Renungan: PESTA SANTU STEFANUS MARTIR dalam Bahasa Nias.

FAMADUHU’Ó SINDRUHU

 

Ma’ökhö ta’owasaini Santu Stefanus Martir. Stefanus niowaisinida andre asese la be’e töinia Martir siföföna börö me ya’ia rasul siföföna mate ba wamaduhu’ö sanandrösa khö Yesu Keriso sino maoso moroi ba gotalua zimate.

Waöwaö wamaduhu’ö Stefanus tarongo bakha ba wobaso si-1, wa ba ginötö mamaha’ö ia ba nomo Lowalangi no afönö ia Eheha Lowalangi irege niha samadaö khönia sandrösa famaha’ö wa Yesu Keriso no maoso moroi ba gotalua zimate, tebai lafabua wehedenia, irege so khöra wa’afökhö dödö ba wamunu Stefanus. Me’arakhagö mate Stefanus i’ila wa Ono Lowalangi dumadao ba gambölö Lowalangi ba mangandrö ia salahi niha samunu ya’ia.

            Stefanus no ibe’e khöda sambua duma-duma ba wamaduhu’ö ba fanuriaigö Taroma Li Lowalangi bakha ba wa’aurida sero ma’ökhö. Samösa samaduhu’ö ba samuriaigö Taroma Li Lowalangi silo tola lö’ö tataögö wa’abasakhi irege tola lafakao ba labunu. Aefa da’ö bakha ba Injil, Yesu ma’ökhö göi andre ibe’e wangelamaisi khö ndra nifaha’öNia, wa börö wanuriagö turia somuso dödö ba niha sato, ira nifaha’öNia laohe ira ba rafe ba wongohuku, laböbözi irege mate ira börö döi Yesu. Ba ba gafuriatania ibe’e khöra wangabölö wamati Yesu wa fefu hadia ia nifalau ndra niha faha’ö börö wa nolo Geheha Lowalangi, sanau ölö, irugi gamozua, da’ö ni’orifi.

             Hadia ta’odanedanegö mbua wamati niha keriso ba ginötö falukha ita ba wamaduhu’ö sindruhu bakha ba wa’aurida? Lö famini tödö ba wanegu naso gamuata niha sifa’ila khöda na ifalua gamuata silö atu? Hadia lö fa’ata’uda wotimbagö wamalua amuata nifotö korupsi, kolusi ba nepotisme. Samösa niha keriso bakha ba wa’aurinia sero ma’ökhi silö tola lö’ö ta onoro röfada ba wamaduhu’ö sindruhu gofu heza so’ita. Ya Eheha Lowalangi zamönui ya’ita ba wamalua amuata si sökhi ba wa’aurida. ***