TAROMA LI LOWALANGI BONGI FÖNA NDRÖFI SI BOHOU (FABALISA NDRÖFI) DÖFI A

Liturgi Döfi A/B/C hlm. 30.

FOMBASO  I

Taroma Li Lowalangi nihalö moroi ba zura Yesu Ono Zirakhi.-

Ya'ugö talifusö, efa'ö zi fasala nawöu niha khöu, ena'ö göi te'efa'ö khöu horöu na mangandrö ndra'ugö. Hewisa wa tola i'andrö niha khö Lowalangi wamadöhö fökhönia, na no i'irö'ö mbao dödönia ba nawönia niha? Hadia tola i'andrö wangefa horönia,  na lö khönia fa'ahakhö dödö ba zi samösa niha si fagölögölö khönia ? He ŵa'ae ha niha si lö fa'abölö sa ia, ba na no tumbu sa'atö ba dödönia wahö'ösa, ba haniha zame'e höli ba horönia dania? Angeragö tödöu lualua wa'auriu ba bato sa'ae wa'udusa. Ya itörö tödöu wa'atekiko awö wa'amate, ba ya lö faröi'ö ba goroisa fefu. Ya itörö tödöu gamabu'ula li si'oroi Lowalangi,  fondrege zalaŵa, ba efa'ö zala ba zi fasala khöu andrö.- Sir 28:2-7

Simanö daroma li Lowangi.-                       Sato : Ma'andrö …

 

Sinunö Fanema Li : Psallite No 103, 1-3                                (ma Laudate No 47B)

 

FOMBASO II

Taroma Li Lowalangi nihalö moroi ba zura Yohane si föföna.-

He ya'ami iraonogu, böi ba wehede si lö ösi, ta'omasi'ö nawöda, ba hiza, ba wa'omasi sindruhu, nifotandrada ba nilauda. Awena ta'ila, wa ihonogöi wa'aurida si duhu andrö khö Lowalangi. Ba awena tola ta'ondrasi Lowalangi ba wa'ahono dödö. No ebua Lowalangi moroi ba dödöda, awö wa no aboto ba dödöNia fefu hadia ia, na i'adugö ita tödöda. Ya'ami ni'omasi'ö, na tebai sa'ae i'adugö ita tödöda, ba so khöda wa'afaduhu dödö khö Lowalangi, wa fefu hadia ia ni'andröda, ba tatema khöNia, me ta'o'ö goroisaNia ba me talau zomasi Ia. Da'e goroisaNia : akha mamati ita khö NonoNia, Yesu Keriso, ba ena'ö faoma ta'omasi'ö nawöda, simane ni'oroi'öNia khöda.- 1 Yoh 3:18-23

Simanö daroma li Lowalangi.-             Sato : Ma'andrö …

 

Sinunö Föna Injil : Psallite No 215                                (ma Laudate No 97)

 

INJIL

Turia Somuso Dödö khö Yesu Keriso nisura Yohane.-

Me luo da'ö, ba Ifaöga höröNia Yesu miyaŵa ba Imane : He Ama, no Ufa'ele'ö Ndra'ugö ba niha andrö si no Ötou'ö ba dangaGu. No la'o'ö liU, ba no aboto ba dödöra iada'e, wa fefu nibe'eMö khöGu, no moroi khöU da'ö. No Ufa'ema khöra daroma li andrö nibe'eU khöGu, ba no latema. Ba sindruhu no aboto ba dödöra, wa moroi khöU U'otarai, ba no faduhu dödöra, wa Ya'ugö zamatenge Ya'o. Mangandrö Ndra'o salahira, tenga salahi niha gulidanö mangandröDo, khöra sa, nibe'eU khöGu, börö me tana khöGu ira. Ba khöu fefu zi so khöGu, ba khöGu fefu zi so khöU. Tefolakhömi Ndra'o ba khöra. He Ama ni'amoni'ö, rorogö ira ba döiMö nibe'eU khöGu, ena'ö ha sambua ira, simane Ya'ita. Yoh 17:6-11

Simanö duria somuso dödö khö Zo'aya ya'ita, Yesu Keriso.

Erönua:

LOWALANGI ZONDROROGÖ SAGÖTÖ ZIDÖFI

Taroma li Lowalangi nirongoda nihalö moroi ba zura Yesu Ono Zirakhi, i’o’ou ita ena’ö ta’efa’ö fefu zala niha bö’ö, ena’ö I’efa’ö göi horöda Lowalangi ba ena’ö Itehegö fefu gangandröŵada. Fangefa’ö horö andrö so börö wa’ahakhö dödö ba nawö niha sifagölö khönia. Tatu manö, na omasi ita ihakhösitödö ita niha, siföföna ua tahakhösi tödö nawöda niha. Simanö göi Lowalangi, niha sahakhö tödö ba nawönia niha, ihakhösi tödö ia Lowalangi. Bongi andre no inötö sisökhi wamalua da’ö fefu, irege horö ba olalöwa andrö, fao ia ba ndröfi satua. Ba hiza böwö si sökhi andrö mubohouni ia simane döfi sibohou andrö.

Bakha ba zura Yohane andrö siföföna, I’andrö khöda ena’ö böi ha ba wehede sisökhi wamalua fa’omasi andrö ba nawö. Ba hiza, ba mbuabua abölö ta’oroma’ö wa’omasi andrö. Ba wamalua fa’omasi andrö sindruhu tefotandro ia ba mbuabua sitola murasoi, ba tenga ha bawehede manö. Oroma wa bakha ba wa’atulö ba bakha ba wolumö’ö Lowalangi so ita, na ta’omasi’ö nawöda niha ba na so khöda wa’atulö dödö. Ba gafuriata tarasoi wa ba wamalua fa’omasi ba nawö andrö, lö mamalö Ibe’e khöda wangefa horö ba inötö si bohou Lowalangi.

Turia somuso dödö nisura Yohane, sindruhu ifa’ele’ö khöda wangandrö Yesu andrö ba zamati khöNia. Lö omasi Yesu fabali manö zamati khöNia, ba hiza lö mamalö I’andrö khö NamaNia ena’ö lö Ifamalömalö wondrorogö zamati khöNia. Yesu Keriso andrö moroi khö Lowalangi ba mangawuli khö Lowalangi, simanö göi ginötö, Lowalangi zame’e. Ya’ita göi moroi khö Lowalangi, ba datafuli ita khöNia.

Fombaso nirongoda andre sindruhu lö mamalö te’oroma’ö khöda hewisa zamakhaita andrö sifaoma manundreheni faoma fatambai. Lowalangi si so sagötö fa’ara andrö, lö mamalö Irorogö awö wa Ilumö’ö fefu zamati khöNia. Yesu samösa Ono Lowalangi andrö, Ilului wangandrö khö Nama ena’ö so wolumö’ö ba niha samati khöNia. Ba zimanö göi moguna so wanema’ö ba wolumö’ö andrö. Ba da’e göi so khöda wanofu, hewisa göi ita ba wanema’ö folumö’ö Nama andrö?

Fanema’öda wolumö’ö Nama andrö, tenga ta’oroma’ö ia ha ba wamati khö Nama manö. Fanema’öda folumö’ö Nama andrö, sindruhu mu’oroma’ö ia ba wamati sowua. Famati sowua andrö ya’ia wangomasi’ö awö; fangomasi’ö awö wondrege zi’oföna andrö ya’ia wangahakhösitödö awö ba fangefa’ö sala. Ba zimanö, Ihakhösitödö göi ita Lowalangi awö wa I’efa’ö zala olalöwada. Ba wangefa’ö sala andrö, ena’ö simane fabalisa ndröfi andrö sitebai saae mangawuli furi. Databohouni wamatida awö wahuwusada ba nawöda niha samati andrö, simane fa’omuso dödö wondrugi döfi sibohou andrö, ba data’andrö ena’ö nasa irorogö ita Lowalangi sagötö zidöfi mifönada. Amen.

 

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011