa. Tola ta’oguna’ö nahia ba ziföfö nomo si lö mu’oguna’ö ba wama’anö naha nidanö andrö, ba tola göi lafatunö wa tola lafasao ba nomo. Lala halöwö tanö bö’ö ba ya’ia wanga’azökhi nahia wangehaogö idanö nibadu (=depok air minum).
f. Lala halöwö ba wamawa baru ndraono. Ba lala halöwö andre, tola manö ta’öli moroi ba zokhö sogale sebua, börö me ide’ide mböli na mu’amawa mangawuli irege tola tasöndra hare sebua.
g. Lala halöwö ba wamawa zoguna ba wohalöwö ba danö ba soguna ba wanguri urifö. Na toröi ita ba gotalua niha danö, lö fasala na labokai lafo soguna ba wamawa ngawalö zoguna ba danö, hiza no sambua ndrela ba wotundreheni ndra niha sohalöwö ba danö, mendrua manö ba ngawalö halöwöra ba wamokai laza ba ba wangehaogö kabu zinanö. Moroi ba da’ö, tola ta’amawa ngawalö zoguna, simane tanömö zinanö, pupu zinanö, daludalu ndru’u ba föla ba ngawalö gamagama ni’oguna’ö niha ba wohalöwö ba danö.
3. Lala halöwö so’amakhaita ba mböli gölö. Hadia lala halöwö si so böli gölö sinangea tola tobali lala halöwö wongambatö? Hewa’ae mu’oguna’ö wanoloni niha bö’ö same’e fa’abölö ba wanoloni andrö ena’ö tola tebönökhi ba mo’ofanöwa lala halöwönia. Dumadumania:
a. Lala halöwö ba wamasao iraono ba sekola. Lala halöwö simane da’e ha niha sitola lafaduhusi tödö ira satua ndraono zi tola mamalua ya’ia. Ba zimanö tola lafalua wame’e böli gölö ero sara wawa ma ero samigu ba wamasao iraono ba sekola andrö.
b. Lala halöwö ba wame’e nifiza honda ma moto sifao böli gölö. Böli gölö ba wame’e nifiza moto ma honda no sambua lala halöwö sondröni dödö. Lala halöwö da’e ba tola lafalua wahasara dödö ba niha bö’ö somasi mondröi motonia ma hondania ena’ö tola lafafiza’ö sifao böli gölö ba zi sambua nahia si no tafazökhi.
c. Lala halöwö ba wanagu nukha. Na so nekhenekhe danga simane fanagu nukha, abölö sökhi na böi labali’ö zayazaya gölö börö me böli gölö ba wanagu nukha itugu tedou, töratöra na la’a’la’a nukhania tola tamane abua ba la’a’la’a sibohou.
d. Lala halöwö ba wanasa nukha. Ato sibai niha iada’a omasi sibai ira la’alui lala saoha ba gofuhadia ia lala halöwö simane fanasa nukha. Ba lala halöwö andre si lö tola lö’ö ta’okhögö gamagama ba wanasa nukha, tarika nukha, btn; sifao nahia si no tehönagö ba wamalua lala halöwö andrö. Na tafalua lala halöwö andre sifao fa’asökhi ba itugu ato niha same’e khöda ba wanasa nukha.
e. Lala halöwö ba wamaha’ö iraono. Moguna mafaehagö wa’atuatua si no mu’okhögö. Simane, na no tama ita moroi ba wamaha’ö ba Bahasa Inggris, ba zimanö tola labokai nahia ba wamahaö iraono so’amakhaita ba Bahasa Inggris. Ba zitambai da’ö tafaha’ö niha ba Bahasa Inggris, ba zimanö göi tola tasöndra gefe.
f. Lala halöwö faguti mbu. Lö oya zinangea mufa’anö ba hiza tola möi fondröni dödö. Da’ö wehede sifaudu ba niha sonekhe faguti.
g. Lala halöwö ba wamu’a rekening listrik. Ba da’e si lö tola lö’ö tafasura’ö döida tobali agen ba gödo sangohalöwögöi da’e.
h. Lala halöwö ba wamaha’ö computer ba foto copy. Foko ni’oguna’ö ba da’e ba ya’ia wa’atuatua ba wangoguna’ö computer ba fotocopy, simanö göi foko ba wowöli computer ba fotocopy, ba simanö göi gamagama tanö bö’öniana. Na mubokai nahia halöwö andre abölö sökhi na lö aröu moroi ba zinga gödo wamareta ma ba zinga sekola.
i. Lala halöwö ba wondrino gö ba ngawalö gamagama gangowuloa (simane tedra, fangebua li, kibo btn). Lala halöwö ba wondrino gö tola tamane lö mo’aetufa, tehöngö wa aoha lala halöwö ba sökhi göi wangehaogö. Ba itugu adöni dödö na fao göi gamagama ni’oguna’ö ba ngawalö gangowuloa simane zoguna na’alua walöwa.
j. Lala halöwö wangehaogö mbu. Ba wamalua sambua fangowalu tatu manö la’oguna’ö niha sosasa mbu ba ma samo kase.
k. Lala halöwö wanasa honda ba moto ba fabeke. Na sökhi lala halöwö, ohahau ba baga, ba itugu ato niha somasi mame’e khöda honda ba wangehaogö ba simanö göi ba wanasa honda.
l. Lala halöwö wame’e famaha’ö ba wohalöwö ba danö. Fa’atuatua ba nekhenekhe danga si no mu’okhögö tola mufalua ba niha sohalöwö ba danö ena’ö abölö tedou wa’atuatua ba wangoguna’ö danö si no tohöna so andrö, irege tola tesöndra mbua si sökhi ba soya.
m. Lala halöwö ba wame’e nifiza gamagama wohalöwö ba danö sifao böli gölö. Gamagama ni’oguna’ö ba wotundreheni fohalöwö ba danö simane traktor, gamagama ba wananö sinanö ba gamagama sanotogö ulitö moroi ba ngalai wakhe ba gamagama bö’ö. Na tola ta’asogö fefu da’e, irege tola manö tetoloni zohalöwö ba laza ena’ö aoha ba alio lala halöwöra.
4. Lala halöwö tanöbö’ö na. simane nekhenekhe danga, dumadumania: nekhenekhe danga ba wamazökhi nukha, bunga moroi ba garate ma nukha, bua gati’ati, mamazökhi gezoi likhe, ezoi mbatö, fangezosi gahe moroi ba zawu mbanio, naha mbunga moroi ba gaolo gaolo moto satua, btn. Na ta’okhögö wa’atuatua ba nekhenekhe danga andre no sambua lala halöwö si sökhi. Lala halöwö da’e ba fokonia ide’ide ba gamagama ni’oguna’ö tola tahalö moroi ba gamagama si lö sa’ae mu’oguna’ö. Gamagama ba wamobörönia si lö mu’oguna’ö ba tola labali’ö ia tobali sökhi ba tola göi ebua mböli na la’amawa.
Ama Ina ba Talifusö ni’omasi’ö.
Ba zi sambua lala halöwö nifaluada, foko ma kefe ni’ogua’ö no tobali sambua tahataha ba fanaisi wangerangera ba wanohugö ba ba wangebua’ö lala halöwö side’ide ba lala wangalui bakha ba wongambatösa, ba da’e te’abölö’ö ita ena’ö tola tafazökhi lala wa’auri sibohou. Bakha ba wamaha’ö Gereja iwa’ö: mamazawagö lakhömi niha, bonum commune (soguna ba sato), abölö ahatö ba niha sinumana, sangobadödöi ba so’angeraigö sabölö moguna. Lohelohe wamaha’ö Gereja andre zame’e sambua mbuabua wamalalini era’era, ena’ö tola tetoloni ba te’abölö’ö nawöda niha, irege tesöndra wa’aro dödö, fa’atulö dödö, fahasambua wangerangera, fa’afagölösa mbosi sifao fa’asökhi dödö faoma fatambai. Ba sifao fo’erunusi Daromali Lowalangi si no tabagisi no mege ba nawöda, andrö tefarou dödöda ena’ö sifaoma ita ba wa’atobali ngoningoni, mangoroma’ö gangilata, mamaduhu’ö sindruhu, mame’e famaha’ö, mombagisi si no murasoi ba wa’auri, mame’e menemene ba tobali sondronia’ö sowölö’ölö ba safönu fa’ahakhö dödö sifao fondrorogö fa’auri, ena’ö te’aröu’ö ita moroi ba ngawalö wökhöfökhö ba ba gafuriatania tola tasöndra wa’ohauhau dödö moroi ba ngawalö lala halöwö nifaluada irege tobali fangomusoi’ö dödö bakha ba wongambatöda ero zamösana. Ba fefu nifaluada da’e ya tobali famolakhömi Lowalangi. Amen.
· Hadia halöwö si bohou si tola tafalua ba wangorama’ö Turia Somuso Dödö bakha ba migu andre...?
· Haniha zamalua? (owuloa haniha) ba hadia nifalua, hezo nahiania ba ha’uga bӧzi..?
· Fangowuloi Kolekte Solidaritas: Sinunö Laudate No. 51.
7. FANGANDRÖ SITUMBU MOROI BA DÖDÖ
· Tebe’e khöda ginötö ba wangandrö situmbu moroi ba dödö
(tani ni’angandrӧi ma fangandrӧ niha samati)
S : Datafa’ema gangandröwada khö Lowalangi si lö’adagedage ba wamondrondrongo gangandröwa dödö soiNia:
1. Soguna ba niha fefu sorasoi fa’ata’u ba ginӧtӧ dungӧ wökhö Korona-19
He Lowalangi Ama sokhö banua siyawa awö danö, TaromaliMö si no mafondrondrongo ma’ökhö andre no möi famasugi ba dödöma ena’ö tola mafasömba’ö mbotoma tobali fasömbata sauri, ni’amoni’ö, ba sinangea ba khöU. Ba zimanö he Ama mangandrö ndra’aga salahi niha sanizinizi tödö ba ginötö wökhö korona-19 andre. Ya Öbe’e wa’abölö khöra irege tola la’ila labohouni lala wa’auri ba ginötö andre sifao fa’afönu wamati ba fangöhöli si’oroi Ndra’ugö.
Ma’andrö khöU he So’aya ... Tehe wangandröma, he So’aya.
2. Soguna khӧ Famareta awӧ ndra Sohalöwö ba Medis sanoloni ira niha si gӧna tungӧ wökhö Korona-19
He Lowalangi fondrege zolomasi, no Ö’amualagö GehehaMö ba niha ena’ö tola so wangi’ila sifaudu molo’ö famati si no ma’okhögö, töratöra ba khö ndra famareta ba ba niha si no manoloni ba wamalua halöwöra ba we’amöi enoniU ba wamadöhö fökhö korona-19 andre. Ya lö mamalö te’abölö’ö ira, ba so khöra wanaha tödö ba wamalua lala halöwöra. Ya’öfahowu’ö ira he Lowalangi awö zoroiyomora bakha ba wa’omasi ba fondrorogöU.
Ma’andrö khöU he So’aya ... Tehe wangandröma, he So’aya.
3. Soguna ba niha samati ba Stasi ba KBG khöda
He Ama, ya Ö’amualagö bakha ba dödö soiMö si so ba stasi ba ba KBG andre, fa’aboto ba dödö ena’ö sifaoma ndra’aga ba wanoloni awöma ba sifao fangobadödöi nawöma niha sifao fa’abölö ba fa’atuatuania ba wamalua halöwöma sifao fa’ahele dödö. He So’aya, ya Öfahowu’ö fefu zoroiyomoma sifao nahia ba zifasui ya’aga, ena’ö tola marorogö wa’aurima irege tola te’aröu’ö ndra’aga moroi ba ngawalö wökhöfökhö ba tola göi itugu te’abölö’ö ndra’aga moroi ba ngawalö lala halöwö nifaluama, irege tesöndra wa’owuawua dödö ba zifasuima ba ba zoroiyomoma.
Ma’andrö khöU he So’aya ... Tehe wangandröma, he So’aya.
4. Soguna ba ngawalö gangandröwa dödö ba ngambatöda zamösana
He Ama, abölö’ö ndra’aga ba wamalua ohitö dödöma si no ma’angeraigö bakha ba wa’owuloma andre, ya’ia …
· Datarahugö fefu gangandröwada andre ba wangandrö si no Ifaha’ö ya’ita Yesu Keriso, wanguma’ö: He Ama khöma ...
· Fangandrö Fangasiwai sifao Fangandrö Howuhowu Zo’aya.
He Ama Lowalangi, mafuli ma’andrö saohagölö ba mafaehagö wanuno khöU börö howuhowuMö si no marasoi sagötö ba wa’owuloma andre. Iada’e no aboto ba dödöma wa lö mamalö moguna mabohouni ba marorogö wa’aurima sifao su’asu’a wamatima si ha sambua bakha ba mboto Keriso. Ya howuhowuMö he Lowalangi si no Ö’amualagö khöma fefu, tola mafalua ia ba we’amöi enoniU, ba te’oroma’ö gangilata khöma ba mafaduhu’ö zindruhu, mabe’e wamaha’ö sifao menemene ba tobali ndra’aga sondronia’ö sowölö’ölö sifao fa’afönu fa’ahakhö dödöU. Ba ya lö göi mamalö Öfahowu’ö fefu ngawalö lala halöwöma mendrua manö ba ginötö si so ndra’aga ba wökhö korona si no manöröi ulidanöma andre. Mamati ndra’aga ba faduhu dödöma wa lö mamalö Örorogö ba Ötuturu khöma lala ba wondrorogö lala wa’aurima sero ma’ökhö irege lö mamalö so ndra’aga bakha na wa’omuso dödö ba fa’owuawua dödö si’oroi Ndrau’gö. Simanö gangandröwama sifao fama’ema Keriso So’aya ya’aga. Amen.
Sinunö Fangasiwai: Laudate No. 48.
0 comments:
Posting Komentar