OROISA NATAL
KONFERENSI WALIGEREJA INDONESIA (KWI)
BA
PERSEKUTUAN GEREJA-GEREJA DI INDONESIA (PGI)
“TALABU MӦI ITA BA MBETILEKHEMA….”
(LUKA 2:15)
Ya’ami ira talifusӧ ni’omasi’ӧ.
“No tumbu khӧmi zangorifi andrӧ, bongi andre, Keriso, So’aya ba mbanua Dawido” (Luka 2:11). Turia somuso dӧdӧ andre nifa’ema ndra mala’ika khӧ ndra kubalo. Me no larongo duria somuso dӧdӧ andrӧ, i'anema’ӧ lafaoso ira, ira kubalo, larӧi mbiribirira ba mu’ao ira “Talabu mӧi ita ba Mbetilekhema….”, sifao sato wofanӧ wangalui nahia wa’atumbu Yesu. Ba lasӧndra nono sawuyu andrӧ, Yesu, si no mufagaya yaŵa ba luha.
Ira kubalo ba no khalakhala niha si numana ba si to’ӧlӧ manӧ sanou’ӧ fanӧtӧna ba wangӧhӧli andrӧ khӧ Lowalangi. Asese sibai lafaigi ira tobali niha nibaerogӧ ba si lӧ la’erai ba ngenoli wa’auri sifao sato. Hewa’ae simanӧ, ya’ira andrӧ niha sifӧfӧna nifili Lowalangi zamondrondrongo turia wangӧhӧli andrӧ somuso dӧdӧ. Fehulu dӧdӧ awӧ wa’ahele dӧdӧ ba wanema’ӧ turia wangӧhӧli andrӧ, tobali dumaduma khӧda ena’ӧ ya’ita gӧi, i’anema’ӧ tafaoso ita sifao sato ba wamalukhaisi Yesu.
Me no falukha khӧ Yesu, larasoi ira kubalo wa tebohouni lala wa’auri ba buabuara. Tebohouni ira tobali niha saro fanӧtӧna ba sifao fa’omuso dӧdӧ “lasuno ba lafolakhӧmi Lowalangi” (Luka 2:20). Howuhowu Lowalangi bakha ba walukhata andrӧ zi no mamohouni ya’ira. Hawa’ebua wa’abӧlӧ wa’omasi Lowalangi sonehegӧ ba samehulu tӧdӧra ba wamalua fanuriaigӧ sibohou.
Ya’ami ira talifusӧ ni’omasi’ӧ.
Simane ira kubalo andrӧ, ya’ita si no sambua ngawawa soi Lowalangi, tekaoni sifao sato ba wamalukhaisi Yesu, sangefa’ӧ, samadӧhӧ, sango’awӧgӧ niha ni’ewogӧ ba nibaerogӧ. Falukhata satulӧ ba sahele dӧdӧ zombali’ӧ wa tola tatema wa’abӧlӧ soroi Yesu ba wame’e famaduhu’ӧ simane fanuno ba famolakhӧmi Lowalangi”. Lakhӧmi Lowalangi andrӧ, tefalua ia bakha ba mbuabua sangoroma’ӧ fe’aso wa’omasi-Nia, ba gotalua wongambatӧsa, owuloa, Gereja, ono wobanua ba soi. Fa’omasi ba nawӧda niha tobali oroma bakha ba mbuabua sifaoma mamosumange, moharagoi, mamofa’abӧlӧ, ba mangotomosi fa’atalifusӧta ba nawӧ ba zi lӧ mamaehusi gana, agama, fa’afaduhu dӧdӧ, angowuloa, la’ala’a guli, ba fetaro ba zato. Ba zimanӧ, Fangowasaini Natal sindruhu idӧnia’ӧ ita wofanӧ sifao sato bakha ba wamati, fa’atalifusӧta, ba sifao fangobadӧdӧi awӧ.
Fanuriaigӧ fa’omasi Lowalangi itugu fakhekhe ginӧtӧ bӧrӧ me ba zi sambua moina nono wobanua khӧda, alio sibai mӧi nifa’udu ha bӧrӧ duria famaelungu ba fangaukhu dӧdӧ moroi ba niha si lӧ sӧkhi tӧdӧ. Lualuania alio so watiusa, fa’aboto lala wangerangera, ba famalua si lӧ atulӧ. Ba zitambai da’ӧ, fa’ebua dӧdӧ zambua na ba huku, fa’anumana, fatiusa dӧdӧ ba zifaehu agama, famawa nga’eu niha, famalua famaisa ba fame’e niwawalӧ ba media sosial (online), ba famakiko benua si so ba zifasui, soya manӧ nasa alua. Ya’ita sedӧna mangowasaini fa’atumbu Zolohe Fa’atulӧ andrӧ, no sinangea ta’okhӧgӧ wa’aro wamati, fa’aro wa’atalifusӧta, ba fehulu dӧdӧ ba wangobadӧdӧi awӧ. Sifao danedane wamati saro andrӧ, lӧ mo’aetufa wefaoda bakha ba wangoroma’ӧ fe’aso wa’omasi Lowalangi ba wangotomosi lala wa’auri sifao sato safӧnu fa’ohauhau dӧdӧ.
Fefao bakha ba wondrou’ӧ lala wa’auri safӧnu fa’ohauhau dӧdӧ, no tobali fogaoni fefu niha si so tӧdӧ si sӧkhi. Bӧrӧ da’ӧ, lala halӧwӧ sifao umat ba zi ha’uga agama ba ngawalӧ hada, sinangea mudou’ӧ. Sifaoma falulu fohalӧwӧ wa’atobali awӧ khӧ ndra talifusӧ sigide’ide, si tebai, si numana, nibaerogӧ ba sabӧda boto ma fangerangera; ba wa’atobali talifusӧ ba nawӧda sangalui fa’atulӧ ba huku; ba wango’awӧgӧ ira niha nihӧndrӧgӧ, sitebai manӧndra ngawalӧ zinangea simӧi khӧnia. No sinangea tobali ita awӧ wohalӧwӧ si lӧ farӧi ba wondrorogӧ tanӧ si so ba zifasui sifao fa’ahele dӧdӧ ba wondrorogӧ tanӧ niwӧwӧi Lowalangi. Ba zimanӧ, sifao ita khӧ Yesu, wolohe fa’atulӧ wamalua fanuriaigӧ-Nia ba wangombakha fangefa ba niha nikuru, fangi’ila ba niha si bidӧyӧ, ba fangefa ba niha nifakao (fahela Luka 4:19).
Ya’ami ira talifusӧ ni’omasi’ӧ.
Ta’owasaini Natal 2024 andre ba ginӧtӧ soi Indonesia manema’ӧ ndra sololohe ba negarada sibohou tefetaro. Sinangea ta’andrӧ saohagӧlӧ khӧ Lowalangi me no ta’asiwai gowasa demokrasi ba wamili sololohe amatӧrӧwa. Iada’e no inӧtӧnia ena’ӧ sifagogohe tanga ita, ba wanga’a’aro’ӧ fa’atalifusӧta, ba sifao sato wefao ba wangebua’ӧ negarada andre ni’omasi’ӧ. Ya lӧ mamalӧ ena’ӧ negarada andre Indonesia tobali “Betilekhema” sibohou, nahia wa’atumbu ba fa’atedou ndra sondrӧnia’ӧ, sangokhӧgӧ tӧdӧ we’amӧi enoni, si so famohouni, si lӧ fayaŵa ba lala wa’auri, ba sangofӧnai’ӧ soguna ba soi. Me no ono wobanua gӧi ita, bӧi tafamalӧ wanundreheni ngawalӧ lala halӧwӧ, sifao fa’osili lala wangerangera ba ngawalӧ nifalua wamareta, sedӧna mangotomosi ohitӧ dӧdӧ wa’aefa moroi ba mbawa wangosawuyu soi ba oroisa UUD’45, ya’ia wa’ohauhau dӧdӧ sifao sato sodanedane ba nӧsi Pancasila.
Ba ginӧtӧ safӧnu howuhowu andre, data’andrӧ saohagӧlӧ khӧ Lowalangi me no bӧrӧ wa’omasi-Nia ba niha gulidanӧ, itehegӧ te’ide’ide’ӧ Ia, ba wa’atobali ӧsi niha bakha ba mboto Yesu, Ono-Nia si hasamӧsa, ba torӧi ia ba gotaluada. Faduhu dӧdӧda wa bӧrӧ wa’omasi-Nia solakhӧmi andrӧ, lӧ aetu I’o’awӧgӧ ita Lowalangi, I’olohuni, ba Ituturu lala, irege amakhaitada ba nawӧda itugu mo’adu, ba amakhaitada gӧi ba danӧ si so ba zifasui, itugu sӧkhi. Mamati ita wa Lowalangi Ono andrӧ, Imanueli, lӧ farӧi Ia khӧda irugi zi lӧ aetu (fahela Matai’o 28:20). Ya bӧrӧ we’aso wango’awӧgӧ-Nia andrӧ zanga’aro’ӧ tӧdӧda ena’ӧ lӧ mo’aetufa wofanӧ sifao sato ba wanga’a’asogӧ ba ba wamalua faomasi Lowalangi sangӧhӧli andrӧ.
Ba dӧi Konferensi Waligereja Indonesia (KWI) ba Persekutuan Gereja-Gereja di Indonesia (PGI), ma’owai ami, Ya’ahowu Natal ma Fanunu Fandru ba ndrӧfi 2024, ba Ya’ahowu Ndrӧfi Sibohou 2025.
Jakarta, 12 November 2025
Mgr. Antonius Subianto Bunjamin, OSC Pdt. Gomar Gultom
Ketua Presidium KWI Ketua Umum PGI
Mgr. Paskalis Bruno Syukur, OFM Pdt. Jacklevyn F. Manuputty
Sekretaris Jenderal Sekretaris Umum
.
.
0 comments:
Posting Komentar