TAROMA LI LOWALANGI LUO MIGU WA'ARAZO ZO'AYA YA'ITA YESU KERISO DOFI A

FOMBASO I

 Taroma Li Lowalangi

nihalö moroi ba zura Hezeki'eli, sama'ele'ö.-

 

Da'ö niŵa'ö Zo'aya, Yahwe : Hiza Ndra'odo ba wangalui biribiriGu andrö ba ba wamaigimaigi ya'ira. Simane famaigimaigi samösa gubalo biribiri, na luo so ia ba hunö mbiribirinia, si no muzaewe, simanö dania U'alui mbiribiriGu, ba U'orifi ira moroi ba danö andrö misa fefu ba nifazaewe ya'ira, me luo ihawui fa'ogömigömi lawuo.

Ya'odo dania zokubaloi biribiriGu ba samasao ya'ira ba naha wolombasera, Iŵa'ö So'aya, Yahwe. Si no elungu, U'alui. Si no muzaewe, Uhalö mangawuli. Ba ba zesokho, Ulau daludalu; ba sofökhö, U'abe'e'ö. Biribiri satabö ba sabölö, U'öligö.- U'onangegö wokubaloi ya'ira.

Ya'ami, biribiriGu,- da'ö niŵa'ö Zo'aya, Yahwe, Ya'o samösa zamatunö zalua ba gotalua mbiribiriGu : U'o'awögö zi lö fa'abölö moroi ba zabölö.-                    Hez 34:11-12.15-17

 

Simanö daroma li Lowalangi.-                    Sato : Ma'andrö...

 

Sinunö Fanema Li : Psallite No 23 ma 147, 1-3       (ma Laudate No 103,1-2)

 

 

FOMBASO II

 Taroma Li Lowalangi

nihalö moroi ba zura Waulo si föföna

ba niha samati ba mbanua Gorindro.-

 

Ya'ami ira talifusö !

No te'orifi mangawuli Keriso moroi ba wa'amate. Da'e zi tobali lohelohe, wa te'orifi mangawuli dania niha si no mate. Me no moroi ba zi samösa niha sa wa'amate andrö,

moroi ba zi samösa niha göi wemaoso zi mate andrö. Fefu niha no barö wa'amate, börö me farahu khö Gadamo, ba simanö göi tola te'orifi fefu, börö me farahu khö Keriso. Ba hiza, te'orifi ira molo'ö ngenolinia : Si föföna Keriso, ba fanetenia,- na tohare Ia mangawuli, - niha si no tana khöNia. Ba awena gamozua andrö, na no Iheta wamatörö fefu ba fa'asalaŵa fefu ba fa'abölö fefu ba na Ibe'e ba danga Lowalangi Ama wamatörö andrö.Lö sa tola lö'ö salaŵa Keriso, irugi Ibe'e Lowalangi barö gaheNia nudu fefu. Udu safuria nihetaNia, ya'ia wa'amate andrö.- Ba na no mube'e barö mbawa Nono fefu hadia ia, awena möi göi Nono barö Zi no mame'e barö mbawaNia fefu hadia ia, ena'ö ha sambalö Lowalangi andrö Zo'aya fefu hadia ia.- 

1 Kor 15:20-26.28

Simanö daroma li Lowalangi.-             Sato : Ma'andrö …

 

Sinunö Föna Injil : Psallite No 252                            (ma Laudate No 103, 3)

 

INJIL

 

Turia Somuso Dödö khö Yesu Keriso nisura Matai'o.-

 

Me luo da'ö, Imane Yesu khö ndra nifahaöNia :

"Na so Nono Niha andrö bakha ba lakhömiNia, na fao khöNia ndra mala'ika andrö fefu, dumadao dania Ia ba dadaoma wa'arazoNia. La'owuloi dania fönaNia fefu soi.  Iföfö'ö ira Razo andrö, simane na iföfö'ö ira mbiribiri ba nambi kubalo : Ifa'aso ba gambölönia mbiribiri, ba gaberania nambi. (Niha si no molau satulö I'owuloi Razo andrö tanö ba gambölöNia, si no molau si lö atulö tanö ba gaberaNia.)

Imane dania Razo andrö ba niha si so ba gambölöNia : Mi'aine, ya'ami nifahowu'ö NamaGu, mitema gondröita andrö, amatöröŵa andrö, si no muhönagö khömi i'otarai mböröta danö. Me olofo Ndra'o, no mibe'e göGu; me owökhi dödöGu, no mibe'e nibaduGu nidanö; me si fatewu Ndra'o ba khömi, no mitema Ndra'o ba nomomi; me lö nukhaGu, no mifonukha Ndra'o; me mofökhö Ndra'o, no mirorogö Ndra'o; me soDo ba gurunga, no möi ami wamaigi Ya'o.-

Laŵa'ö niha si no molau satulö andrö :

He So'aya, hamega ma'ila solofo Ndra'ugö ba mabe'e göU ? Ma sowökhi tödö Ndra'ugö ba mabe'e öU nidanö ? Hamega ma'ila si fatewu Ndra'ugö ba khöma ba matema'ö Ndra'ugö ba nomoma ? Ma si lö nukha Ndra'ugö ba mafonukha'Ö ? Hamega ma'ila sofökhö Ndra'ugö ba marorogö Ndra'ugö ? Ma no labe'e Ndra'ugö ba gurunga, ba no möiga wamaigi Ya'ugö ?

Itema lira dania Razo andrö, Imane khöra :

Sindruhu niŵa'öGu khömi : Me milau da'e fefu ba dalifusöGu andrö, fondrege zi numana, no khöGu milau da'ö.-

Awena Imane Razo andrö ba niha si so ba gaberaNia :

Mi'ofanö ba da'e, ya'ami ni'elifi, - mi'ae'e ba galitö andrö si lö matemate,  si no i'asiwai khömi afökha, awö ndra enoninia ! Börö me olofo Ndra'o, lö mibe'e göGu; me owökhi dödöGu, lö mibe'e nibaduGu nidanö; me niha si fatewu Ndra'o ba khömi, lö mitema Ndra'o ba nomomi; me lö nukhaGu, lö mifonukha Ndra'o; me mofökhö Ndra'o ba me soDo ba gurunga, lö si möi ami mamaigi Ya'o.-

Ba latema dania liNia, ya'ira göi, lasofu :

He So'aya, hamega ma'ila olofo Ndra'ugö, - ma sowökhi tödö, - ma niha si fatewu Ndra'ugö, - ma si lö nukha, - ma sofökhö, - ba ma si so ba gurunga, ba lö ba dödöma Ndra'ugö ?

Imane wanema li Razo andrö: Sindruhu niŵa'öGu khömi :

Si lö milau khö dalifusöGu andrö, fondrege zi numana, haniha ia, ba khöGu göi lö nilaumi da'ö. Tobali : Ya'ira andrö zi göna fanguhuku si lö aetu andrö. Niha solau satulö andrö, möi ira ba wa'auri si lö aetu andrö !"

Mat  25:31-46

Simanö duria somuso dödö khö Zo'aya ya'ita, Yesu Keriso.-

 

=============================================================

WA'ARAZO  ZO'AYA  YA'ITA  YESU  KERISO

NO FEMÖNA NIHA SAMATI

Ösi Wombaso Siföföna:

Ba wombaso sisara nirongoda nihalö moroi ba zura Hezeki’eli sama’ele’ö idunödunö khöda wehede Zo’aya andrö, Yahwe. Lowalangi andrö no ifo’amaedola ia simane samösa kubalo sangalui biribirinia sizaewe ba danö. Na so mbiribirinia selungu ba I’alui, ba na so mbiribiri sesokho ba ibe’e daludalu, ba tanöbö’önia na.

Fehede Zo’aya andre nifa’ema Hezeki’eli edöna I’ombakha’ö khöda hewisa wa’omasi Lowalangi andrö ba soi niha fefu. Fefu niha andre ba no hulö mbiribiri ba So’aya andrö na no amaedola gubalo. Ba da’e I’oroma’ö khöda hawa’ebua wa’omasi Lowalangi andrö ba soi niha. Lö mamalö I’alui ita fefu gofu heza so ita. I’omasi’ö ita hewa’ai no afönu horö ita, ba hiza I’efa’ö khöda fefu horöda andrö. Baero da’ö ibe’e ita ba naha si sökhi andrö khö-Nia irege tebai I’alani ita sedöna mangalani ya’ita ya’ia gafökha andrö.

­­

Ösi Wombaso sidua:

Ba wombaso sidua nirongoda nihalö moroi zura Waulo andrö ba mbanua Gorindro, edöna ifaehagö khöda Faulo wa Yesu andrö no sia’a ia ni’orifi moroi ba gotalua zimate andrö fefu. Börö wa’afarahuda andrö khö Gadamo wa so ita barö wa’amate, ba hiza börö wa’afarahuda khö Keriso göi wa’auri ita dania moroi ba gotalua zimate andrö. Ba ba gafuriata, ibe’e dania Lowalangi barö mbawania fefu wamatörö andrö.

Ba wehede Waulo andre ibotokhi ba dödöda wa: Adamo andrö eluahania nihalö moroi ba danö. Bawa’afarahuda khö Gadamo andrö yaia we’asoda ba mboto wa’aniha, yaia mboto tanö andre. Ba zimanö boto tanö andre lö zilö mamalö mangawuli ia ba danö. Da’ö wa’iwa’ö ba wa’afarahuda khö Gadamo andrö so ita barö wa’amate. Börö wamati farahu ita khö Keriso, da’e göi dania mbörö wa tasöndra wa’auri si lö aetu andrö ya’ia wa’auri nosoda zamösana. Fame’e Lowalangi amatöröwa khö Yesu andrö ya’ia ngalua safuria andrö nifotöi dania fe’asonia ba wanusugi fefu niha si no mate ba iföfögö simane biribiri andrö khönia nirongoda ba wombaso siföföna.

 

Ösi Wombaso Injil:

Bakha ba duria somuso dodo nirongoda, ifaehagö khöda hewisa we’aso Nono Niha andrö ba gamatöröwaNia ba iföfögö zolo’ö li NamaNia andrö moroi ba zi lö’ö. Ba zolo’ö ibe’e ba gambölöNia ba si lö molo’ö ba ba gaberania. Ba niha si so ba gambölöNia iwa’ö: Mi'aine, ya'ami nifahowu'ö NamaGu, mitema gondröita andrö, amatöröŵa andrö, si no muhönagö khömi i'otarai mböröta danö. Ba niha si so ba gaberaNia : Mi'ofanö ba da'e, ya'ami ni'elifi, - mi'ae'e ba galitö andrö si lö matemate,  si no i'asiwai khömi afökha, awö ndra enoninia !

Ba wombaso turia somuso dödö andre edöna ifasugi ba dödöda heza so ita zamösana; hadia sifao ba niha solo’ö somasi Lowalangi ya’ia zi so ba gambölö ma si lö molo’ö li Lowalangi ya’ia zi so ba gambera? Moguna tafareso dödöda, no ibe’e khöda la’ala’a wanguma’ö: Solo’ö somasi lowalangi andrö yaia niha sangobadödöi niha sigide’ide andrö ba wa’olofo ; ba wa’owökhi dödö; ba wanema’ö niha sifatewu, ba zi lö nukha; Ba ba zi so ba gurunga.

 

Amarahuta Wombaso:

Ba zitölu ngawua wombaso andre, edöna ifaehagö khöda hewisa ba luo safuria ba wa’atohare nono niha andrö bakha ba gamatöröwaNia ya’ia ba we’amöiNia razo soi fefu. Meno ihonogöigö dödönia wogaoni niha ma’afefu, awena dania I’etu’ö hukura zamösana. Yesu si no tengetenge nama, edöna dödönia wangöhöli fefu soi niha moroi ba huku horö fa’amate. Bua wangöhöliNia andrö ya’ia wemaosoNia moroi ba gotalua zimate. Ya’ia ziföföna ba awena ya’ita samati khönia nisusuginia dania ba ginötö wanguhuku andrö. Ya’ita samati si no mama’anö ba molo’ö somasi Lowalangi ba fao ita ba gambölöNia andrö, ba si lö mamati göi so ira ba naha we’e ba fatangisa mboha ba galitö siholahola andrö.

 

Famatöfa ba lala wa’auri si’ero ma’ökhö:

Moguna manofu ita ba dödöda fefu zamösana, hadia ba gambölö fao ita ma ba gabera? Na omasi ita fao ba gambölö datafareso dödöda, hadia no ta’o’ö niwa’ö Yesu andrö? Me olofo Ndra'o, no mibe'e göGu; me owökhi dödöGu, no mibe'e nibaduGu nidanö; me si fatewu Ndra'o ba khömi, no mitema Ndra'o ba nomomi; me lö nukhaGu, no mifonukha Ndra'o; me mofökhö Ndra'o, no mirorogö Ndra'o; me soDo ba gurunga, no möi ami wamaigi Ya'o.-

Ba zimanö, moguna ta’erönusi hadia Wa’olofo, fa’owökhi dödö, sifatewu, si lö nukha, so fökhö, ba si so ba gurunga? Fefu da’e no lala wa’auri nitöröda si’ero ma’ökhö. Baero da’ö, ifasugi göi ba dödöda Yesu wa famalua fefu da’ö yaia ba niha side’ide andrö? Hadia Geluahania da’ö? Eluahania ya’ia wa moguna göi mowua wamatida andrö ba lala wa’aurida si’ero ma’ökhö ba tafalua ia ba niha sifalukha ya’ita. Amen.