TAROMA LI LOWALANGI LUO MIGU SI – 13 DÖFI C

FOMBASO  I

Taroma Li Lowalangi nihalö moroi ba zura Razo, si föföna.-

Me luo da'ö, Imane So'aya khö Gelia : "Fuli'ö, ae ba Ndramaseko ba wombayoini Elisa, ono Zafati, banua Habeli-Mehola, tobali sama'ele'ö, fangaliu dania." Me mangawuli Gelia moroi ba hili Horebi, falukha ia Gelisa, ono Zafati, samali'ö tanö si fao fakake nidöni zaŵi. Föna Gelisa mowaöwaö felezara zohalöŵö, safasafasa khöra zaŵi. Ba Elisa tanö furi sibai, numero 12. Me itörö ia Elia, ihawui Gelisa faoma barunia sebua, baru zama'ele'ö. I'anemai'ö iröi zaŵinia Elisa, i'o'ö Gelia, fagohi ia, imane : "Tehe khögu möido fa'ago bawa khö namagu ba khö ninagu, awena dania u'o'ö ndra'ugö." Imane Elia : "Ae'e fuli'ö; böi olifugö'ö nilaugu khöu." Iröi Gelia Elisa, möi ia ihalö zaŵi khönia si safasa andrö ba itaba. Kalo mbagi zaŵi andrö, ibe'e eu ba wangasosoi ösi, ba ibe'e ö niha sato andrö. Awena maoso ia, i'o'ö Gelia ba tobali ngoningoninia.- 1 Razo 19:16b.19-21

Simanö daroma li Lowalangi.-

 

Sinunö Fanema Li : Psallite No 16, 1-3                              (ma Laudate No 91)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Galatia.-

Ya'ami ira talifusö !

No I'efa'ö ita Keriso, ena'ö lö mamalömalö tenga sawuyu ita. Mi'a'aro'ö dödömi ba böi mibe'e nifokalo mbagimi ba wa'asawuyu. Andrö tekaoni ami, ena'ö aefa ami ba ni'osawuyu. Böi mi'oguna'ö wangefa'ö ya'ami andrö ba wolulu botomi nifatörö wa'omasi nösi niha ba fakhögusa. Ba zi tambai da'ö, ya faoma mitolo nawömi si fao fa'omasi. Me oroisa andrö ma'afefu no te'osambua'ö bakha ba zi ha sambua li, ya'ia da'ö : Omasi'ö nawöu simane fa'omasiu ndra'ugö. Na faoma fakha'akha'a ami khö nawömi, mi'angelama fa böi faoma tekiko ami. Da'ö niŵa'ögu : Mitehegö nifatörö Geheha Lowalangi ami, böi mi'o'ö wangisö nösi niha. Me fangisö nösi niha andrö no fa'udu ba wa'omasi Geheha Lowalangi; ba faomasi Geheha andrö fa'udu ba wa'omasi nösi niha. Faoma sa fa'udu ira si dombua andrö, irege lö milau zomasi ami ena'ö. Ba na Eheha Lowalangi zondrönia'ö ya'ami, ba tenga sa'ae barö mbawa goroisa so ami.- Gal  5:1.13-18

Simanö daroma li Lowalangi.-

 

Sinunö Föna Injil : Psallite No 256                                   (ma Laudate No 76)

 

INJIL

Turia Somuso Dödö khö Yesu Keriso nisura Luka.-

Me luo da'ö, me no ahatö mbaŵa tefazaŵa Yesu ba zorugo, Ihalö gangetula we'amöi ba Yerusalema. Ifatenge ndra tengetenge, sowaöwaö fönaNia. Mofanö ira ba möi ira ba zi sambua banua ba danö Zamaria, ba wamaigi naha wemörö khö Yesu. Ba lö latema Yesu ba mbanua andrö, me no ba lala ba Yerusalema so Ia. Me larongo da'ö ira nifahaö Yesu, Yakobo ba Yohane, lamane: "He So'aya, hadia, omasi'Ö na ma'andrö galitö moroi yaŵa ba mbanua, ena'ö i'a ira ?" Ifaigi furi, Itenaŵa ira. Ba numalö ira ba mbanua bö'ö. Ba wofanö andrö, so samösa zanguma'ö khö Yesu : "Omasido u'o'ö Ndra'ugö, gofu heza möi'Ö." Imane khönia Yesu : "So dögi narö hili ba nasu gatua, ba so gazuni ba wofo; ba hiza, khö Nono Niha andrö lö nahia wemörö." Ba Imane Yesu ba niha bö'ö : "O'ö Ndra'o !" Ba imane niha andrö : "Tehe khögu ua wogo'o amagu." Imane khönia Yesu : "Akha lako'o zi mate khöra niha si mate. Ba ya'ugö, ofanö ba turiaigö, wa no Ibörögö wamatörö Lowalangi."

So göi danö bö'ö sanguma'ö : "He So'aya, omasido u'o'ö Ndra'ugö. Ba tehegö ua khögu wangawuli ba wo'angonasi soroiyomogu." Imane khönia Yesu : "Niha si no mamörögö wamaku ba laza, ba na ifaigi furinia, lö sinangea tobali ono mbanua gamatöröŵa Lowalangi da'ö."- Luk 9:51-62

Simanö duria somuso dödö khö Zo'aya ya'ita, Yesu Keriso.-

 

Erönua:

FOLO’Ö SI’SI’OROI DÖDÖ

Bakha ba wombaso siföföna nihalö moroi ba Zura Razo Siföföna andrö, idunödunö khöda waöwaö wogaoni Gelisa andrö samatohu halöwö Gelia. Me no atua ba ibörögö tebai sa’ae Gelia sama’ele’ö, ba Ikaoni zama’ele’ö si bohou Lowalangi, ya’ia Gelisa. Aboto ba dödö Gelisa ba lö ifuli ia sa’ae ba lala wa’auri si to’ölö. Na lö molo’ö ia mena’ö, ba no ara la’olifugö döinia niha gulidanö. Börö wolo’önia fogaoninia, andrö wa lö aetu latörö tödö ia irugi gamozua ginötö.

Ba wombaso sidua nihalö moroi ba zura Waulo ba niha samati ba mbanua Galatia, tarongo hewisa wamaha’ö Waulo andrö. Famaha’önia andrö manandrösa ba wamati khö Yesu Keriso. Niha samati ba khö Keriso andrö, no teheta moroi ba wangosawuyu. Fangeheta moroi ba wangosawuyu andrö, tefodanedane ia ba wamalua fa’omasi. Ba wamalua fa’omasi andrö, ba ena’ö sifao famatörö Geheha Ni’amoni’ö ba tenga börö Nösi wa’aniha.

Bakha ba duria somuso dödö andrö tarongo hewisa gohitö dödö niha somasi molo’ö Yesu andrö. Ba wolo’önia andrö, omasi ia ua ba wogo’o amania. Ba hiza wehede Yesu andrö sanguma’ö: "Niha si no mamörögö wamaku ba laza, ba na ifaigi furinia, lö sinangea tobali ono mbanua gamatöröŵa Lowalangi da'ö."

Ba zitölu ngawua wombaso andre edöna ifaehagö khöda gerönua, na so zomasi molo’ö Yesu ba ena’ö si’oroi dödö. Elisa andrö nikaoni Gelia, lö khönia famada’ö wogaoni Zo’aya andrö. Me no iwa’ö khönia Elia, Iheta kalo mbagi zawi andrö ba itunu tobali fangasosoi zawi ö niha ba afuriata I’o’ö Gelia. Fanunu kalo mbagi zawi andrö no sambua tandra wangeheta moroi ba wangosawuyu simane famaha’ö Waulo andrö. Kalo mbagi andrö no tandra wangosawuyu. Ba hiza ba wolo’ö Yesu andrö, fefu kalo mbagi andrö teheta ba hiza sifao fehulu tödö göi wolo’ö Yesu andrö ba ba zi lö tahataha.

Folo’ö Yesu ba wanuriaigö Turia somuso dödö andrö, ya’ia ba wolohe fangefa ba niha sato. Ena’ö sinangea niha ba wolohe fangefa, si lö tola lö’ö ua oföna göi te’efa’ö ia moroi ba ngawalö dahataha andrö. Ba zimanö ena’ö folo’ö Yesu andrö ba böi saae so wangiwa tödö mendrua manö na so nasa zitobali noro dödö moroi furi. Ena’ö ine, folo’ö Yesu andrö lö mamalö ifehi’a ia Eheha Ni’amoni’ö, ba sifao fa’omasi wamalua ya’ia. Ba zimanö sinangea saae ita ba wa’atobali ono mbanua gamatöröwa Lowalangi. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011