HADIA SINDRUHU TEFAZAWA MARIA BA ZORUGO?

Bakha ba gofanöwa wamati Gereja Katolik, töratöra ba liturgi, so sambua ginötö wanörö tödö wamazawa inada Maria ba zorugo. Inötö andre tehonogöigö ba latörö tödö ero 15 mbawa si walu ma zui la’alui ngaluo migu sifahatö ba wangowasaini ya’ia ba Luo Zo’aya ma Ekaristi. Hewa’ae simanö, so manö nasa niha Katolik zanofunofu: Hadia sindruhu tefazawa Maria ba zorugo?

Dumaduma Wamazawa Maria ba Zorugo [http://parokiraturosari.id]

Siföföna sibai moguna mu’ila wa famaha’ö so’amakhaita ba wamazawa Maria ba zorugo, lö tola tasöndra ba wa’alio ia bakha ba Mbuku Ni’amoni’ö ma Taroma Li Lowalangi. Hewa’ae simanö, na lahaogö lanehegö nösi mbuku ni’amoni’ö, tandratandra wamazawa Maria ba zorugo tola tasöndra.

Famaha’ö so’amakhaita ba wamazawa Maria ba zorugo, no sambua DOGMA nihonogoigö namada Paus Pius XII meluo 1 (sara) mbawa si felezara döfi 1950, bakha ba zurania (ensiklik) Munificentissimus Deus. Dogma eluahania famaha’ö satulö nitema’ö moroi ba wanoloni Geheha Ni’amoni’ö ba nituriaigö tobali sambua famaha’ö satulö moroi ba zololohe Gereja Ni’amoni’ö sitebai fasala. Ba zimane eluaha, famaha’ö andre si lö tola lö’ö latema’ö sifao famati ira niha samati bakha ba Gereja Katolik iada’a ba sagötö fa’ara.

Famazawa Maria ba Zorugo andre, no sambua famönui wawu’usa li Lowalangi. Bakha ba zura Moze siföföna samosa ira alawe (Maria) ba nga’ötönia (Yesu) dania zomama högö gulö ma afökha (faigi 1Moze 3:15). Töratöra bakha ba zura Wama’ele’ö andrö wa no ihonogöigö Lowalangi naha khö ndra’alawe (Maria) andrö (faigi Fama’ele’ö 12:6).

Maria si no ina Yesu andrö, no ira alawe nifili Lowalangi i’oroi dalu ninania. Na ba zura Moze ta’ila hewisa me’ifataro Moze Lowalangi ba wangehaogö naha dawöla gamabu’ula li (2Moze 25-31) andrö, hadia tebai göi I’ehaogö Maria andrö Lowalangi tobali nahia Yesu andrö we’amöi ba gulidanö? Ba da’e ta’ila wa tenga manö ha “asala ifili” Lowalangi Maria andrö tobali ina NonoNia andrö solakhömi. Ba zimanö, lö mamalö göi ifolakhömi Maria andrö ba ngai NonoNia.

Tenga ha tobali nahia wa’atumbu Yesu ba gulidanö, Maria andrö göi no tobali nifaha’ö Yesu fondrege zafönu, irege inehegö mate nononia andrö ba döla röfa ba itema ba gahetania. Ba zimanö, no saae sinangea itema’ö gamabu’ula andrö nifabu’u Yesu ba zura Roma 8:17. Ba wamönui amabu’ula li andrö, Lowalangi no “ifazawa” Maria, boto ba nosonia andrö bakha ba lakhömi zorugo, me no aefa wekolinia ba gulidanö. Maria ba da’e no tobali siföföna ia ba gotalua niha samati ba khö Keriso nifedadao ba gambölö Lowalangi (faigi Matai’o 25:33).

Ba gafuriata moguna tabotokhi ba dödöda wa Maria andrö no “NIFAZAWA” ba tenga sanahae ba zorugo. Na lawa’ö nifazawa, eluahania tenga börö kuasonia ba hiza kuaso Lowalangi. Na manahae Yesu  ba no börö kuasoNia samösa me Lowalangi andrö göi Ia.

Famazawa Maria andrö ba zorugo moguna sibai ia khöda ya’ita niha samati. Famazawa Maria andrö ba zorugo, no göi tobali “fanötöna wamatida” yaita niha samati ba khö Yesu Keriso. Börö da’ö dogma wamazawa Maria ba zorugo, tenga ha börö wanörötödö ba famolakhömida Maria, ba hiza töra moroi ba da’ö, dogma wamazawa Maria andrö ba zorugo no sambua fangowasainida wanötönada ya’ita niha samati ba khö Keriso ba wombalobaloida wamenui fawu’usaliNia andrö. Amen.

Nifa’anö Kat. Ingatan Sihura, S.Ag.

Umbu:

Gerald O’Collins, SJ dan Edward G. Farrugia, SJ, Kamus Teologi Yogyakarta, Kanisius,1996.

Judith A. Bauer (ed), The Essential Mary Handbook Buku Pegangan Pokok dan Lengkap tentang Maria Intisari Ajaran, Kepercayaan, Doa dan Devosi Jakarta: Obor, 2011

Soera Ni’amoni’ö Jakarta, Lembaga Alkitab Indonesia, 1994

Stefanus Tay dan Ingrid Listiati Tay, Maria O Maria Bunda Allah, Bundaku, Bundamu Surabaya: Murai Publishing, 2016