Just another free Blogger theme

Website ini memuat Tulisan, Refleksi, Katekese, dan Renungan dari Katekis Ingatan Sihura. Website ini kemudian merupakan bagian dari memaksimalkan media yang ada menjadi sarana pewartaan. Semoga bermanfaat. Ya'ahowu!

07/05/2021

FOMBASO  I

Taroma Li Lowalangi nihalö moroi ba zura Moze si tölu.-

Me luo no, humede Zo'aya khö ndra Moze A'aroni, Imane : "Na oroma ba dete guli niha zobu'u ma gigimö ba ma safusi, si hulö na ibörögö bou auri, ya la'aohe khö Ga'aroni, ere andrö, niha da'ö, ba ma khö nononia, haniha, ere andrö. Na no ifareso niha andrö ere, ba na no oroma wa no göna ia bou auri, ya mu'oniagö niha da'ö ere. Ya mu'onukha nukha si no atika ba böi ya muhaogö wanukhu bunia. Ya mubalugö mbawania nukha ba ya mu'ao'ao : Sira'iö ! Sira'iö ! Götö so khönia wökhö andrö, sira'iö ia. Ba ni'oniagö nahiania, baero mbanua". 3 Moz 13:1-2.43-46

Simanö daroma li Lowalangi.-

 

Sinunö Fanema Li : Psallite No 32                               (ma Laudate No 151,1)

 

FOMBASO  II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö,

Gofu hadia nilaumi, - he simanga ami, ba he samadu, ba ma hadia nilaumi, - milau ia ba wamolakhömi Lowalangi. Böi mifobörö wangala ba wamati, he ba niha Yahudi ba he ba niha Yunani ba he ba niha samati khö Keriso. Ya simane wa'aurigu wa'aurimi : U'ositolagö wangomusoi'ö tödö niha fefu ba ngawalö hadia ia nilaugu, tenga börö wangalui haregu samösa. Ohitö dödögu, ena'ö tola te'orifi fefu ira. Mibe'e tulada khömi ndra'odo, simane ya'o, me no ube'e tulada khögu Keriso. 1 Kor 10:31-11:1

Simanö daroma li Lowalangi.-

 

Sinunö Föna Injil : Psallite No 256                             (ma Laudate No 151, 2)

 

INJIL

Turia Somuso Dödö khö Yesu Keriso nisura Mareko.-

Me luo da'ö, i'ondrasi Yesu samösa niha sobou auri. Ibalöduhini danö föna Yesu ba wangandrö tolo khöNia, imane : "Na edöna Ndra'ugö, tola Öfadöhö ndra'odo." Ahakhö dödö Yesu khönia, I'oro'ö dangaNia ba wombambaya ya'ia, Imane : "Edöna Ndra'o, ya döhö Ndra'ugö !" I'anemai'ö aheta mbou auri andrö khönia, ba döhö ia. Ba Ifangelama ia Yesu, i'anemai'ö Ifofanö, Imane khönia: "Faigi, fa böi ö'ombakha'ö hadia ia, gofu ha'ökhö. Ae'e sa, oroma'ö ndra'ugö khö gere, akha ifareso ndra'ugö, ba fasömba'ö zi no i'oroi'ö Moze, ame'ela ba wa'aheta wökhöu andrö, si tobali fangoroma ba niha, wa no döhö ndra'ugö." Ba hiza, mofanö niha da'ö ba ibörögö i'ombakha'ö, iforege, ifahöngö duria andrö, irege tebai sa'ae I'oroma'ö Ia Yesu we amöi ba mbanua misa. Baero, ba naha si lö nihaniha, soso Ia. Ba hiza, la'ondrasi Ia niha moroi ba zifasui fefu. Mrk 1:40-45 

Simanö duria somuso dödö khö Zo'aya ya'ita, Yesu Keriso.-

 

ERONUA:

Bakha ba wombaso sifõfõna, tarongo hewisa me latahigõ Wetero ira nifahaõ bõ’õ bõrõ me mõi Wetero ba niha si lõ muboto ma niha sitenga niha Yahudi. Ba wame’e wetero fangaboto ba dõdõ ba nifahaõ bõ’õ andrõ, so dombua faosatõ zinangea ifa’ema. Sifõfõna ba angi’ilatania ya’ia si hulõ nukha sebolo nidada moroi ba mbanua siyawa. Ba nukha andrõ oroma khõnia gurifõ si’õfa ahe, utu ndru’u, urifõ sanana ba ngawalõ wofo. Baero da’õ terongo li sanguma’õ “Faoso Fetero! Taba ba a! Hewa’ae simanõ wehede andrõ ba iwa’õ Fetero wa tebai I’a zalakha. Ba wehedenia andrõ so li sanguma’õ: “Bõi wa’õ si lõ sõkhi zi no ihõnagõ Lowalangi”.

Faosatõ sidua nifa’ema Wetero ya’ia da’õ: fe’amõinia ba nomo Konelio. Ba we’amõinia andrõ so datõlu zogaoni ya’ia ba Eheha gõi zango’ou ya’ia ba we’amõi. Ba me’irugi nomo Gonelio, itutunõ Konelio hewisa wamatenge mala’ika ia ba wogaoni Fetero. Ba zimanõ ibõrõgõ ibotokhi daroma li andrõ khõra Fetero irege I’ila wa no mõi tou Geheha Ni’amoni’õ yawa nõsi nomo Konelio andrõ. Ba meno awai itutunõ da’õ Fetero, lõ saae famadaõ ba nifahaõ bõ’õ irege aboto ba dõdõra wa “Ibe’e gõi Lowalangi ginõtõ ba niha sitenga Niha Yahudi wamalalini eraera moroi ba horõra fa lasõndra wa’auri si lõ aetu”.

Bakha ba wombaso sifõfõna sindruhu edõna ifaehagõ khõda wa’aboto ba dõdõ so’amakhaita ba wamati andrõ. Sifõfõnania wa fa’omasi Lowalangi andrõ lõ irai Ibe’e goto’oto ba gotalua zamati khõNia; he niha Yahudi si no muboto ba he ba zi tenga niha Yahudi ma si lõ muboto. Simendrua, fa’omasi Lowalangi ba niha gulidanõ andrõ lõ irai mo’aetufa. Lõ mamalõ ibe’e gõi Lowalangi ginõtõ ba niha sitenga Niha Yahudi wamalalini eraera moroi ba horõra fa lasõndra gõi wa’auri si lõ aetu.

Bakha ba wombaso nihalõ moroi ba zura Yohane sifõfõna andre, ba da’e tefarou dõdõda ba wangomasi’õ awõda me fa’omasi andrõ no moroi khõ Lowalangi samõsa. No I’omasi’õ ita Lowalangi irege ifatenge NonoNia hõlida. Ba zimanõ dozi niha sangomasi’õ Lowalangi ba no aboto ba dõdõnia Lowalangi; ba niha si lõ mangomasi’õ Lowalangi, lõ saboto ba dõdõnia Lowalangi andrõ.

Ba wombaso sidua andre sindruhu edõna ifaehagõ khõda wa bõi tafamalõmalõ wangomasi’õ awõda niha me no Lowalangi zamõrõgõ wangomasi’õ ya’ita. Me no samati khõ Lowalangi ita ba no aboto gõi ba dõdõda Lowalangi, ba zimanõ bõi tafamalõmalõ wangomasi’õ Lowalangi andrõ. Fangomasi’õda Lowalangi andrõ tenga ha mu’oroma’õ ia ba wangandrõ, ba hiza famati khõ Lowalangi andrõ sifõfõna mu’oroma’õ ia ba wangomasi’õ awõda niha.

Bakha ba duria somuso dõdõ nifarongogõ khõda andre, sindruhu wa fangombakha Yesu andrõ fa’omasi ba nifaha’õNia, tenga ha moroi ba mbewe, ba hiza I’ombakha’õ gõi hewisa wangomasi’õNia Ama same’e khõNia oroisa. Furugõ wa’omasi andrõ niwa’õ Yesu ya’ia da’õ: Sangomasi’õ awõnia andrõ yaia zanehegõ mate khõ nawõnia andrõ. Ba zimanõ ibe’e goroisaNia Yesu: “Ya faoma mi’omasi’õ nawõmi”.

Fehede Yesu andre ba duria somuso dõdõ, no tobali amarahuta zitõlu ngawua wombaso nirongoda ba zima’õkhõ andre. amarahutania ya’ia da’õ “fa’omasi”.  Fa’omasi andrõ ni’andrõNia khõda yaia na:

1.      Fa’omasi andrõ lõ irai ifatumbu’õ goto’oto ba gotalua wa’atalifusõta. Hadia zi no amaedola goto’oto andrõ? Ya’ia nahõnahõ dõdõ, fatiusa, fasosota, fakhõgusa, btn. Lowalangi samõsa lõ irai ibe’e goto’oto ba gotalua niha ni’a’azokhiNia. Lõ Ndrawa Heleni ba lõ niha Yehuda. No ifagõlõsi wame’enia Fa’omasi andrõ Lowalangi; ibe’e ginõtõ wamalalini era’era ba niha sangomasi’õ Ya’ia, ba simanõ gõi ibe’e ginõtõ wamalalini eraera ba niha si lõ mangomasi’õ Ya’ia. Ba zimanõ  ibe’e khõ da wehede wanguma’õ: “Boi wa’õ si lõ sõkhi zi no ihonogõi Lowalangi”.

2.      Fa’omasi andrõ ya’ia zamelegõ ya’ia fõna zifahuwu khõnia andrõ. Fefu niha ba gulidanõ andre ba no si fatalifusõ. Ba zimane dania oroma hadia sindruhu I’omasi’õ Lowalangi niha andrõ na sindruhu I’ila I’omasi’õ nawõnia niha. Yakobo zi no irai manguma’õ: “Famati si lõ buabua ba no zayazaya gõlõ”. Ba zimanõ ena’õ bõi mufamalõmalõ wamalua fa’omasi andrõ meno Lowalangi zamõrõgõ wangomasi’õ niha ba wamatenge OnoNia si ha samõsa andrõ ba ena’õ dozi ita samati khõNia ba lõ mate bõrõ horõ andrõ.

Amen.

Categories:


Lorem ipsum dolor sit amet, consectetur adipiscing elit. Pellentesque volutpat volutpat nibh nec posuere. Donec auctor arcut pretium consequat. Contact me 123@abc.com

1 comments:

Unknown mengatakan...

Saohagolo Pak.

Posting Komentar