TAROMA LI LOWALANGI BA LUO DÖFI SI BOHOU (SANTA MARIA INA LOWALANGI) DÖFI A

Liturgi Taroma Li Döfi A/B/C hlm. 32.

FOMBASO I

Taroma Li Lowalangi nihalö moroi ba zura Moze si öfa.-

Ba humede Zo'aya khö Moze, Imane: "Hede khö Ga'aroni ba iraononia, ömane : Na mifahowu'ö Ndraono Gizara'eli, ba mimane khöra : Ya Ifahowu'ö ndra'ugö So'aya, ba ya Irorogö ndra'ugö! Ya Ifohaga mbawaNia khöu So'aya ba ya I'ebua'ö dödöNia khöu! Ya Ifalemba höröNia khöu So'aya ba ya Ibe'e wa'ohahau dödö khöu! Ya mube'e tohare ba Ndraono Gizara'eli döiGu, ba Ya'odo zamahowu'ö ya'ira." 4 Moz 6:22-27

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 67                                  (ma Laudate No 8)

 

FOMBASO II

Taroma Li Lowalangi nihalö moroi ba zura Waulo ba niha Galatia.-

Ya'ami ira talifusö !

Me föna, no i'osawuyu ita fa'abölö gulidanö andrö. Ba me no irugi inötö nihonogöi Lowalangi, ba ifatenge NonoNia, ni'adonogö ndra alawe ba nibe'e barö mbawa goroisa, ena'ö Ihöli ita si so barö mbawa goroisa, ba ena'ö tobali ono ita khö Lowalangi. Ba me  no ono ami khö Lowalangi, ba no Ifatenge Geheha NonoNia andrö bakha ba dödöda, si'ao andrö :  "Abba - He Ama!"  Tobali, tenga sa'ae sawuyu ami, no ono Ba me ono ami khö Lowalangi, Ibe'e khömi fefu hadia ia zi so khöNia ba ndraonoNia.- Gal 4:4-7

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 216                                (ma Laudate No 31)

 

INJIL

Turia Somuso Dödö khö Yesu Keriso nisura Luka.-

Me luo da'ö faoma lamane khö nawöra ira kubalo : "Mitabu, möi ita ba Mbetilekhema wamaigi hadia zi no alua andrö, ni'ombakha'ö Zo'aya khöda." Mofanö ira ba falukha ira Maria ba Yosefo, awö Nono andrö, si no tefagaya ba luha.  Ba me no la'ila,  latutunö hadia niŵa'ö mala'ika sanandrösa ba Nono andrö. Ba dozi samondrongo, ba ahölihöli dödö ba ni'ombakha'ö ndra kubalo andrö khöra. Ba itanö ba dödönia Maria fefu niŵa'ö andrö, ifatoutou tödönia. Ba lafuli ira kubalo andrö, lasuno Lowalangi ba nirongora ba ba ni'ila höröra, faudu ba niŵa'ö mala'ika khöra. Me irugi fitu bongi wa'ebua Nono andrö, ba laboto Ia. Labe'e töiNia YESU, töi niŵa'ö mala'ika fatua lö tabina Ia.- Luk 2:16-21

Simanö duria somuso dödö khö Zo'aya ya'ita, Yesu Keriso.-

Erönua:

LOWALANGI BA NO SANGEFA’Ö

Bakha ba wombaso sisara nihalö moroi ba Zura Moze si’öfa, I’ombakha’ö khöda wehede Zo’aya khö Moze sedöna mufa’ema khö Ga’aroni sofeta ba Ndraono Gizara’eli. Ba wehede Zo’aya andrö edöna ifaehagö khöda hewisa dödö Lowalangi andrö ba Ndraono Gizara’eli. Edöna Zo’aya wamahowu’ö iraono Gizara’eli andrö me no tana khö Lowalangi Ndraono Gizara’eli andrö.

Bakha ba wombaso sisara andre edöna I’ombakha’ö khöda wa ya’ita niha samati khö Lowalangi göi no tobali ita soi nifahowu’ö Lowalangi andrö. Iraono Gizara’eli andrö no soi nifili Lowalangi I’oroi wamobörö. Ya’ita göi samati ba khö Zo’aya ya’ita Yesu Keriso tetötöi göi ita tobali Soi ndraono Gizara’eli andrö tenga börö nga’ötö ba hiza börö wamati sihasambua andrö.

Bakha ba wombaso sidua nihalö moroi ba zura Waulo ba niha samati ba mbanua Galatia ifa’ema khöda Faulo wa no irugi inötö Lowalangi ba wamatenge Ono-Nia ba gulidanö. Ba wamatenge Ono-Nia andrö ba gulidanö ihöli ita barö Goroisa andrö ba isou göi ita tobali Ono Lowalangi. Ba wa’atobalida Ono Lowalangi andrö ibali’ö göi ita mangawuli tobali sanema ondröita andrö khö-Nia.

Ba wombaso sidua andrö edöna itohugö nösi wombaso siföföna andrö wa börö wamati andrö ba khö Keriso tesou ita tobali Ono Lowalangi, tobali sanema ondröita andrö ba ba gafuriata lö alawö ita wogaoni Lowalangi andrö Abba-Ama! Ba da’e tefangöhösi göi khöda wa fe’amöi Yesu andrö Ono Lowalangi tenga ha ba ndraono Gizara’eli soi andrö, ba hiza ba khöda göi ya’ita Iraono Gizara’eli andre sitesou börö wamati sihasambua andrö.

Ba wombaso Turia Somuso Dödö andrö teturiaigö khöda hewisa we’amöi ndra kubalo andrö ba mbenua wamaigi si no tumbu andrö. Ba wa’omuso dödöra andrö, laturiaigö laturiaigö niwa’ö mala’ika andrö ba omuso dödöra. Fefu zamondrongo ahölihöli dödöra, ba Maria andrö lö olifu ia niwa’ö andrö, ifatoutou tödö-Nia. Bagafuriata wombaso Turia Somuso Dödö andrö teturiaigö wa me no irugi fitu bongi ba laboto nono andrö ba labe’e töi-Nia Yesu-Sangefa’ö.

Ba Duria Somuso Dödö andre edöna ifangöhösi nösi wombaso siföföna ba simendrua andrö wa fe’amöi Nono Niha andrö ba gulidanö ba no sangefa’ö soi-Nia moroi ba huku horö fa’amate. Fangefa’ö-Nia andrö I’ohe wa’omuso dödö ba niha side’ide andrö ya’ia ni’oroma’ö ba mboto ndra kubalo andrö. Ya’ita göi sifarahu ba wamati ba khö Nono Niha andrö, sindruhu tesou ita tobali ono Lowalangi ba ya’ita andrö göi sanema ondröita andrö.

Ba gafuriata, ba ngaluo andre ma’ökhö tatörö tödöda Santa Maria Ina Lowalangi. Ba wanörö tödö Santa Maria andrö ifangöhösi khöda wa ina Lowalangi andrö si no ina Zo’aya ya’ita, ba no tobali göi ia inada ya’ita niha samati andrö. Gereja göi si no Ina khöda lö mamalö irorogö ba ifaeri ita sagötö zidöfi andrö ba lö mamalö ibe’e khöda wa’ohauhau dödö ba wamati andrö. Sifao Gereja andrö si no angowuloa niha samati, lö mamalö I’osambua’ö ita ba iheri ita irege lö mamalö ihakhösitödö ita Lowalangi ba irege mangawuli ita dania khö-Nia ba luo safuria ba wanema ondröita Zorugo andrö. Amen.