Fangowasaini Luo Zo'aya

FANGOWASAINI LUO ZO’AYA

LUO MIGU SI XIX

FAMOBÖRÖ

Sinunö:  LAUDATE No 3;

TANDRA RÖFA

Son.:    Ba döi + Nama ba Ono ba Eheha Ni’amoni’ö.      

Sato:    Amen.

 

Son.:    Ya nisuno döi Zo’aya.                                              

Sato:    Iada’a ba irugi zi lö aetu.

FEHEDE FAMASAO

Son.:    Ya'ami ira talifusö, ma'ökhö andre ta’owasaini Luo Migu sito’ölö si-19. Ta’owasaini da’e ba nomoda zamösana tenga börö wa lö omasi ita fariawö ba nawöda samati tanö bö’ö ba hiza börö wökhö covid-19 so’anöröi ulidanö. Börö wamati sahasabua ba fa’afaduhu dödöda ba khö Keriso, andrö wa lö mamalö te’osambua’ö ita ba niha samati fefu. Famati satulö ni’amu’alagö Geheha Ni’amoni’ö andrö zanga’aro’ö dödöda ba wamati khö Keriso andrö. Börö da'ö, data'ondrasi Lowalangi moroi si'aikö ba dödöda.

Ba si'oföna sibai data'andrö wangefa horöda.-                                             (inötö wa'ahono)

 

LITANI - FANGANDRÖ FANGEFA HORÖ

 

Solo:    He So'aya, Yesu Keriso, no Ökaoni ndra’aga ba wamasao ya’aga khö namaMö andrö.- 

            (So'aya, hakhösi tödö ndra'aga.)

Tenga ana’a ba tenga firö Öbe’e hölima, ba hiza doMö andrö niduwagö ba röfa.- 

(Kristus . . .)

No Öbali’ö ere Ni'amoni'ö ndra’aga, ena’ö mafasömba’ö wasömbata fanuno soroi Geheha.- (So’aya . . .)

Son.:   Ya böi öfaigi horöma, he So’aya, ba heta golalöwama fefu. Ya Ö’ohahau’ö dödöma EhehaU, ena’ö maturiaigö lakhömiU, iada’a ba irugi zi lö aetu.   

U :        Amen.

SINUNO FANUNO LAKHÖMI      : LAUDATE No. 146

FANGANDRÖ FAMOBÖRÖ

Son.  Damangandrö ita.-

He Lowalangi si lö ambö fa'abölö ba si lö mamalömalö, lö aiŵö ndra'aga na makaoni Ama khöU, börö me no Ösou ndra'aga tobali onoU ba no Öbe'e khöma GehehaMö andrö ni'amoni'ö.

Ya Öbe'e tedou ndra'aga ba Geheha andrö, ena'ö sinangea ndra'aga ba wanema ondröita andrö dania, si no Öfabu'u ba zangomasi'ö Ya'ugö.-

Simanö gangandröŵama nifa'ema Zo'aya ya'aga, Yesu Keriso, OnoU sauri ba samatörö awöU, ba wa ha sambua khö Geheha Ni'amoni'ö. Ya'ugö Lowalangi götögötö wa'ara.-

U.      Amen.

LITURGI TAROMA LI

Fombaso si sara:

Taroma Li Lowalangi

nihalö moroi ba zura Razo si sara

 

Me luo da'ö, isaŵa danö si mate Elia, sama'ele'ö andrö,

ma'ökhö fofanö, ba möi mudadao ba mbörö da'uli

ba omasi ia mate.

Imane : "Noa sa'ae ! Halö sa'ae nosogu, he So'aya.

Lö si sökhi moroi khö ndra tuagu ndra'o."

Awena ifadölö tou ia ba mbörö da'uli andrö ba ilau mörö.

I'ozumagö ituko ia samösa mala'ika, imane : "Faoso, lau manga !"

Me ifakhölö ia Elia, ba hiza, tanö ba högönia roti nibogö, sagörö,

ba sambua migö nidanö. Manga ia ba ibadu nidanö

ba ifuli ilau mörö. Ifuli so mala'ika Zo'aya, ituko Gelia,

imane : "Faoso, a göu ! Aröu sibai nasa döröŵau !"

Maoso Gelia, manga ia ba ibadu nidanö.

Awena mofanö ia ba wa'abölö gö andrö,

öfa wulu ngaluo ba öfa wulu mbongi,

irugi hili Lowalangi andrö, Horebi.- (1 Razo 19:4-8)

Simanö daroma li Lowalangi.-

Sato : Ma'andrö …

 

SINUNÖ FANEMA LI : LAUDATE No 92A, 1-2

Fombaso Si dua:

Taroma Li Lowalangi

nihalö moroi ba zura Waulo

ba niha samati ba mbanua Nefeso.-

 

Ya'ami ira talifusö !

Eheha Lowalangi si no so khömi, da'ö zi tobali tandra,

wa tana khö Lowalangi ami. Ya'ia göi we'ewe'e dödö khömi,

wa I'asiwai wangorifimi Lowlangi ba ngaluo si no Ihonogöi.

Börö da'ö, böi mibusi dödö Geheha andrö.

Miheta ba gotaluami fefu ngawalö watötöisa ba fa'abao dödö

ba fönu. Böi sa'ae faguagua ami ba falelelele.

Böi so sa'ae wa'afatuwu awö danö bö'ö simane da'ö.

Ba zi tambai da'ö, ya faoma sökhi dödömi                   

ba mihaogöhaogö li khö nawömi ba faoma mi'efa'ö zala nawömi,

simane fangefa'ö Lowalangi khömi göi ba khö Keriso.

Ya'ami ba no ono omasi'ö khö Lowalangi.

Börö da'ö lö tola lö'ö mi'oigö dödömi wolo'ö tulada Lowalangi :

Mitörö lala wa'omasi andrö, simane fangomasi'ö Keriso ya'ita.

No Itehegö Ia salahida,

si tobali fasömbata sedöna dödö Lowalangi.- (Ef 4:30-5:2)

Simanö daroma li Lowalangi.-

Sato : Ma'andrö …

 

SINUNÖ FÖNA INJIL : PSALLITE No 263   (ma Laudate No 92, 3)

 

INJIL

Turia Somuso Dödö khö Yesu Keriso nisura Matai'o.-

 

Me luo da'ö, mukökökökö niha Yahudi khö Yesu,

börö me no Iŵa'ö : "Roti soroi zorugo Ndra'odo andre."

Lamane : "Hadia tenga Yesu da'ö, ono Yosefo ?

Ma'ila nama awö ninaNia.

Hana wa Iŵa'ö : Moroi ba zorugo U'otarai ?"

Imane khöra Yesu : "Böi mukökökökö ami !

Samösa lö si möi khöGu niha, na tenga AmaGu,

si no mamatenge Ya'o, zamasao ya'ira khöGu.

B a U'orifi ira dania ba luo safuria andrö.

No tesura ba zura ndra sama'ele'ö :

Nifahaö Lowalangi ira fefu dania.

Tobali, fefu niha samondrongo khö Nama ba si möi nifahaöNia,

da'ö zi möi mangondrasi Ya'odo.

Ba tenga da'ö geluaha, wa so niha si no irai mangila Ama.

Ha Si Samösa andrö si otarai Lowalangi,

da'ö zi no mangila Ama.

Amen, amen, Uŵa'ö khömi : niha si faduhu tödö khöGu

zanöndra fa'auri sindruhu dania.

Börö me Ya'odo roti same'e fa'auri.

Noa la'a Manna andrö ira tuami ba danö si mate,

ba hiza, mate ira sa'atö.

Ya'odo roti soroi zorugo, roti same'e fa'auri.

Niha si manga roti andrö, auri ia irugi zi lö aetu".-             Yoh 6:41-51a

 

Simanö duria somuso dödö khö Zo'aya ya'ita, Yesu Keriso.-

 

HOMILI

Fogati Homili, iada’a, inȏtȏ, fefu keluarga lafa’ema sambua ayati daroma li Lowalangi moroi ba nibaso mege sifaudu/sifagȏna ba dȏdȏra zamȏsana…

TUHO WAMATI      (LAUDATE, ba nga’örö 6)

 FANGANDRÖ NIHA SAMATI                                                                                Latuhi danö

 

Son.:    Ya nisuno Lowalangi, Amada, si lö mamalö molumö’ö iraonoNia ba si lö manimba angandröwara. Dafao ita fefu ba wamazawa fangandröda khöNia ba wa’afönu wa’aro dödö:

1.             He Ama solomasi, ya Öbe’e wamati saro awö wanaha tödö ba niha, dozi samati khöU, börö me no Ökaoniga fefu ba wa’aduhu andrö khöU. - (inötö wa'ahono)  Ma’andrö……

2.       he Lowalangi, Ya’ugö zamatörö tödö niha samatörö. Ya Öbe’e wa’atuatua khöndra sololohe negarama ena’ö lafazökhi goigoi si faudu molo’ö somasi’Ö.- (inötö wa'ahono) Ma’andrö……

3.      He ama fondrege zoböwö, ya Öfondrondrongo wangaröngarö niha si so ba wa’atosasa, si so ba wa’abu dödö sebua, ba he göi si so ba mbawandruhö wa’amate. Ya Öfatenge mala’ikaMö ba wangabölö’ö ya’ira fefu.- (inötö wa'ahono)        Ma’andrö…….

4.      He Ama si lö ambö fa’abölö­, ya öhöna khöma, si no owulo ba da’e, wamati ba wa’aurima ba ya Öfönui wanötönama ba halöwöma, he wa’ae lö asese mo’ölö halöwöma ba asese lö ma’ila hadia nilauma ba asese mangiwa dödöma. (inötö wa'ahono)   Ma’andrö……..

5.       Intensi khusus …. (ena’ö te’efa’ö ita moroi ba pandemi virus corona covid 19) …..

Son.:  He Ama Ni’amoni’ö, fao fangidengide’ö ma’andrö khöU: Höna khöma kharasiU ba böi aeduaedu farou dödöma ba wolo’ö oroisaU. Ya’örara dödöma ba zisagötö fa’aurima andre ba ya Ötehegö marasoi wa’ohahau dödö na furi. Simanö gangandröwama nifaema Keriso, So’aya ya’aga.-      

Sato:    Amen.

LITURGI FANÖRÖTÖDÖ WANGÖHÖLI

 

Na lafalua wangowulio ame’ele:                                                   Mudadao

KOLEKTE                                                                                                                   

Son.:    Iada'a ta'owuloi kolekteda soguna ba Gereja (soguna ba Gerjeja)

Manunö ita : LAUDATE No 60 ma 76.

Na no aefa kolekte, lahalö wangandrö:

Son.:    He Lowalangi ama khöma, OnoMö zangoroi’ö khöma ba wangowasaini fanörötödö Ya’ia. Omasiga faoga göi fao ba wasömbataNia ni’owasaini gofu heza ba gulidanö ma’asagörö. Tema dandra wa’omasima khöU andre ba nönö nasa wa’omasima andre khöU ba he göi khöndra talifusöma. Simanö gangandröŵama nifa'ema Zo'aya ya'aga.- 

Sato:   Amen.

 

FANÖRÖTÖDÖ WANGÖHÖLI YA'ITA                                     

Son.:    Ya'ami ira talifusö, noa sa ebua Lowalangi ba ngawalö halöwö fanga’asogö. Ba abölö na ebua Ia moroi ba wolauNia fangöhöli ya’ita. Iada’a datasuno Ia, börö wanuno Lowalangi sa tefo’ahonoa wa’owuawua dödöda.-

                Muzizio

Son.:    He Lowalangi si no fondrege Ni’amoni’ö, sidadao yawa wanunö Ndraono Gizara’eli andrö, nifolakhömi ndra Kerubi Serafi, no Ö’a’asogö hadia ia fefu:

            Sihaga soguna ba höröma, oho soguna ba hanuhanu, soroma ba si lö oroma. Larongo liU ira mala’ika ba mala’ika sebua si fitu. Döfi madala awö ngawawa ndröfi oi molayalaya tanöfönau ba oi öfatörö döira. Öfomaha wofo ba wehombo ba I’a ba wolangi.

            Öfarou mbunga awö ndru’u, ena’ö oya ba mowua. Öwöwöi ndra’aga, ya’aga niha, molo’ö famaedoU: samatörö ulidanö ma’asagörö. Öfa’ema khö ndra mala’ika wama’oli ba mbewema sinunö lakhömiU, ena’ö manunöga, wanguma’ö:

Solo:    Ni’amoni’ö...                         

Sato:    Ni’amoni’ö Zo’aya…….....

 

Son.:  He Lowalangi si no fondrege ni’amoni’ö, wa’ebua sa wa’atuatuaMö ba he fa’omasiU khöma, irege Öfatenge Daroma liU si lö aetu andrö, ya’ia NonoU si hasamösa, ena’ö ifa’ele’ö döimö andrö, wa Ama solomasi Ndra’ugö, safönu fa’ahakhödödö ba khöma si no elungu. No ötaögö wa’anumana ba wefao ba zinumana ba lö aiwö Ia orudu manga ba niha si so horö.

            Si no elungu ifuli I’alui ba si no faröi ba khöU, ba I’ohe mangawuli. Ilulu Ia ba döla röfa ba wangorifi ya’aga moroi ba horö ba ba wa’amate.

            Börö me moroi khö nono alawe sohauhau Itema mboto si tola tekiko, ba Lowalangi sa Ia simane Ya’ugö, irege me no itölö ia fa’amate ba Itayaigö wa’amate andrö ba Ifemöna wa’auri. Simanö lala watola tobali Ia ono sia’a ba gotalua niha fefu simaoso moroi ba wa’amate. KhöNia Öfa’ema wamobörö wanga’asogö si bohou.

          Ya Ötehegö khöma, he Ama, maturiaigö misteri NonoU andrö ba wangöhöli ya’aga, ba wanguma’ö:

Solo:   Dataturiaigö misteri Kristus.

Sato:  Maturiagö wa’amateMö, he So’aya, ba mafolakhömi wemaosoMö irugi mangawuli Ndra’ugö.

Son.:   He Ama ni’amoni’ö, me no awai halöwö si no Öhonogöi khö NonoU ba gulidanö andre, öfatenge Gehehau, ena’ö Ihalö zi so khö NonoMö andrö ba wanohugö manuriaigö Ya’ia ba wamasao niha samati ba zi duhu fefu.

           Ya’ia Geheha wa’auri, moroi khöNia mangele nidanö ngawalö kharasi. Ya’ia zanaro’o bakha ba GerejaU ba bakha ba dödö niha samati.

         Mangandrö Ia bakha ba dödöma ba wangaröngarö si lö alua baeha. Ifosasi wa’onekhe bakha ba Gereja ba I’orodugö ba danga zololohe ya’ia.

           Ya’ia göi daniazanusugi botoma salio taya andre, ena’ö tola mafolakhömi  Ndra’ugö sifao inama Maria, ira rasul ba niha ni’amoni’ö fefu götögötö wa’ara.

Sato:    Amen.

FANGANDRÖ  ZO'AYA            (LAUDATE, ba nga’örö 9)                                                         

Muzizio

Son.:    Iada’a, ira talifusö, data’osara’ö dödöda ba wanuno ba ba wangandrö niwa’ö Yesu Keriso samösa:

Sato:    He Ama khöma . . .

Son.:    He Ama ba zorugo, yate’amoni’ö döi wa’asalawaMö andrö gofu heza, ba ngawalö soi fefu, ba ngaalö li, he ba zorugo ba he ba danö tou ba barö danö, he ba GerejaU ba he ba dödöma, ba gamuatama, ba gera’erama, ba ba wa’abölöma ma’afefu, fao fombaloi we'aso Zangorifi ya'aga, Yesu Keriso.

Sato:    Me khöU wa’asalaŵa awö wa'abölö awö lakhömi, götögötö wa'ara.

Sato:    Amen.

           

FANGARO DÖDÖ                                                                Mudadao

Son.:    Ya’ami ira talifusö, fatua lö ta’asiwai gowuloa ni’amoni’ö andre, datafondrondrongo gamabu’ula li Zo’aya si tobali fangaro dödö ba zamati khönNia. Tatema li dania, Amen.

Son.:    Ya’ahowu zinumana tödö, me khöra gamatöröwa zorugo andrö

Sato :   Amen)

Son.:    Ya’ahowu zabu  tödö, me ya’ira niraratödö dania

Sato:    Amen

Son.:    Ya’ahowu zebolo tödö, me la’okhögö gulidanö dania

Sato:    Amen

Son.:    Ya’ahowu zolofo ba sowökhi tödö fa’atulö andrö, me ya’ira ni’abusoi’ö dania

Sato:    Amen

Son.:    Ya’ahowu zohahau tödö, me ya’ira zangila Lowalangi dania

Sato:    Amen

Son.:    Ya’ahowu zangatulö niha, me ya’ira nifotöi ono Lowalangi dania

Sato:    Amen 

Son.:    Ya’ahowu nigohi börö wa’atulö dödö andrö, me khöra gamatöröwa zorugo andrö

Sato:    Amen

Son.:    Ya’ahowu ami, na la’o’aya ami ba na lagohi ami ba na laböbögö khömi zi lö sökhi, na börö Ndra’o, mi’omusoi’ö dödömi ba mi’owuawua’ö dödömi, me ebua zulö khömi ba zorugo

Sato:    Amen

Son.:    Ya’ahowu zifaduhu tödö ba niwa’ö Zo’aya, ya nisuno döiNia, irugi zi lö aetu

Sato:    Amen

 FANGASIWAI

 ANGOMBAKHATA                                                                Mudadao

FEHEDE FANGASIWAI - FANGANDRÖ HOWUHOWU ZO'AYA

Son.:    Ya'ami ira talifusö,

börö sakramen fanasa andrö, no tekaoni ita ba wa’auri sohahau tödö ba satulö föna Lowalangi. Fatua lö ta’asiwai upacara Ni’amoni’ö andre, data’andrö wa’abölö awö howuhowu moroi khö Zo’aya.-                                  Latuhi danö

Son.:    Ba ya  Ifahowu'ö ita fefu, Lowalangi si lö ambö fa'abölö:

+ Ama ba Ono ba Eheha Ni’amoni ’ ö.

Sato:    Amen, (amen, amen)

SINUNÖ FANGASIWAI: LAUDATE No 64 ma 68 ma 70 ma 71