Bacaan dan Ulasan Bacaan Minggu Paskah ke-2 [Tahun B] dalam Bahasa Nias.

 Luo Migu Paskah Si-2 [Dõfi B]

 

FOMBASO  I

Taroma Li Lowalangi

nihalõ moroi ba zura “Halõŵõ ndra Rasul”.-

Me luo no, baYerusalema, niha samati khõ Keriso, ha sambua dõdõra, ha sambua gera’era. Lõ ba gotaluara niha sanguma’õ khõnia manõ hadia ia nibabayania. Fefu zi so khõra faoma la’oguna’õ. Ba kuaso sebua lafaduhu’õ wemaoso Yesu Keriso, So’aya, ira rasul. Oroma, wa abõlõ wa’ebua dõdõ Lowalangi ba khõra fefu. Lõ ba gotaluara zambõ hadia ia. Dozi sa sokhõ benua ba ma omo, la’amawa ba la’ohe mbõli ni’amawara andrõ, labe’e ba danga ndra rasul. Ya’ira, ba lafosasi ba zamõsana, lafaigi zabõlõ moguna.-   HalRas 4:32-35

Simanõ daroma li Lowalangi.-

Sinunõ Fanema Li : Psallite No 118, 1+5+6    (ma Laudate No 9, 1-2)

 

FOMBASO  II

Taroma Li Lowalangi

nihalõ moroi ba zura Yohane si fõfõna.-

Ya’ami ira talifusõ ni’omasi’õ !

Dozi niha samati, wa no Keriso, razo sangorifi andrõ, Yesu, no ono Lowalangi ira. Ba dozi niha sangomasi’õ Ama, la’omasi’õ gõi Nono si’oroi Nama andrõ. Ba da’õ aboto ba dõdõda, wa ta’omasi’õ zotõi ono Lowalangi, na ta’omasi’õ Lowalangi ba na ta’o’õ goroisaNia. Bõrõ me fangomasi’õ Lowalangi, eluahania mu’o’õ goroisaNia. Ba lõ abua ba khõda wolo’õ oroisaNia andrõ. Bõrõ me ero samõsa nono Lowalangi tola i’alani gulidanõ si lõ sõkhi andre. Ba ta’alani gulidanõ andre faoma famatida khõ Yesu Keriso. Haniha zi tola mangalani fa’alõsõkhi gulidanõ? Ha niha si faduhu tõdõ, wa Ono Lowalangi Yesu.

Yesu Keriso andrõ zi no mõi ba gulidanõ faoma nidanõ (fanasa ba Yoridano) ba faoma do (ba wa’amateNia ba rõfa). Tohare Ia tenga ha faoma idanõ manõ, faoma idanõ awõ ndro. Eheha Lowalangi zamaduhu’õ, wa sindruhu da’e, me no si duhu Geheha andrõ.- 1 Yoh 5:1-6

Simanõ daroma li Lowalangi.-

Sinunõ Fõna Injil : Psallite No 238  (ma Laudate No 9, 3)

 

INJIL

Turia Somuso Dõdõ khõ Yesu Keriso nisura Yohane.- 

Me luo si fõfõna aefa Sabato (ba luo Migu), me tanõ owi, no so ndra nifahaõ Yesu ba zi sambua omo si no mukusi fefu mbawandruhõ, bõrõ me ata’u ira ndra salaŵa niha Yahudi.

I’anemai’õ tohare Yesu muzizio Ia ba gotaluara, Imane khõra : “Ya so khõmi wa’atulõ !” Me no aefa Iŵa’õ da’õ, Iforoma’õ khõra zokho ba dangaNia ba ba dõtõ’aNia. Omuso sibai dõdõ ndra nifahaõ, me la’ila Zo’aya.- Ifuli Imane khõra : “Ya so khõmi wa’atulõ ! Simane famatenge Nama Ya’o, simanõ gõi wamatengeGu ya’ami.” Me no aefa Iŵa’õ da’õ, Ihehaini ira hanuhanuNia, Imane : “Mitema Geheha Ni’amoni’õ ! Na so ni’efa’õmi horõ, ba aefa horõ andrõ. Si lõ mi’efa’õ horõ, lõ te’efa’õ horõnia”.-

Toma, nifotõi Sifaero, samõsa ba gotalua ndra nifahõ Yesu, lõ hadõi, me so Yesu. La’ombakha’õ khõnia ira nifahaõ bõ’õ, lamane : “No ma’ila Zo’aya.” Itema li Toma, imane : “Na lõ u’ila ba dangaNia lahe gosõ’osõ andrõ ba na lõ ube’e durugu ba laheto gosõ’osõ andrõ, ba na lõ ube’e dangagu bakha ba zokho ba dõtõ’aNia, tatu lõ faduhu dõdõgu”.-

Samigu aefa da’õ, so zui ndra nifahaõ Yesu ba nomo andrõ, ba so gõi Toma. No muduhõ fefu mbawandruhõ. I’anemai’õ tohare Yesu ba muzizio Ia ba gotaluara, Imane : “Ya so khõmi wa’atulõ !” Awena Iŵa’õ khõ Doma : “Ohe durumõ ba da’e ba faigi dangaGu ! Ohe dangau ba be’e ia bakha ba zokho ba dõtõ’aGu ! Bõi mangiwa dõdõu sa’ae, - ya faduhu sa’ae !” Itema li Yesu Toma, imane khõNia : “So’aya ya’o ba Lowalangigu !” Imane khõNia Yesu: “Hadia faduhu dõdõu, bõrõ me no õ’ila Ndra’o? Ya ohahau dõdõ niha si faduhu tõdõ, he ŵa’ae lõ i’ila Ndra’o !”

Oya nasa zahõlihõli dõdõ nifazõkhi Yesu fõna ndra nifahaõNia. Ba hiza, lõ musura da’e fefu ba mbuku andre. No musura da’e, ena’õ faduhu dõdõmi, wa no Keriso andrõ Yesu, Ono Lowalangi, ba ena’õ misõndra wa’auri si lõ aetu ba dõiNia andrõ, na faduhu dõdõmi.- Yoh 20:19-31

Simanõ duria somuso dõdõ khõ Zo’aya ya’ita, Yesu Keriso.-

* ============================================ *

Õsi Wombaso Sisara:

Bakha ba wombaso sisara andre idunõdunõ khõda zalua khõndra niha samati andrõ sifao ira Nifaha’õ Yesu. Ba da’e ta’ila hewisa wanuriaigõ ndra Rasul andrõ femaoso Yesu moroi ba gotalua zimate. Fefu niha sifao khõra ba samati khõ Yesu, lõ mamalõ so ira bakha ba wahasara dõdõ si lõ mamalõ andrõ. Na so zokhõ benua ba omo, la’amawa ba bõlinia labe’e ba danga ndra nifaha’õ ena’õ lafosasi ba niha sabõlõ mangoguna’õ.

Bakha ba wombaso sisara andre oroma khõda hewisa wololohe ma wondrõnia’õ ndra Rasul andrõ. Fololohe ba fondrõnia’õ ndra Rasul andrõ ba tesõndra mbua sisõkhi ya’ia wahasambua ba fahasara dõdõ ba gotalua niha samati. Fahasara dõdõ niha samati andre la’oroma’õ ia ba wanou’õ ba danga ndra Rasul fefu gokhõtara zamõsana. Fefu da’e lafalua tenga bõrõ wa lõ omasi ira moharato, ba hiza ena’õ faoma lõ khõra fakhõgusa. Fakhõgusa asese mõi bõrõ  mbukala ba gotalua zi sambua agowuloa. Fangowuloira okhõta si so khõra andre no sambua tandra wangobadõdõira awõra niha samati, me lafosasi faudu molo’õ fa’amoguna ba zi samõsamõsa. Ba wangobadõdõira awõra andre gõi no tobali gõi sambua tandra folo’õra oroisa Yesu ba wangomasi’õ awõ.

Õsi Wombaso Sidua:

Bakha ba wombaso sidua andre nihalõ moroi ba zura Yohane andrõ sifõfõna, ifaduhu’õ khõda wa dozi niha samati ba khõ Yesu Keriso andrõ ba no Ono Lowalangi ira. Fangomasi’õ Yesu andrõ ba no gõi fangomasi’õ Lowalangi samõsa. Ba wangomasi’õ Lowalangi te’oroma’õ ia ba wolo’õ oroisaNia. Folo’õ oroisa Lowalangi andrõ ya’ia ba wangalaini ulidanõ andre moroi ba zi lõ sõkhi fefu.

Õsi zura Yohane sifõfõna andre edõna I’ombakha’õ gõi khõda hewisa ita ba wamaduhu’õ famatida zamõsana. Yesu nifatida andrõ no Ono Lowalangi safõnu lakhõmi Ia ba lõ aefa ia gõi wa afõnu gõi ia niha. Fe’amõiNia ba gulidanõ wangai õsi wa’aniha andrõ ifaduhu’õ Ia Eheha Ni’amoni’õ ba wanemaNia fanasa ni’amoni’õ ba Yoridano. Aefa da’õ bawa’amateNia gõi tefaduhu’õ Ia sifao doNia andrõ saduwa ba dõla rõfa. Fefu da’e tafaduhu’õ gõi ia irugi mane ma’õkhõ ya’ia ba wanemada Sakramen Fanasa Ni’amoni’õ ba Sakramen Ekaristi. Sakramen Fanasa Ni’amoni’õ no I’osambua’õ ita tobali ita Ono Lowalangi, ba sifao gõi ita ba wanuriaigõ fa’amate ba femaosoNia andrõ bakha ba wasõmbata Kurban Ekaristi. Fanasa Ni’amoni’õ ba Kurban Ekaristi andrõ no sambua tandra soroma ia khõda nibe’e Lowalangi wa ya’ita andre lõ mamalõ tobali ita Ono Lowalangi ba tasõndra dania wa’auri si lõ aetu andrõ.

Õsi Wombaso Turia Somuso Dõdõ:

Bakha ba wombaso Turia Somuso Dõdõ andre tefaduhu’õ khõda mendrua kali I’oroma’õ Ia Yesu khõndra nifaha’õ. Ba wangoroma’õNia Ya’ia simendrua kali andrõ, lõ mamalõ ba wa’ata’u so ndra nifaha’õ irege laduhõ manõ ira bakha ba nomo. Ba wangoroma’õnia sifõfõna andrõ I’owai ndra nifaha’õ: “Ya so khõmi wa’atulõ!” Aefa da’õ ihehaini ndra nifahaõ ba wamatenge ya’ira ba wanuriaigõ Turia Somuso Dõdõ. Ba hiza me I’oroma’õ Ia Yesu andrõ ba lõ hadõi Toma ba gotaluara, andrõ me la’ombakha’õ khõnia ba lõ faduhu dõdõnia. Ba hiza me I’oroma’õ ia Yesu simendrua kali, so Toma irege fehede Yesu andrõ tofõfõ khõ Toma. Me awena faduhu dõdõ Doma andrõ me no I’ila Yesu, andrõ wa iwa’õ khõnia Yesu: “Ya’ohahau dõdõ niha sifaduhu tõdõ, he wa’ae lõ I’ila Ndra’o!”

Õsi Wombaso Turia Somuso dõdõ andre na tahaogõ ta’angeraigõ, so tõlu faosatõ zedõna ifa’ema khõda; ya’ia da’õ: “Fangi’ila (pengenalan), Famatenge (perutusan), ba Fa’afaduhu Dõdõ (kepercayaan). Fangowai Yesu khõ ndra nifaha’õ no moi fangoroma’õNia fefu zokho andrõ ba mbotoNia. Ba wame’eNia fangowai andrõ I’oroma’õ Ia ba la’ila Ia gõi ira nifaha’õ andrõ irege lõ khõra fa’alawõ ba fangiwa dõdõ wa Yesu sino muforõfa andrõ zi so ba gotaluara. FohehainiNia ira nifaha’õ andrõ no famatenge ba wangefa’õ horõ. Fanuriaigõ Turia Somuso Dõdõ andrõ lõ mamalõ tefaulugõ ia ba wangefa’õ horõ dozi niha sanema ba samati khõ Yesu andrõ. Turia wangefa’õ horõ andre sindruhu mo’amakhaita ia ba we’amõi Yesu ba gulidanõ tobali “Ono Mbiribiri Lowalangi Sangeheta Horõ Nõsi Gulidanõ”. Fa’alõfaduhu dõdõ ni’falua Doma andrõ, no sambua ndrela ba wosalahini ya’ita wangoroma’õ hewisa ita ba wamati. Fangoroma’õ Yesu andrõ simendrua, no tobali tandra ba wamaduhu’õ hadia sindruhu mamati ita khõNia. Ba da’e oroma wa Yesu andrõ si no ono Lowalangi sindruhu tafaduhu’õ tobali So’aya ba Lowalangi nifati andrõ.

Amarahuta:

Fangi’ila, Famatenge, ba Fa’afaduhu Dõdõ, no sambua faosatõ sitebai farõi ba gofanõwa wamati ba wondrugi fa’auri si lõ aetu. Fangi’ila ma fa’aboto ba dõdõ haniha Yesu andrõ si no Ono Lowalangi si no sindruhu niha gõi, no mõi bõrõ wanema’õ sifao famati wa Yesu andrõ sindruhu sangõhõli niha moroi ba huku horõ ba fa’amate. Bõrõ wangi’ila ma fa’aboto ba dõdõ andre tesõndra dania wa’afaduhu dõdõ saro ba so wamati sindruhu. Da’e ni’oroma’õ ndra niha samati andrõ, auri ira ba wahasara dõdõ ba fahasambua geraera ba fefu zi so khõra ba no soguna ba zato molo’õ fa’amoguna zamõsana.

Ba wamaduhu’õ famati andrõ wa si’oroi dõdõ, te’oroma’õ ia ba wangomasi’õ Lowalangi andrõ. Fangomasi’õ Lowalangi ya’ia na sifao fa’ahele dõdõ so wolo’õ oroisa andrõ. Folo’õ oroisa andrõ no sambua famatenge ba wanuriaigõ Turia Somuso Dõdõ. Ena’õ lõ mamalõ sihulu tõdõ ba wanuriaigõ Turia Somuso Dõdõ andrõ, moguna gõi ta’andrõ wanolo Geheha Ni’amoni’õ. Eheha andrõ tatema ia bakha ba Sakramen Fanasa Ni’amoni’õ si no mangosambua’õ yaita tobali ita Ono Lowalangi, ba sifao gõi ita ba wanuriaigõ fa’amate ba femaosoNia andrõ bakha ba wasõmbata Kurban Ekaristi. Fanasa Ni’amoni’õ ba Kurban Ekaristi andrõ no sambua tandra soroma ia khõda nibe’e Lowalangi wa ya’ita andre lõ mamalõ tobali ita Ono Lowalangi ba tasõndra dania wa’auri si lõ aetu andrõ.

Fa’omuso dõdõ paskah andrõ nitemada ba mbongi paskah ni’amoni’õ andre sindruhu I’a’aro’õ dõdõda ena’õ lõ mamalõ sitehulu tõdõ ita ba tenga sawuwu ita ba wamati. Paskah si no omusola dõdõ me no aefa wa’abu dõdõ, lõ mamalõ tarasoi wa Yesu andrõ no I’alani wa’amate ba I’ohe ita gõi ba wa’auri si lõ aetu andrõ. Ba gafuriata moguna gõi manofu ita ba dõdõda zamõsana, hadia sindruhu ta’ila ba faduhu dõdõda khõ Yesu andrõ? Na sindruhu, hewisa ita worasoi wefao Geheha Ni’amoni’õ andrõ ba gofanõwa wamatida, tõratõra ba wolo’õ oroisaNia? Ya lõ mamalõ so ita ba wa’afaduhudõdõ sindruhu andrõ, ba ena’õ EhehaNia andrõ zi lõ mamalõ fariawõ khõda bongi ma’õkhõ. Amen.