Ba wa’auri sero ma’õkhõ fangandrõ asese sibai tarongo ba aboto ba dõdõda me asese gõi mangandrõ ita. ba hiza hadia aboto ba dõdõda geluaha wangandrõ? Fangandrõ eluahania “fahuhuosa wamati khõ Lowalangi nifaehagõ sifao fa’asõndru dõdõ ba ba wehede fa’omasi zisamõsa iraono khõ zatuania.” Ba da’e tola aboto ba dõdõda wa fa’ngandrõ andre no sambua fahuhuosa fondrege zisõkhi, ba nifa’ema sifao famati ba khõ Lowalangi.
Fangandrõ andrõ sino fahuhuosa wamati ba khõ Lowalangi, tebotobo ia nasa wa:
(1) Fangandrõ andrõ no fahuhuosa wamati zi samõsamõsa niha khõ Lowalangi. Eluaha wangandrõ ba da’e mo’amakhaita ia ba worasoi zi samõsamõsa niha wanema’õ Lowalangi angandrõwania. Hiza, moguna aboto ba dõdõda wa fangandrõ andre nosambua fahuhuosa. Bakha ba wahuhuosa, so nifotõi sama’ema ba so zamondrongo; so nifaehagõ ba so wanema li. Angandrõwa nifa’emada moguna aboto ba dõdõda hadia faudu ni’andrõda ma lõ’õ. Ba da’e tahaogõ ta’osisi’õ niandrõda andrõ hadia sitobali soguna khõda ma sitobali omasi’õ dõdõda. Dumadumania: na i’andrõ gõ bawa’alawaluo iraono alio tabe’e, bõrõ me ta’ila olofo ia. Ba hiza na i’andrõ wowõli marataba ba zitalumbongi iraono, tatu tobali famani dõdõda. Dania ta’õli, tola manõ tobali famõzinia.
(2) Fangandrõ andre ba no fangoroma’õ/famaehagõ famati. Fangandrõ andrõ sino fahuhuosa wamati zi samõsamõsa niha si lõ tola lõ’õ mufalua ia sifao fa’omasi. Ba wahuhuosa andre sifao fa’omasi, so ba da’e wamati ba fa’afaduhu dõdõ. Bõrõ wamati ba fa’afaduhudõdõ andrõ, so wanõtõna wa angandrõwa nifa’ema tola te’amulagõ (Roma 10:13-14 ba Yakobo 1:6-7).
(3) Fangandrõ ba no sambua ndrela wangandrõ saohagõlõ khõ Lowalangi. Bakha wangandrõ, moguna mu’angenanõi wama’ema hadia ia. Hadia mbõrõ wa mu’angenanõi, lõ sõkhi na fangandrõ andrõ ha manõ fangandrõ soguna, ba hiza olifu ba wangandrõ saohagõlõ ba zi no tatema. Sõkhi na ofõna ta’andrõ saohagõlõ ba zi no tatema moroi na ofõna wangandrõ hadia zoguna, hadia mbõrõ me si lõ ta’andrõ ba ibõnõkhi khõda Lowalangi (1Tesalonika 5:18 ba Kolose 4:2).
0 comments:
Posting Komentar