Renungan Natal Siang Dalam Bahasa Nias.

  "Taroma Li Sitobali Õsi Niha"

Bacaan: Yes.52: 7-10; Ibr. 1:1-6; Yoh. 1:1-18.

Fanõrõ tõdõ fa’atumbu Zo’aya ni’owasainida andre, sindruhunia idõnia’õ ita wo’erõnusi wa fa’atumbu Zo’aya zangabõlõ’õ famatida ba walukhata khõ Yesu ba ba wamaduhu’õ Ya’ia si no Ono Lowalangi, simane nifaduhu’õ, “No I’oroi ba mbõrõta, asese sibai ba sifao ngawalõ lala I’oguna’õ Lowalangi wahuhuosa khõndra furugõda sifao ira sama’ele’õ, ba hiza ba zafuria andre fahuhuo ia khõda sifao fama’ema Nono-Nia.”

Mangowasaini fa’atumbu Zo’aya idõnia’õ ita wanõndra sambua lala wanga’aro’õ wamatida ya’ia wa’atobali õsi niha Lowalangi andrõ. Bakha ba duria somuso dõdõ andrõ nisura Yohane iwa’õ: “Ba mbõrõta ba no taroma li, taroma li andrõ ba no tobali niha ba so ia ba gotaluada.” Lowalangi zanga’asogõ banua siyawa awõ danõ ba fefu nõsinia ma’afefu, ba ya’ia gõi zanga’azõkhi ya’ita, niha. Iada’a tobali gõi ia niha ba torõi ia ba gotaluada. Bazimanõ niha andrõ no sambua boto niha andrõ no sambua nahia fondrege zisõkhi ba dõdõ Lowalangi. Ba da’e ta’ila wa Lowalangi andrõ so ia ba mboto nawõda niha ba mboto niha fefu. Ba da’e ta’ila hewisa wa’ahatõ Lowalangi ba mboto wa’aniha andrõ, ni’a’azõkhi-Nia sifakhilikhili khõnia. Lowalangi fondrege ni’amoni’õ andrõ ba no tobali ia Lowalangi sifahuwu, sahatõ, sanandra lahe wa’anihada. Lowalangi andrõ gõi tenga ha torõi ia ba gotaluada, ba hiza ibokai wa’auri-Nia ba wangomasi’õ, auri ba mate soguna ba niha. Fahuhuo khõda Lowalangi andrõ sifao fama’ema nono-Nia Yesu si no ono sawuyu situmbu andrõ. Ya’ia Imanuel, awõda Lowalangi. Ba zimanõ ba wa’atumbu-Nia andrõ tasõndra wanõtõna sibohou, fanõtõna wa tasõndra wa’omuso dõdõ  ba fangõhõli ba wefao khõ-Nia. Ya’ia andrõ no haga sindruhu simõi ba gulidanõda.

Yesa zamasugi ba dõdõ ba dõdõ ba sanuriaigõ turia somuso dõdõ ba niha saetu fanõtõna, wa “Lowalangimõ andrõ ba no Razo”. No ifuli so Lowalangi, tumbu ba gotalua soi andre. Bõrõ da’õ mi’omusoi’õ dõdõmi, me no so Zo’aya wondrara tõdõ soi-Nia. No ihõli Lowalangi Yerusalema, ba no I’oroma’õ danga-Nia sabõlõ andrõ fõna fefu soi. Fe’aso Lowalangi andrõ sitobali niha lo mamalõ fao ia ba lala wa’aurida. Fahuhuo Lowalangi andrõ sifao fama’ema Nono-Nia sihasamõsa andrõ. Fe’aso-Nia andrõ ba no danedane wanõtõnada ba ziso mifõna, wa bõrõ Yesu Keriso andrõ tasõndra wa’auri si lõ aetu ba Zorugo.

Fa’atumbu Zo’aya zamohouni ya’ita tobali ono haga, bõrõ me haga sindruhu no tumbu bakha ba dõdõda ba ba wa’aurida, sangalaini fa’ogõmigõmi ba wa’aurida. Bõi ta famalõmalõ ta’o’aurifagõ haga razo wa’atulõ andrõ, ya’ia andrõ no taromali si tobali õsi niha ba so ia ba gotaluada. Ba yaita gõi ba gafuriatania tobali ita haga ba nawõda niha. Amen.