TAROMA LI LOWALANGI LUO NATAL SI – 2 (PESTA SANTO STEFANUS) DÖFI B

Liturgi Taroma Li Döfi A/B/C hlm. 267.

FOMBASO I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, Sitefano si no fahöna fa'ebua dödö Lowalangi ba fa'abölö, ba ilau zahölihöli dödö, awö dandra sebua ba gotalua niha sato. Ba maoso ösa moroi ba zinagoge, sotöi sinagoge niha Libertini andrö, ba moroi ba zinagoge niha Girene ba ba niha Alesandria awö zi otarai Gilikia ba Asia, ba fabu'a fehede ira khö Zitefano. Ba tebai labu'a wehedenia, börö me Ibe'e khönia wa'atuatua Eheha Lowalangi ba wahuhuosa. Ba afökhö sibai ba dödöra ba mofönu sibai ira khönia. Ba no fahöna khönia Geheha Ni'amoni'ö, ba ifaöga hörönia ba zorugo, ba i'ila lakhömi Lowalangi, awö Yesu, si so ba gambölö Lowalangi. Imane : "Hiza, teboka zorugo u'ila, ba so ba gambölö Lowalangi Nono Niha andrö." Ba mu'ao ira, ebua lira, laduhö dögi dalingara, lahurufai ia, ha sara  dödö, ba latuli'ö baero mbanua, ba latebu kara. Me latetebu Zitefano, mu'ao ia, imane : "He Yesu, So'aya, tema nosogu !" Ibalöduhini tou danö ba imane : "He So'aya, be'e aefa khöra horö andre !" Me aefa iŵa'ö da'ö, ba mate ia. Ba so ösa niha satulö tödö, sogo'o ya'ia.- HalRas 6:8-10.7:54-59

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 31                        (ma Laudate No 94 ma 7)

 

FOMBASI  II

Taroma Li Lowalangi nihalö moroi ba zura Yohane si sara.-

Taroma Li Lowalangi nihalö moroi ba zura Waulo khö Dito.-

Ya'ugö  ni'omasi'ö!

Lowalangi, sangorifi ya'ita, No Ifa'ele'ö wa'omasiNia ba fa'asökhi dödöNia khöda. No I'orifi ita, tenga me no talau zambalö zi sökhi, no me Ya'ia samösa zangomasi'ö ya'ita. Ya'ia zangorifi ya'ita ba wangehaogö andrö ni'ohalöŵögöi GehehaNia. Eheha andrö zamatumbu'ö ya'ita mangawuli bakha ba wanasa ni'amoni'ö ba same'e khöda fa'auri si bohou. Lowalangi zangöhöna EhehaNia khöda nifa'ema Yesu Keriso, sangorifi ya'ita, ena'ö börö wa'ahakhö dödöNia amakhaitada khö Lowalangi tobali sökhi mangawuli ba tasöndra wa'auri si lö aetu si no tadönadöna.- Tit 3:4-7

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 213                        (ma Laudate No 94 ma 7)

 

INJIL

Turia Somuso Dödö khö Yesu Keriso nisura Matai'o.-

Meluo da'ö, Imane Yesu khö ndra nifahaöNia : "Mi'angelamaisi niha! La'ohe sa dania ami ba rafe ba ba nomo wangandrö khöra, labözibözi dania ami. Ba ba gumandru ba ba razo te'ohe ami, börö Ndra'o, ba wamaduhu'ö khöra ba ba soi niha. Na labe'e ba dangara ami, ba böi mi'abusi tödö, he miwisa ba hadia niŵa'ömi.  Tebe'e sa khömi dania, ba da'ö sibai, hadia niŵa'ömi.  Tenga sa ya'ami zi hede, Eheha Namami andrö zi hede, na muhede ami. Ibe'e dania nibunu dalifusönia niha, ba ibe'e nibunu nononia ama, ba maoso ndraono, udu ndra amara, labunu. Ba dozi ira dania fa'udu khömi börö döiGu. Ba sanau ölö irugi gamozua, da'ö ni'orifi.- Mat 10:17-22

Simanö duria somuso dödö khö Zo'aya ya'ita, Yesu Keriso.-

 

Ilustrasi, Sumber: sesawi.Net

Erönua:

FAMADUHU’Ö SI LÖ FARÖI

Bakha ba wombaso siföföna tarongo duria niha satulö andrö. Niha sanguma’ö bakha ba khö Lowalangi auri ia, lö tola lö’ö auri ia simane fa’auri Keriso. No i'efa’ö zala niha samunu ya’ia, Stefano. Buabua Zitefano andrö no simane buabua Yesu si no mangandrö salahi niha samakao Ya’ia. Itehegö  mate ia sitefano ba wamaduhu’ö So’aya, simane Keriso göi Itehegö mate Ia soguna khöda.

Ba wombaso sidua andrö nihalö moroi ba zura Waulo andrö, itugu ibotokhi ba dödöda hewisa zalua ba zamaduhuö famati andrö. Samaduhu’ö famati andrö no nifatumbu’ö bakha ba Geheha Ni’amoni’ö. Famatumbu’ö ba Geheha Ni’amoni’ö andrö, alua ia ba ginötö wanema fanasa ni’amoni’ö. Ba börö wanasa andrö göi, lö mamalö te’ehaogö gamakhaita niha samati ba khö Lowalangi.

Ba duria somuso dödö andrö tarongo wangaro dödö moroi khö Zo’aya samösa. I’abe’e’ö dödöda wa na tafaduhu’ö Ia. Na mu’ohe niha samati ba rafe sebua, tenga niha samati andrö zifahuhuo. Ba hiza, Eheha Zo’aya zame’e ba mbewe niha samati wanema li. Simanö göi Zitefano andrö. Na dali wa’anihania, no sitebai ia wanaha kara andrö. Ba hiza börö Geheha Zo’aya si so khönia, lö mamalö abölö ia ba wamati irege lö khönia folau balö ba niha samunu ya’ia. Ba niha samunu ya’ia andrö ilau mangandrö ena’ö I’efa’ö khöra Lowalangi ngawalö zifasala ira.

Famaduhu’ö Zitefano andrö sanandrösa khö Yesu, no famaduhu’ö sindruhu. Ifaduhu’ö wamatinia khö Lowalangi sifao fa’omasi. Lö khönia fatiusa. Ha fangandrö salahi zi so khönia. Hewisa ita göi wamaduhu’ö famati andrö? Famaduhu’öda famati andrö tenga balazi mate simane Sitefano. Ba hiza, famaduhu’öda famati andrö tola ta’oroma’ö ia ba lala wa’auri si ero ma’ökhö, ya’ia ba wehede ba bagamuada. Da’e dania wa lö mamalö sahele tödö ita wamalua fefu da’ö, börö wefao Geheha Ni’amoni’ö andrö. amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa  Yogyakarta: Kanisius, 2019

St. Eko Riyadi, Pr, Matius “Sungguh, Ia Ini Adalah Anak Allah!” Yogyakarta: Kanisius, 2011