TAROMA LI LOWALANGI LUO MIGU SI – 15 DÖFI A

Liturgi Taroma Li Döfi A/B/C hlm. 166.

FOMBASO I

Taroma Li Lowalangi nihalö moroi ba zura Yesaya, sama'ele'ö.-

Da'ö niŵa'ö Zo'aya: "Hulö deu andrö, si'otarai mbanua si yaŵa ba si lö mangawuli ba da'ö, na lö nibasöinia tanö, fangatabö zinanö, na lö nibe'enia auri zinanö wanga'asogö tanömö ba wanaru ba balazo ni'a, simanö daroma liGu andrö, si'otarai mbawaGu: lö mangawuli khöGu lö boto, hatö na no ifalua ba nifa'ohe'öGu ya'ia." Yes 55:10-11

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 65B ma 36       (ma Laudate No 153 ma 72)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Fefu wamakao nitaögöda iada'e, molo'ö fangerangeragu, lö eluaha ba zinga lakhömi ni'oroma'ö khöda dania. Si fao fanötöna, fefu ni'a'asogö Lowalangi andrö labalobaloi ginötö, I'oroma'ö lakhömi ndraonoNia Lowalangi. Börö me no tetehegö, wa alio tekiko nifazökhi Lowalangi, tenga börö wa'omasinia, no börö Lowalangi zanehegö simanö. Ba he ŵa'ae simanö, so göi wanötöna, ya'ia wa ba zi sambua inötö dania te'efa'ö ni'a'asogö Lowalangi andrö moroi ba zamakiko ya'ia ba si fao wangefa'ö awö wamolakhömi andrö, si fao awö ndraono Lowalangi. Aboto ba dödöda, wa irugi iada'e mangaröngarö fefu ni'a'asogö Lowalangi, börö wamakao ba wa'atobali ni'a'asogö si bohou, hulö ndra alawe si tefakao na inötö tumbu ndraono. Ba tenga ha nifazökhi Lowalangi zangaröngarö, ya'ita göi, he ŵa'ae no so khöda famobörö Geheha andrö, zangaröngarö ba dödöda. Tatötöna, wa Itema ita Lowalangi ba khöNia, ena'ö oroma wa iraonoNia ita, na no I'efa'ö mbotoda moroi ba wa'atekiko.- Rom 8:18-23

Simanö daroma li Lowalangi.-                              Sato : Ma'andrö …

 

Sinunö Föna Injil : Psallite No 251                       (ma Laudate No 9 ma 97)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, mofanö Yesu moroi ba nomo, möi Ia ba zinga mbaŵa Genezare ba dumadao Ia ba da'ö. Ato niha sowulo khöNia, irege möi Ia yaŵa ba dundraha. Mudadao Ia; ba niha sato andrö muzizio ba mbewe mbaŵa. Ibe'e khöra oya ngawalö wamahaö, faoma amaedola. Imane: "So samösa zohalöŵö ba danö samazaewe tanömö zinanö. Me ifazaewe danömö andrö, so zaekhu ba lala, ba i'a fofo. So göi zaekhu ba zokarakara, si lö awe'ewe'e tanö. I'anemai'ö motalinga danömö andrö, börö me lö awe'ewe'e danö. Ba me itugu alaŵa luo, ibörögö aleu dalinga danömö andrö, köli ba mate, börö me lö aröu bakha ikhamö ŵa'ania. So göi danömö saekhu ba gotalua ndroi. Tumbu ndroi ba ilazi'ö danömö andrö, irege mate. Ba so göi zaekhu ba danö satabö. Mowua danömö andrö: So zi otu kali fabali mbuania, so zi önö ngafulu ba so zi tölu ngafulu."- Mat 13:1-8

Simanö duria somuso dödö khö Zo'aya ya'ita, Yesu Keriso.-

 

Erönua:

BÖI AETU WANÖTÖNA BA WANURIAGÖ TURIA SOMUSO DÖDÖ

Bakha ba wombaso siföföna andrö tarongo hewisa wama’ele’ö Yesaya andrö ba wehede Zo’aya. Fehede Zo’aya andrö hulö deu saekhu tou ba danö. Teu andrö moguna ia ba wangatabö’ö sinanö, soguna göi ba niha gulidanö. Ba hiza lö omasi niha na asese ilau teu. Irege so manö zanaha teu lawa’ö. Ba zimanö,  teu andrö i’asogö khöda wa’aföli niha gulidanö. Simanö göi daroma li Zo’aya, itaria aföli ita wamondrongo, ba hiza i moguna ba wangehaogö ba ba wangatabö’ö fa’aurida.

Ba wombaso sidua andrö nihalö moroi ba zura Waulo ba mbanua Roma, da’ö no sambua fangaro dödö ba khöda ya’ita niha samati. Dozi ita si no manema sakramen fanasa, no tatema Geheha Ni’amoni’ö, si no sia’a  mbuala Lowalangi. Na tafondrondrongo ba na ta’o’ö li Geheha, no barö wamatöröNia so ita, ba alio aboto ba dödöda gulidanö si fasui ya’ita. Irege so khöda wangodödögö wamatörö ni’a’asogö awö ngawalö zauri andrö ba wa’auri sabölö sökhi, solakhömi ba si moadu.

Bakha ba duria somuso dödö andrö tarongo gamaedola danömö andrö ni’ombakha’ö Yesu. Ba wamazaewe tanömö andrö, so zaekhu ba zinga lala, ba danö so kara, so doi, ba so göi zaekhu ba danö satabö andrö. Famazaewe tanömö andrö no fanuriaigö taroma li Lowalangi. Tanö sanema’ö tanömö andrö ba no niha gulidanö. Si öfa nahia andrö no famaedo niha samondrondrongo taromali andrö.

Sitölu ngawua wombaso andre, tefurugö ia ba khöda ya’ita niha samati sanuriaigö turia somuso dödö andrö. Ba wanuriaigö  turia somuso dödö andrö, itaria aetu wanötönada töratöra ndra sohalöŵö ba Gereja, börö me taroma li Lowalangi andrö larasoi ambö latema ira niha samati ba lö mowua. So zamondrongo, ha irongo tögi dalinga kambera ba kalua ia ba gambölö. Töratöra na so zamondrongo ba dögi dalinga kambera ba kalua ia göi ba dalinga kambera. Da’e deu andrö sasese mombasöi ulidanö. Hewa’ae mogun ba hiza asese kumökökökö niha. Hewa’ae ta’ila wa taroma li andrö aboto ba dödöda wa möi fangorifi, ba hiza oya manö nasa niha si lö mame’e ba dödö.

Ba hiza Ibe’e khöra wondrara dödö  Yesu si fao amaedola danömö nifazaewe ba nowi. Hadia, oroma ba wa’aurida, heza so ita ? Hadia ba danö sabe’e, ba zokara ma ba danö satabö? Fondrara dödö nibe’e Yesu andre, no fondrara dödö ena’ö lö aetu wanötönada ya’ita niha samati ba wanuriagö turia somuso dödö andrö. Faulo zangabe’e’ö tödöda nasa wa lö famaedo wa’afölida andrö dania na tatema lakhömi niha samati andrö. Lakhöminia andrö hulö danömö andrö saekhu ba danö satabö, mowua ba fabali mbuania töra moroi ba ni’era’era dödö niha. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011