TAROMA LI LOWALANGI LUO MIGU FÖNA PASKAH SI - 4 DÖFI B

FOMBASO  I

Taroma Li Lowalangi nihalö moroi ba zura Nga'ötö, si dua.-

Me luo da'ö, he satua mbanua, he ira ere ba he niha sato, itugu ebua wa'afaröi khö Lowalangi: la'ohia'ö zogoro ita andrö ba niha baero ba la'ohe zalakha ba nomo Zo'aya ba Yerusalema, nahia andrö ni'amoni'ö Zo'aya. Ba lö adagedage Zo'aya, Lowalangi ndra furugöra, lö Ibato wamatenge khöra tengetengeNia, me no ahakhö dödöNia soiNia ba he nahiaNia andrö. Ba ya'ira, ba la'o'aya ndra tengetenge Lowalangi andrö, lö ba dödöra liNia ba la'igi'igi'ö ndra sama'ele'ö andrö khöNia, irege ebua sibai wönu Zo'aya, ba lö fangorifira sa'ae. Ira niha Galedaia, ba latunu nomo Zo'aya ba ladudugö göli Yerusalema, awö gödo khöra fefu, ba latunu, tobali ahori akhozi gamagamara sebua böli. Niha si lö ikhamö bawa zi'öli, i'ohe ba Mbabeli razo Mbabeli, i'oloi'ö, ba tobali sawuyunia ira ba sawuyu ndraononia, irugi labe'e barö mbawara ira niha Weresia.Ba ginötö da'ö, itörö zi no tohöna Iŵa'ö So'aya, nifa'ema Yeremia, sama'ele'ö : Tanö andrö, akha lafolombase fitu ngafulu fakhe wa'ara, irugi fefu luo Sabato si lö la'amoni'ö Iraono Gizara'eli, labu'asa fefu khö Zo'aya. Awena ba ndröfi si föföna wamatörö razo Giro andrö, razo Weresia, alua zi no tohöna Iŵa'ö So'aya, nifa'ema Yeremia, sama'ele'ö : Ibe'e ba dödö Giro andrö, razo Weresia, So'aya wame'e oroisa ba soiNia fefu – nifa'ohe'ö sura göi, - imane : "Da'ö niŵa'ö Giro, razo Weresia : No Ibe'e ba dangagu fefu gamatöröŵa ba gulidanö, So'aya, Lowalangi zorugo. Ya'ia zanguma'ö khögu wolau omo khöNia ba Yerusalema ba danö mado Yuda. Börö da'ö Ube'e goroisa andre : Haniha ba gotalua nösi gamatöröŵagu no ndrotondroto soi Lowalangi andrö, - ya mangawuli ia ba Yerusalema barö wolumö'ö Lowalangi andrö."- 2 Nga’ötö 36:14-16.19-23

Simanö daroma li Lowalangi.-

 

Sinunö Fanema Li : Psallite No 137 ma 126               (ma Laudate No 9, 1-2)

 

FOMBASO  II

 Taroma Li Lowalangi nihalö moroi ba zura Waulo ba niha samati ba mbanua Nefeso.-

Ya'ami ira talifusö ! 

No fondrege wa'ebua wa'asökhi dödö Lowalangi. I'omasi'ö sibai ita, irege, me no mate ita börö golalöŵada, I'orifi ita awö Keriso. Tobali, ha börö wa'ahakhö dödö Lowalangi, wa no auri ami. Börö me ha sambua ita ba khö Keriso Yesu, no I'orifi ita Lowalangi awöNia, ena'ö samatörö göi ita awöNia ba zorugo. Ifalua da'ö Lowalangi, ena'ö ba ginötö si so föna, oroma ba niha, ha wa'ebua wa'ahakhö dödö Lowalangi andrö, nibe'eNia khöda ba khö Yesu Keriso. Ba tenga moroi khömi da'ö, no buala Lowalangi. Tenga moroi ba mbuabua nilaumi, fa böi isuno ia niha. Ni'a'asogö Lowalangi sa ita, ni'a'asogö ba khö Yesu Keriso ba wamalua buabua si sökhi, si no tohöna Ihonogöi Lowalangi khöda.- Ef 2:4-10

Simanö daroma li Lowalangi.-

 

Sinunö Föna Injil : Psallite No 225 Döfi B                   (ma Laudate No 90, 3)

 

INJIL 

Turia Somuso Dödö khö Yesu Keriso nisura Yohane.- 

Me luo da'ö, Imane Yesu khö Nikodemo : "Hulö gulö andrö nituwu Moze yaŵa ba döla geu ba danö si mate, simanö göi lö tola lö'ö te'alaŵa'ö yaŵa dania Nono Niha andrö, ena'ö lasöndra wa'auri si lö aetu dozi samati khöNia. Simanö sa wa'omasi Lowalangi soi niha, irege Ibe'e NonoNia si ha samösa, ena'ö lö tekiko dozi samati khöNia, ba hiza, ena'ö so khöra wa'auri andrö. Tenga sa ba wanguhuku soi niha Ifatenge ba gulidanö NonoNia Lowalangi, ba hiza, ena'ö te'orifi khöNia soi niha. Lö Ihuku Lowalangi zamati khö NonoNia; Ihuku zi lö mamati, me lö mamati ira ba khö Nono Lowalangi andrö si ha samösa. Danedane wanguhuku, ya'ia : No möi ba gulidanö Haga andrö, ba hiza, abölö la'omasi'ö niha zogömigömi moroi ba haga, börö me lö sökhi nilaura. Lö la'omasi'ö haga dozi niha solau si lö sökhi ba la'ondrasi haga, fa lö oroma gamuatara. Niha solau somasi Lowalangi zangondrasi haga, ena'ö oroma, wa si faudu ba zomasi Lowalangi nilaura."- Yoh 3:14-21

Simanö duria somuso dödö khö Zo'aya ya'ita, Yesu Keriso.-

 

 

CRUX SPES UNICA SALIB HARAPAN SATU-SATUNYA 

RÖFA TANDRA WANÖTÖNA SI LÖ TEBULÖ

Bakha ba wombaso sisara nihalö moroi ba zura nga’ötö, te’oroma’ö khöda hewisa Ndraono Gizara’eli andrö sauli’auli mangerogö Lowalangi. He ira ere ba he niha sato, lafalua zogoro niha mendruamanö zogoro Lowalangi. Ba hiza, lö adagedage Lowalangi wamangelama ya’ira irege ifatenge zama’ele’ö wanegu ya’ira. Hadia zalua, la’o’aya zama’ele’ö andrö ba la’igi’igi’ö. Ba gafuriata, ebua sibai wönu Lowalangi irege ibe’e ira barö mbawa razo Mbabeli ba wangosawuyu ya’ira.

Ba wombaso si sara andre sindruhu I’oroma’ö khöda mbuabuada si’ero ma’ökhö. Asese sibai simane Ndraono Gizara’eli ita göi ba wangobadödöida Lowalangi. Asese ta’erogö ia ba talau zi lö faudu moroi ba goroisaNia. Ba hiza lö aboto ba dödöda wa lö adagedage göi ia ba wangomasi’ö ya’ita ena’ö tafalalini gera’erada. Moguna göi aboto ba dödöda wa na no afönu wönu Lowalangi khöda zamösana, tola manö göi ihuku ita. Ba hiza, na tafalalini gera’erada ba lö mamalö ihakhösi tödö ita. 

Bakha ba wombaso sidua andre nihalö moroi ba zura Nefeso, idunödunö göi khöda Faulo wa no  fondrege wa’asökhi dödö Lowalangi andrö. Hewa’ae no mate Keriso andrö ba döla röfa ba wamu’a sulö horöda, ba hiza lö mamalö ihakhösi tödö ita ya ia wa I’orifi göi ita awö Keriso andrö. Fefu da’e no buala Lowalangi ba niha.

Ba wombaso sidua andre sindruhu ifuli ifangöhösi khöda hewisa wa’omasi Lowalangi nösi gulidanö andrö. Tenga ha ira sama’ele’ö sa’ae nifatengeNia ba wanegu niha gulidanö ba hiza, ibe’e göi nonoNia andrö siha sambua. Ba wame’eNia onoNia andrö, itehe teforöfa ba mate simane niha sebua horö he wa’ae lö horöNia.

Bakha ba wombaso Turia Somuso Dödö tarongo hewisa wahuhuosa Yesu andrö faoma Nikodemo ba zibongi. Hulö gulö töla andrö nituwu ba ba danö simate, simanö göi dania Nono Niha andrö te’alawa’ö ena’ö lasöndra wa’auri si lö aetu dozi samati khöNia. Ba da’e dania oroma wa tenga ba wanguhuku möi Nono Niha andrö ba hiza ba wangöhöli ya’ira moroi ba huku horö fa’amate.

Nikodemo andrö simöi mangondrasi Yesu andrö ba zibongi no sambua tandra wa lö afönu wa’afadudu dödö  Nikodemo andrö khö Yesu. No isalahini ita Nikodemo andrö wangombakha wa no omasi manö nasa niha wamalua sogömigömi andrö. Ba da’ö ifuli ifangöhösi khöda Yesu wa lö ihuku Lowalangi dozi samati; ba hiza ihuku göi niha si lö mamati andrö.

Bakha ba daroma li Lowalangi nirongoda ba zima’ökhö andre, sindruhu tefasugi ba dödöda hewisa lala wa’aurida ya’ita niha gulidanö ba hewisa göi wa’omasi Lowalangi andrö. Ba wombaso sisara I’oroma’ö khöda hewisa lala wa’aurida sauli’auli mangerogö Lowalangi ba hiza asese göi ifuli ihakhösitödö ita Lowalangi na mangalulu ita khöNia. Hewa’ae lö mamalö tafalua ngawalö horö, lö mamalö ihakhösi tödö ita Lowalangi irege ifatenge NonoNia andrö ba wangöhöli ya’ita.

Ba wamatengeNia OnoNia andrö, sindruhu I’oroma’ö irege mate ba röfa. Fangoroma’öNia andrö no amaedola gulö töla no andrö khö Moze. Dozi sangoro’ö tangania ba auri. Ba döla röfa göi I’oroma’ö khöda Lowalangi NonoNia andrö, ba dozi samati khö NonoNia andrö ba lasöndra wa’auri si lö aetu.

Ba gafuriatania tola ta’erönusi göi, hewisa ita wangoroma’ö fa’omasida andrö khö Lowalangi? No ta’ila wa’omasi Lowangi ba niha gulidanö irege itehe teforöfa NonoNia andrö. Tola göi ta’oroma’ö wa’omasida andrö ba lala wa’aurida ba wamalua somasi Lowalangi ba ta’aröu’ö ita moroi ba ni’ogorofiNia. Fangoroma’öda fa’omasida andrö tebörögö ia ba wa’afaduhu dödöda ba röfa andrö wa no fanötönada si lö tebulö. Amen.