Liturgi Taroma Li Döfi A/B/C hlm. 164.
FOMBASO I
Taroma Li Lowalangi nihalö moroi ba zura Zakharia, sama'ele'ö.-
Fehi'a dödö, ya'ugö ono alawe Ziona! Owuawua'ö dödö, ya'ugö ono alawe Yerusalema! Hiza, möi yomo ba mbanua khömi Razomi Razo solohe fa'atulö ba fangorifi! Si lö fayaŵa Ia. Ba hulu galide so Ia, ba hulu nono galide si alawe. Ihori kudo ba Iheta gureta ba wanuwö, ena'ö lö sa'ae tesao wasuwöta, he ba Yerusalema ba he göi ba Ndraono Gizara'eli fefu. Ifatö wana ni'oguna'ö ba wanuwö. I'a'asogö wa'atulö ba gotalua fefu soi niha.Ba oi barö mbawaNia so, i'otarai nasi ba zi tambai numalö ba nasi si tambai tanö sa; i'otarai nidanö Eferati numalö ba wondrege danö.- Zakh 9:9-10
Simanö daroma li Lowalangi.- Sato : Ma'andrö …
Sinunö Fanema Li : Psallite No 145, 1-4 (ma Laudate No 59)
FOMBASO II
Taroma Li Lowalangi nihalö moroi ba zura Waulo ba niha samati ba mbanua Roma.-
Ya'ami ira talifusö!
Tenga sa'ae barö mbawa gisö'isö dödömi so ami, no barö mbawa Geheha, na sindruhu so ba dödömi Geheha Lowalangi andrö. Na so niha si lö Eheha Keriso, tenga tana khö Keriso niha da'ö. Na so ba dödömi Geheha Lowalangi sangorifi Yesu moroi ba gotalua zi mate, I'orifi dania göi mbotomi si mate andrö, Eheha andrö, si no so ba dödömi, si no mangorifi Keriso Yesu moroi ba gotalua zi mate. Da'ö mbörö, wa so noro dödöda, ya'ami ira talifusö. Ba tenga noro dödö ba gamuata wa'aniha. Na mitörö lala nösi niha, si mate ami dania. Ba hiza, na faoma kuaso Lowalangi, lö mamalö mibunu gamuatami folau horö, ba auri ami dania.- Rom 8:9.11-13
Simanö daroma li Lowalangi.- Sato : Ma'andrö …
Sinunö Föna Injil : Psallite No 254 (ma Laudate No 66 ma 75)
INJIL
Turia Somuso Dödö khö Yesu Keriso nisura Matai'o.-
Me luo da'ö humede Yesu, Imane: "He Ama, Lowalangi sokhö banua si yaŵa awö danö. Usuno Ndra'ugö, me no Öbini'ö ba niha satuatua, awö zonekhe, zi no Öfa'ele'ö ba niha si lö fa'atuatua. Ya'ia, Ama, me no fa'omasiU zimanö. Fefu hadia ia no Ibe'e ba dangaGu AmaGu. Ba lö saboto ba dödö Ono, baero Nama, ba lö saboto ba dödö Ama, baero Nono, awö niha sedöna I'ombakha'ö Ono. Mi'aine khöGu, ya'ami fefu, si no erege tödö ba wolohe noro sebua, Ufolombase ami. Lö Ufakao ami ba lö U'osiwawöi ami. Mi'o'ö niŵa'öGu awö wamahaöGu, ba tobali sökhi wa'aurimi. Niŵa'öGu khömi, moguna sibai khömi. Nibe'eGu khömi ba wonoro, no aoha."- Mat 11:25-30
Simanö duria somuso dödö khö Zo'aya ya'ita, Yesu Keriso.-
Erönua:
ENONI SOLOHE FA’ATULÖ
Bakha ba wombaso siföföna nihalö moroi ba zura Zakharia andrö sama’ele’ö, ituriaigö wa tohare dania razo, ya’ia Mesia. Ba we’aso Mesia andrö, lö khöNia fayaŵasa dödö. Si so khönia ba ni’oheNia ya’ia wa’atulö. AmatöröŵaNia inönöi gulidanö ma’asagörö. Kudo si no urifö fayaŵasa ba ni’oguna’ö ba wanuwö, lö I’oguna’ö, ba hiza galide andrö, urifö ni’oguna’ö ba wohalöŵö ba solohe noro sabua. Baero da’ö, kalide andre dani lafo’eluaha ia tobali tandra wolohe fa’atulö.
Bakha ba wombaso sidua andrö, Faulo zanguma’ö wa fa’afalemba dödö niha ba wangawlö gisöisö dödö niha. Ba hiza, börö wanemada sakramen fanasa no tefaböbö ita khö Keriso ba no so khöda Geheha Lowalangi. Ba wanemada fanasa andrö tasasai saae ba dödöda ngawalö gamuata ba isöisö dödö si lö enahöi andrö. Me ba wolo’öda amuata ba isöisö dödö si lö enahöi andrö, ba zimanö mate ita. Ba hiza na ta’o’ö wamatörö Geheha Ni’amoni’ö andrö nitemada sitobali bua wanasa ni’amoni’ö andrö, tatema dania wa’auri si lö aetu andrö.
Bakha ba duria somuso dödö andrö tarongo, hewisa wangandrö Yesu khö NamaNia. bawangandröNia andrö aboto ba dödöda fanuriaigö turia somuso dödö andrö siföföna sibai tefalua Ia ba niha side’ide ba nifalangögö. Andrö ba wangandröNia andrö ibe’e noro saoha andrö, börö wolo’öda somasi Lowalangi. Andrö dania tekaoni ita ya’ita niha samati ba wanema luoda zamösana ya’ia wa’omuso dödö ba wa’auri si lö aetu.
Sitölu ngawua wombaso andre edöna ibe’e khöda wangomuso dödö ya’ita niha samati. Ya’ita niha samati andre no niha side’ide ba sasese nifalangögö. Ba zimanö, lö mamalö ihakhösi tödö ita Lowalangi, irege I’oroma’ö wa’ahakhö dödöNia. Ba wa’ahakhö dödönia andrö, itehe mate NonoNia andrö ba wangöhöli ya’ita. Börö göi wanasa nitemada andrö, simate ita awö Keriso, ba hiza börö göi wemaosoNia, tesou ita mangawuli tobali ono Lowalangi ba sanema ondröita zorugo andrö ya’ia wa’auri si lö aetu.
Börö wa’amate NonoNia andrö, mo’ömö göi ita wangondrasi Yaia, si no umbu wangorifi andrö. Ta’ondrasi ia ba wanema noro saoha andrö si no Ifabu’u. Hadia noro saoha andrö? Noro saoha andrö ya’ia wolohe fa’atulö ba niha sifalukha. Na so wa’atulö ba niha, lö mamalö owuawua fefu dödö niha samati. Böi ata’u ita, so Geheha Ni’amoni’ö sanoloni. Eheha andrö zifahuhuo ba tenga ya’ita. Ba gafuriata ya itugu ifatörö ita Eheha andrö, ena’ö sökhi wa’aurida ba te’orifi ita.- amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011
1 comments:
Trims bro
Posting Komentar