LITURGI TAROMA LI DÖFI A/B/C, hlm. 168.
FOMBASO I
Taroma Li Lowalangi nihalö moroi ba zura Wa'atuatua.-
He So'aya, Ya'ugö zondrorogö fefu hadia ia. Ha Ya'ugö Lowalangi, lö tanö bö'ö. Andrö lö moguna, Ötema li gofu haniha ia ba zanandrösa gangetulaMö. Börö me Öfatörö fefu hadia ia, andrö wa Ö'oroma'ö wa'ebolo dödöU ba zi so fefu. Awena Ö'oroma'ö wa'abölöU, ha na lö faduhu dödö niha khöU, wa lö zi lö itörö wamatöröMö ba Ö'ailasi wa-lö-fa'aiŵö niha andrö sangila famatöröMö andrö. Ba hiza, Ya'ugö, sabölö ba wamatörö, Ö'atulö'ö ba wa'ahakhö dödöU ba Öhaogö sibai khöma, me lö si tebai ba khöU. Ba wolau simanö, ba no Öfahaö soiMö, wa böi zi lö ahakhö dödö niha satulö ba nawönia niha. Ba mendrua manö Öbe'e wanötöna ba ndraonoMö, wa Öbe'e ginötö ba wamalalini era'era, na fasala ira.- Fa’at 12:13.16-19
Simanö daroma li Lowalangi.- Sato : Ma'andrö …
Sinunö Fanema Li : Psallite No 86 (ma Laudate No 85 ma 47)
FOMBASO II
Taroma Li Lowalangi nihalö moroi ba zura Waulo ba niha samati ba mbanua Roma.
Ya'ami ira talifusö!
Eheha Lowalangi zanolo ya'ita, me no ambö wa'abölöda. Börö me lö ta'ila, hewisa zi sökhi wangandröda. Ba Ya'ia, Eheha andrö, I'o'awögö ita föna Lowalangi ba wangaröngarö si tebai alua baeha. Ba Lowalangi, sangila tödö niha, zangila ohitö dödö Geheha andrö, me no I'o'ö zomasi Lowalangi, na mangandrö Ia salahi ndra niha si no tana khö Lowalangi.- Rom 8:26-27
Simanö daroma li Lowalangi.- Sato : Ma'andrö …
Sinunö Föna Injil : Psallite No 266 (ma Laudate No 79)
INJIL
Turia Somuso Dödö khö Yesu Keriso nisura Matai'o.-
Me luo no, Ilau gamaedola Yesu ba niha sato, Imane: "Famatörö Lowalangi andrö no amaedola zohalöŵö ba danö, samazaewe tanömö si sökhi ba nowinia. Me no mörö fefu niha, so zi fatiu tödö khö zohalöŵö ba danö andrö, möi mutanögö ndru'u ba gotalua wakhe andrö ba ilau mofanö. Me ibörögö tumbu wakhe andrö, me motalinga, oroma göi ndru'u andrö. Möi zohalöŵö khö zokhö nowi andrö wanguma'ö khönia: He ama, tenga no ötanö danömö si sökhi ba nowiu? He moroi khönia ndru'u andrö? Itema li sonowi andrö: Niha si fatiu tödö zolau da'ö. Ba lamane khönia ira enoni: Hadia, omasi'ö na möiga wondröni du'u andrö? Imane: Böi! Ma dania mifaogö wondröni fakhe, na midöni ndru'u? Akha faoma ebua ira, irugi ginötö wamasi. Ba na baŵa wamasi, awena uŵa'ö ba zamasi: Mi'owuloi ua ndru'u, miböbö ba mitunu. Awena mi'owuloi wakhe ba mi'irö'ö bakha ba halasa khögu."-
Ilau gamaedola tanö bö'ö Yesu, Imane: "Famatörö Lowalangi hulö danömö höwa nihalö niha, ba itanö ba nowinia. Tanömö höwa no tanömö side'ide sibai. Na tumbu ia, tobali sinanö sebua ba gotalua zinanö sombuyu töla. Tobali ia hulö geu, irege möi wofo wangazuni ba ndrahania."
Sambua tö gamaedola nitutunö Yesu ba niha sato, Imane: "Famatörö Lowalangi hulö laru nihalö zi samösa ira alawe, nifaruka ba zi öfa wulu tumba darigu tölu su'asu'a, irege oi kamba ma'afefu." Fefu wamahaö Yesu ba niha sato andrö oi nifo'amaedola. Ba zimanö itörö niŵa'ö zama'ele'ö andrö, me imane: Da'ulau gamaedola, na fahuhuo ndra'odo khöra. Ubokai zi no tobini, i'otarai mböröta danö.- Mat 13:24-43
Simanö duria somuso dödö khö Zo'aya ya'ita, Yesu Keriso.-
Erönua:
LÖ FARÖI LOWALANGI BA NIHA SAMATI KHÖNIA
Bakha ba wombaso siföföna nihalö moroi ba zura Wa’atuatua andrö, ta’ila hewisa sindruhunia nifalua Lowalangi andrö. Ya’ia fefu zangai angetula ba nifaluaNia, ba lö alio I’oroma’ö wa’abölönia andrö. Na taŵa’ö lö Ihuku ita So’aya ba zi lö sökhi si no tafalua, ba no talimo ita samösa. Lö mamalö Ibaloi So’aya, hadia so khöda wangesa dödö. Ba samuza ma’ökhö I’oroma’ö khöda wa’abölö ba fa’atulöNia. Andrö si lö tola lö’ö tahöna khöda wa’ebolo dödö awö wa’afönu wanötöna ya’ita niha samati, me So’aya andrö ba no sebolo tödö.
Taroma li Lowangi nihalö moroi ba zura Waulo andrö ba niha samati ba mbanua Roma, edöna ifatunö khöda hewisa wa lö faröi khöda Lowalangi andrö. Fe’asoNia ba gotaluada, ya’ia sifao Geheha Ni’amoni’ö andrö sitobali awö ba sondrara tödö ba sangabölö. Ba zimanö asese sibai ha mbewe wangandröda, lö te’oli, lö molakhömi ba tenga sinangea. Ma’ökhö andre irara dödöda rasul Faulo. Eheha Lowalangi no teduwagö bakha ba dödöda. Mangandrö Ia bakha ba dödöda, na tahonogö ita, ba na omasi ita wamondrondrongo liNia.
Bakha ba wombaso Turia Somuso Dödö andrö, tarongo gamaedola Yesu sanandrösa ba gamatöröwa Lowalangi. Amaedola siföföna ya’ia wananö fakhe ba solau du’u andrö. Ba gafuriata, du’u andrö ba nitunu. Ba hiza fakhe andrö ba ni’irö’ö ba halasa. Amaedola simendrua ya’ia da’ö tanömö höwa andrö. Hewa’ae no ide’ide ba hiza na no manalinga ba tola mangazuni wofo ba hogunia. Ba amaedola zitölu andrö ya’ia laru andrö sitola mokambakö darigu. Ba gamaedola andre sindruhu wa ibe’e khöda sambua duho ya’ia wa lö mamalö hezo so danömö si sökhi, ba so manö göi danömö zi lö sökhi. Ba hiza böi moguna abu dödö. Hewa’ae no ide’ide wamati niha samati, tola sa dania ebua ia börö wamatörö Lowalangi.
Sitölu ngawua wombaso andre edöna idönia’ö ita ba wo’erönusi famatida. Böi abu dödöda wa no ide’ide ita ya’ita niha samati andre. Sindruhu lö faröi khöda Lowalangi ba lala wa’aurida si’ero ma’ökhö. So manö sa dania ginötö I’oroma’ö wa’abölöNia Lowalangi ba niha samati khönia. Tandra wa lö faröi ia khöda, ya’ia wa’ifatenge GehehaNia Ni’amoni’ö andrö, sanolo ba sondrara dödö niha samati. Bazimanö aboto göi ba dödöda wa ba gotalua niha samati oya alua zi lö faudu ba zomasi Zo’aya. Niha samati andrö khö Lowalangi, asese oroma no ide’ide, aleu ba lö fa’abölö. Andrö Ibe’e wondrara dödö So’aya ba niha sohalöŵö ba Gereja si fao amaedola ba Ifarou ira, ena’ö lahöna khöra wa’ebolo dödö, me So’aya sa zo’onorogö tödö ba ngawalö zalua khöda bongi ma’ökhö. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011
0 comments:
Posting Komentar