Bacaan dan Renungan Dalam Bahasa Nias ; Fombaso ba Homili Luo Migu Si - XXX.

FOMBASO I

Taroma Li Lowalangi nihalö moroi ba zura Moze, si dua.-

Da'e niŵa'ö Zo'aya : Niha si fatewu, böi mifakao ba böi mifalangögö. Böi olifu ami, wa niha si fatewu göi ami ba danö Mesirayi, me luo no. Lakha mbanua, si lö sanolo, ba iraono si lö ama si lö ina, böi mifakao. Na mifakao ira ba na mu'ao'ao ira wangandrö fanoloGu, tatu Ufondrondrongo we'aora. Awena tesao wönuGu ba Ubunu ami faoma föda nudumi. Ba tobali lakha mbanua ngambatömi ba si lö ama si lö ina ndraonomi. Na öbe'e nifalali gefe ba niha si numana, si so ba ngaimö böi sangebua hare ndra'ugö khönia; böi mifohare khönia. Na öhalö gade mbaru sebua khö nawöu, ya öfuli khönia fatua lö aekhu luo. Awai sa gambala mbotonia, ha barunia andrö. Hadia sa'ae ibe'e ambalania, na mörö ia ? Na mangaröngarö ia tanö fönaGu, Ufondrondrongo ngaröngarö dödönia, me no sahakhö tödö Ndra'odo. 2 Moz 22:21-27

 Simanö daroma li Lowalangi.-                Sato : Ma'andrö …

 

Sinunö Fanema Li : Psallite No 15                               (ma Laudate No 164)

  

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Desalonika.-

Ya'ami ira talifusö !

Lö olifu ami, hewisa ndra'aga ba khömi, me soga nasa ba gotaluami. Ba no tobali solo'ö khöma ami, eluaha solo'ö khö Zo'aya samösa. No mifonaha daroma li andrö; he ŵa'ae göna ami ngawalö wamakao. Ba no so khömi wa'omuso dödö nibe'e Geheha Ni'amoni'ö. Andrö no tobali famaedo ami ba niha keriso fefu, he si so ba Makedonia ba he ba Nakhaya. Moroi ba khömi sa terongo daroma li Zo'aya andrö, tenga ha ba Makedonia ba ba Nakhaya, gofu heza teturia wamatimi andrö khö Lowalangi, irege lö moguna sa'ae itörö lima. Gofu heza ladunödunö niha sanandrösa ba mbua si falawu moroi ba we'asoma ba gotaluami. Oi ladunödunö hewisa wondröimi adu andrö ba fangondrasimi Lowalangi sauri ba sindruhu ba we'amöi ngoningoniNia. Ladunödunö göi hewisa ami ba wodönadöna fa'ato'ele Nono Lowalangi andrö moroi ba zorugo, ya'ia Yesu, si no I'orifi Lowalangi mangawuli, me no mate Ia. Ya'ia göi zangorifi ya'ita moroi ba wanguhuku si so dania. 1Tes 1:5c-10

Simanö daroma li Lowalangi.-                Sato : Ma'andrö... 

 

Sinunö Föna Injil : Psallite No 267                                 (ma Laudate No 98)

 

 INJIL

 Turia Somuso Dödö khö Yesu Keriso nisura Matai'o.-

Me luo da'ö, so samösa ba gotalua ndra farizai'o, sangila amakhoita, ifesu li Yesu ba wanofu, imane : "He Guru, hezo goroisa sabölö ebua ba zura goroisa andrö ?" Itema linia Yesu, Imane : "Omasi'ö Zo'aya, Lowalangiu, moroi si'aikö ba dödöu, si fao fa'edöna dödöu ba si fao era'erau ma'asambua. Da'ö goroisa sabölö ebua ba sabölö moguna. Oroisa si dua si fagölö andrö : Omasi'ö nawöu, simane fangomasi'öu ya'ugö. Fefu huku nibe'e Moze awö wamahaö ndra sama'ele'ö modanedane ba goroisa si dombua andrö !"  Mat 22:34-40

Simanö duria somuso dödö khö Zo'aya ya'ita, Yesu Keriso.-

 

 * OROISA FA’OMASI *

Ba wombaso sifõfõna nirongoda moroi ba zura Moze si dua, idunõdunõ hewisa wanegu Zo’aya ba ndraono Gizara’eli andrõ. So’aya zanguma’õ: niha sifatewu ba bõi mifakao ba bõi mifalangõgõ bõrõ me sifatewu gõi ami meluo no ba danõ Misirai. Lakha mbanua ba iraono si lõ ama si lõ ina bõi mifakao. Fefu da’e oi fanegu Ndraono Gizara’eli. Fanegu Zo’aya andre ifa’ema bõrõ me angandrõwa dõdõ niha sigide’ide andrõ ba alio irongo.

Ba wombaso sisara andre edõna ifaehagõ khõda So’aya wa ifatema’õ ba niha hadia zomasi lalau ba nawõda niha. Tarongo mege na lõ la’o’õ niwa’õNia andrõ ba ibe’e zulõ tõra moroi ba nilau Ndraono Gizara’eli andrõ. Fehede Zo’aya andre tenga bõrõ wa lõ omasi ia Ndraono Gizara’eli andrõ, ba hiza edõna ia ena’õ lõ mamalõ faoma la’omasi’õ nawõra Iraono Gizara’eli andrõ.

Ba wombaso sidua tarongo hewisa Menemene Waulo andrõ ba mbanua Desalonika. I’ombakha’õ hewisa wa’omuso dõdõnia ba wa’aro wamati ndra niha Desalonika andrõ ba wanema’õra Lowalangi. Ira niha Deslonika andrõ larõi nadura ba latema’õ ba lasuno Lowalangi moroi si’aikõ ba dõdõra. Da’e dania wa’iwa’õ Faulo wa tenga ha ba moroi ba Makedonia ba moroi ba Nakhaya terongo duria somuso dõdõ andrõ ba hiza moroi ba danõ Desalonika gõi.

Fa’omuso dõdõ Waulo andre ba wombaso si dua, edõna ifaehagõ khõda hewisa wa’omasi salua ba gotalua niha Desalonika andrõ ba khõ Lowalangi. Larõi fefu nudura andrõ ba la’oigõ dõdõra wanema Turia somuso dõdõ andrõ, ba lasuno Lowalangi. Andrõ dania wa fangomasi’õra Lowalangi andrõ teturia tobali dumaduma ba niha samati ba zisagõrõ ulidanõ.

Bakha ba wombaso injil sindruhu tarongo hewisa niha farizai’o andrõ sanandraigõ Yesu. Ba gafuriata, ibe’e dombua wurugõ goroisa andrõ Yesu sanguma’õ: Omasi’õ Lowalangiu Yehowa moroi si’aikõ ba dõdõu, sifao fa’edõna ba sifao eraerau ma’asambua. Ba simendrua ba omasi’õ nawõu simane fangomasi’õu ya’ugõ. Ba wamalua oroisa sidombua andre ba bada’e modanedane fefu goroisa andrõ.

Õsi wombaso injil andre edõna ifaehagõ gõi khõda hewisa ita wangomasi’õ Lowalangi andre, ena’õ sindruhu si’oroi ba dõdõ, tenga ha si’oroi ba mbewe ma ha ba ni’ila niha. Ba simendrua nia hewisa gõi ita wangomasi’õ awõda niha. Fangomasi’õ awõda niha simane na ta’omasi’õ botoda samõsa. Na omasi ita sõkhi ba si lõ tola lõ’õ sifõfõna talau ua zisõkhi.

Ba zitõlu ngawua wombaso nirongoda ba zima’õkhõ andre, edõna ibe’e khõda sambua goroisa sebua so’amarahuta ba wombaso injil. Fangomasi’õ Lowalngi andrõ bõi asalanoa manõ. Ba hiza ena’õ mowua ia. Yakobo zi no irai manguma’õ: “Famati si lõ bua, ba no zayazaya gõlõ”. Da’e nõsi nifaehagõ Waulo ba mbanua Desalonika andrõ. Fangomasi’õ sowua andrõ tobali turia si sokhi ba Niha fefu.

Baero da’õ fangomasi’õ awõda niha ena’õ gõi tefalua ia si’oroi si’ai ba dõdõ ba tenga bõrõ wanema sulõ awena talau wa’omasi ba nawõda niha. Fangomasi’õ awõda niha andrõ ena’õ simane fangomasi’õda botoda samõsa. Me ba wangomasi’õda awõda niha andrõ sindruhunia nota’omasi’õ Lowalangi. Da’e zedõna ifa’ema khõda ba wombaso sisara mege. Ba hiza na lõ ta’omasi’õ nawõda, ba tõra moroi ba da’õ lõ I’omasi’õ ita Lowalangi.

*AMEN*