TAROMA LI LOWALANGI LUO MIGU SI – 21 DÖFI C

LITURGI TAROMA LI DÖFI A/B/C hlm. 618

FOMBASO  I

Taroma Li Lowalangi nihalö moroi ba zura Yesaya, sama'ele'ö.-

Da'ö niŵa'ö Zo'aya : So Ndra'o dania ba wangowuloi fefu soi, ba gofu hadia lira. La'ondrasi Ndra'o ba wamaigi lakhömiGu. Ulau dandra ba zi so ira, ba Ufatenge ösa ira, si no te'orifi, ba soi bö'ö : Ba Darisi ba ba Wuti ba ba Ludi, niha samadölö sinali wana, ba ba niha Dubalo ba ba niha Yawano, ba ba hulo misa ba zaröu. Ba gotalua soi  niha, si lö irai mondrongo, wa so Ndra'o ba zi lö irai mangila zegebua andrö nilauGu, Ufatenge niha sangombakha lakhömiGu.

Na tohare dania soi niha ba wolohe fasömbata khö Zo'aya miyaŵa ba hili ni'amoni'ö andrö khöGu ba Yerusalema, la'ohe mangawuli ndra talifusömi fefu, si zaewe ba soi niha tanö bö'ö fefu, si fakudo ba si fakureta ba nifabea ba si fakudo ba galide ba ba gondra,  Iŵa'ö So'aya, amaedola na la'ohe ba nomo Zo'aya wasömbata andrö Iraono Gizara'eli, bakha ba nahia ni'amoni'ö. Ba Utuyu göi niha moroi ba soi fefu tobali ere ba ono Lewi. - Yes 66:18b-21

Simanö daroma li Lowalangi.-

 

Sinunö Fanema Li : Psallite No 117                             (ma Laudate No 87, 1-2)

 

FOMBASO  II

Taroma Li Lowalangi nihalö moroi ba zura andrö ba niha Heberai'o.-

He ya'ami ira talifusö !

Hadia no olifu ami, wa Lowalangi zo'amenesi Ya'ami, amaedola nama si fahuhuo ba ndraononia. Iŵa'ö Lowalangi : "He onogu, haogö wanöngöni wamahaö Zo'aya ba böi afatö dödöu na I'otu'ö ndra'ugö. I'otu'ö So'aya niha ni'omasi'öNia, ba Ibözi dozi niha nifaduhu'öNia si tobali onoNia." Mitaha wotu si oroi Lowalangi, si hulö wamahaö si oroi samösa nama. Heza sa so ndraono si lö irai i'otu'ö amania ? Atulö wa fefu ngawalö wotu tenga solohe fa'omuso dödö, ha fa'abu dödö. Hiza i, dania lualuania fa'ohahau dödö same'e fa'atulö dödö ba niha si no mufamaha manaögö fotu. Andrö mifuli mi'abe'e'ö dangami si no adada, awö mbalöduhi si no atage. Mifaigi zadölö lala gahemi, fa böi ahele zakelakela, ena'ö na'i abe'e ira.- Heb 12:5-7.11-13

Simanö daroma li Lowalangi.-

 

Sinunö Föna Injil : Psallite No 263                               (ma Laudate No 87, 3)

 

INJIL

Turia Somuso Dödö khö Yesu Keriso nisura Luka.-

Me luo da'ö, Itörö mbanua sebua awö mbanua side'ide Yesu, mame'e famahaö, numalö Ia ba Yerusalema. Ba dalu lala so niha sanofu khöNia: "He So'aya, hadia lö ato ni'orifi dania?" Itema linia Yesu, imane : "Miforege wangalui lala wanörö bawandruhö sise'ise andrö. Uŵa'ö khömi, ato niha somasi manörö da'ö, ba tebai. Samuza inötö dania maoso zokhö omo andrö ba iduhö mbawandruhö. Ba na ibörögö baero so ami mamökö bawandruhö, na mimane : He So'aya, bokai khöma ! – Ba Itema limi Sokhö omo andrö, Imane : Lö U'ila haniha ami, he moroi ami. Awena dania mibörögö mimane : No mangamanga ndra'aga, no mamadu idanö ndra'aga ba zanehe Ndra'ugö. Ba no mamahaö Ndra'ugö ba mbanuama. Ba Ifuli Imane : Uŵa'ö khömi, lö U'ila haniha ami, he moroi ami. Miheta ami khöGu, fefu zolau si lö atulö. Awena, na mi'ila somuso tödö ndra Aberahamo, Iza'aki ba Yakobo, awö ndra sama'ele'ö fefu ba gamatöröŵa Lowalangi andrö, me'e dania ami ba wanaögö fa'afökhö, me lafofanö ami baero. Ba tohare dania niha moroi ba gatumbukha ba moroi ba gaekhula, moroi yöu ba moroi raya, ba manga ira ba gamatöröŵa Lowalangi andrö. Niha safuria iada'e tobali si föföna dania. Si föföna iada'e tobali safuria dania".- Luk 13:22-30

Simanö duria somuso dödö khö Zo'aya ya'ita, Yesu Keriso.

Falulusa Fohalöwö Wangehaogö Gereja St. Flavius Orahili Idanoi [Dok. Pribadi]

 

Erönua:

FA’AFÖKHÖ ANDRÖ BA MOWUA FA’OHAHAU DÖDÖ

Ba wombaso siföföna nihalö moroi ba zura Yesaya sama’ele’ö andrö, sindruhu I’oroma’ö khöda hewisa wa’alöfaröi Lowalangi ba niha ba gulidanö. Ba wombaso andrö göi aboto ba dödöda wa he wa’ae no Ilulu Lowalangi ba Ndraono Gizara’eli we’amöi ba nahia wanibo’ö ba Mbabilonia, tenga ha börö me ebua horöra, ba hiza, ena’ö larongo soi bö’ö döi Lowalangi andrö ba te’orifi. Fefu da’ö ifalua Lowalangi ena’ö si lö mamalö tarasoi wa’omasiNia andrö si lö mamalö.

Sura andrö ba niha Heberai’o, no sihulö wotu ba ndraono. Fotu andrö ba wamobörö afökhö ba fa’itaria asala sibai ia. Ba hiza ba gafuriata, aekhu ia ba lala si sökhi. Ba da’e göi tola ta’ila hewisa gohitö dödö Lowalangi wa itehegö Ndraono Gizara’eli we’amöi ba nahia wanibo’ö, ena’ö mangawuli zui ira khö Lowalangi si no la’erogö. Ba wanibo’ö andrö sindruhu itandraigö Lowalangi ndraono Gizara’eli hadia sindruhu Lö faröi ira khö Lowalangi.

Yesu ba duria somuso dödö andrö, Lö Ibe’e wanema li ba wanofu, hadia ato niha te’orifi dania. Ba hiza Ifarou ita ba wamorege sindruhundruhu, afu tola fao ita ba gotalua ngawawa ni’orifi. Famarou nibe’enia andrö ya’ia wanörö bawandruhö sise’ise andrö. Bawandruhö sise’ise andrö ba ya’ia wanaögö wa’afökhö ba wolo’ö oroisa andrö sifao fa’ahele dödö.

Sitölu ngawua fombaso andre tola tafurugö ia wa fana’ögö fa’afökhö andrö tenga ba wamakao ya’ita. Ba hiza fa’afökhö andrö nitaögöda no tobali göi famaresoda moroi khö Lowalangi, hadia sindruhu lö faröi ita khöNia. Si lö faröi, ba da’ö dania zifao yomo ba watomesa andrö. Ba sifaröi, hewa’ae no irai ta’o’ö, ba zayazaya gölö ia irege baero so ita. Andrö ena’ö sinangea ita ba wefao ba watomesa nono mbiribiri andrö, moguna so khöda wolo’ö andrö simane niwa’ö ba zura Heberai’o, ya’ia wolo’ö fotu ma oroisa Lowalangi. Me sanau’ölö wolo’ö oroisa andrö, ba da’ö dania ni’orifi.

Ba da’e itörö gamaedola zatua wanguma’ö: Lö sökhi wamakhoi zatua, aböuböu belu matua. Sökhi wamakhoi ndraono, aböuböu gazogazo. Hewa’ae aböu belu matua wamakhoi zatua, ba hiza so gahulua sitola mugohi. Na fa’aböu gazogazo wamakhi ndraono, no sata’u ita da’ö ba ena’ö alio latibo’ö. Bagafuriata ena’ö lö mamalö ta’o’ö gamaedola sanguma’ö: Böi ege’ege ba mbawa wa’olofo, me no manaronaro fönau mbawa wa’abuso. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011