LUO MIGU SITO’ÖLÖ SI – 27 DÖFI B

FOMBASO  I

Taroma Li Lowalangi

nihalö moroi ba zura Moze si sara.-

Imane So’aya, Lowalangi : “Lö sökhi ba niha, na ha ya’iya’ia. Da’Ufazökhi khönia nawö si fagöna khönia. Ifazökhi So’aya moroi ba danö fefu zaliŵaliŵa ba danö, awö wofo ba dalu mbanua, ba I’ohe ba niha ba wamaigi, hadia döi nibe’e niha. Ba hadia sibai nibe’e niha töi zonoso andrö, da’ö döira dania. Ba ifotöi fefu gurifö niha awö wofo ba dalu mbanua awö gutu ndru’u fefu. Ba ba niha, ba lö falukha nawö si fagöna khönia. Ba Ifeförö niha So’aya, Lowalangi, femörö sabölö. Awena Ihalö zara döla nosunia So’aya ba Ifo’ösi nagole nahania. Ba Ibali’ö ira alawe So’aya, Lowalangi, döla nosu andrö,  nihalönia ba niha, ba Ifasao ba niha. Imane niha : “Töla föfö dölagu da’ö ba nagole föfö nagolegu. Awögu da’e, börö me ba khögu tehalö ia.” Andrö iröi namania ba inania niha,  ba molemba ia ba ngambatönia, tobali ha sambua ira.-     1 Moz 2:18-24

Simanö daroma li Lowalangi.-

Sinunö Fanema Li : Psallite No 128                             (ma Laudate No 89,1-2)

 

FOMBASO  II

Taroma Li Lowalangi

nihalö moroi ba zura andrö ba niha Heberai′o.-

Ya’ami ira talifusö ! No ta’ila Yesu zamatörö. Nibali’ö ma’ifu ide’ide Ia moroi khö ndra mala’ika ba ginötö si lö arara, ena’ö ba wa’ebua dödö Lowalangi mate Ia salahi soi niha ma’afefu. Börö da’ö ta’ila Ia iada’a : No tefotakula Ia sumange ba lakhömi, me no Itaögö wamakao irugi wa’amate. Lowalangi zanga’asogö ba sondrorogö hadia ia fefu. Omasi Lowalangi göi, ena’ö ato ndraonoNia zogamö amatöröŵaNia solakhömi andrö. Börö da’ö, Ifo’ahonoa Yesu sololohe ya’ira, Lowalangi, ba wamakao, me Ya’ia zamokai lala khöra ba wangorifi. Ba he Yesu, sangamoni’ö niha, ba he niha ni’amoni’öNia andrö faoma la’okhögö samösa Nama. Da’ö mbörö, wa lö aila Ia fatalifusö khöra.-  Heb 2:9-11

Simanö daroma li Lowalangi.-

Sinunö Föna Injil : Psallite No 260                 (ma Laudate No 89, 3 ma 90,3)

INJIL

Turia Somuso Dödö khö Yesu Keriso nisura Mareko.-

Me luo da’ö, la’ondrasi Yesu ira Farizai’o ösa, lasofu khöNia ba wanandraŵaisi Ya’ia, lamane : “Hadia tola tetehegö ifabali khönia ngambatönia niha ?” Itema lira, Imane khöra : “Hadia ni’oroi’ö Moze khömi ?” Lamane : “No itehegö Moze, ifabalisi ndrongania niha, na no ifazökhi zura wabalisa khönia.” Ba Imane khöra Yesu : “Börö wa’abe’e dödömi, wa no ibe’e khömi goroisa andrö Moze. Ba mböröta no I’a’asogö niha Lowalangi : Ira matua ba ira alawe. Da’ö mbörö wa iröi namania awö ninania niha ba ha sambua ira dania si darua andrö, he boto ba he noso.  Tobali, tenga sa’ae darua ira, ha sambua. Ba hadia zi no I’osambua’ö Lowalangi, böi ifabali niha.”

So göi niha solohe iraono khö Yesu, ena’ö ifahowu’ö ira. Lategu ndra solohe andrö ira nifahaö Yesu. Me I’ila da’ö Yesu, mofönu Ia ba Imane khöra : “Mifa’amöi khöGu ndraono andrö, böi mitenaŵa ira. Ba zimanö sa gamatöröŵa Lowalangi andrö.  Amen, Uŵa’ö khömi : Haniha zi lö manema’ö amatöröŵa Lowalangi andrö simane iraono andre, tebai tobali ndrotondrotonia.” Awena Italagui ira, Itufa tangaNia högöra ba Ifahowu’ö ira.-  Mrk 10:2-9.13-16

Simanö duria somuso dödö khö Zo’aya ya’ita, Yesu Keriso.-

 

Erönua:

FONGAMBATÖSA

Taroma li Lowalangi nihalö moroi ba zura Moze si sara andre sindruhu te’oroma’ö khöda hewisa gohitö dödö Lowalangi ba wanga’azökhi niha andrö ba zi föföna sibai. Fanga’azökhi-Nia ira alawe ba ira matua no fagöna. Fa’afagöna andrö I’oroma’ö Lowalangi ba wangai töla nosu ndramatua andrö irege ba gafuriatania iwa’ö ira matua andrö: “Töla föfö dölagu da’ö ba nagole föfö nagolegu. Awögu da’e, börö me ba khögu tehalö ia.” Ba wehede ndra matua andre sindruhu te’oroma’ö wa fanga’asogö ira alawe ba ira matua andrö tobali awö sifagöna.

Bakha ba wombaso sidua sindruhu tarongo wehede Waulo andrö ba niha samati ba mbanua Heberai’o. ba wamaha’ö Waulo andre sindruhu I’oroma’ö khöda bua wanaögö Yesu andrö wamakao. Hewa’ae itörö wa’afökhö ba famakao Yesu andrö ba zi lö arara sibai ba hiza ba gafuriata tefotakula ia faoma sumange ba lakhömi. Ba wogamö sumange ba lakhömi andre lö mamalö moguna wangamoni’ö. Ba wangamoni’ö andre dania sindruhu te’oroma’ö sambua mbosi wa’atalifusöta ba ba wangokhögö sambua ama andrö.

Bakha ba wombaso injil tarongo hewisa göi me latandraigö Yesu andrö ira niha farizai’o. Fanandraigöra andrö lafanandrösa ia ba wabalisa zifaronga andrö. Me no I’ila gohitö dödöra andrö Yesu, lö edöna Ia ba wanema li ba wa’alio. Ifuli sa’atö isofu khöra hadia goroisa Moze khöra. Me lawa’ö: “No itehegö Moze, ifabalisi ndrongania niha, na no ifazökhi zura wabalisa khönia”, ba da’e ibe’e khöra wanema li sabe’e Yesu: “Börö wa’abe’e dödömi, wa no ibe’e khömi goroisa andrö Moze. Ba mböröta no I’a’asogö niha Lowalangi : Ira matua ba ira alawe. Da’ö mbörö wa iröi namania awö ninania niha ba ha sambua ira dania si darua andrö, he boto ba he noso.  Tobali, tenga sa’ae darua ira, ha sambua. Ba hadia zi no I’osambua’ö Lowalangi, böi ifabali niha.”

Ba zitambai da’ö göi te’oroma’ö khöda hewisa niha solohe iraono andrö khö Yesu. Hewa’ae latenawa ira nifaha’ö ba hiza itegu ira Yesu ena’ö böi latenawa ndraono andrö ba we’amöi khöNia. Fanema’ö-Nia iraono andrö no sambua famaha’ö wa iraono andrö so khöra wa’ahele dödö ba wanema’ö hadia ia tenga börö wa so gohitö dödö tanö bö’ö.

Bakha ba zitölu ngawua fombaso taroma li andre, töratöra bakha ba duria somuso dödö andrö, te’oroma’ö khöda dombua faosatö sebua. Faosatö siföföna ya’ia wongambatösa andrö ba faosatö sidua ya’ia wanema’ö ba folo’ö;

Faosatö siföföna so’amakhaita ba wongambatösa andrö no I’oroi wamobörö wanga’azökhi niha I’oroma’ö Lowalangi wa fanga’azökhi-Nia niha andrö so wa’afagölösa mbosi ya’ia wa ira matua ba ira alawe andrö no sifaoma tobali awö faoma fatambai. Ba wanga’I Lowalangi töla nosu ndra matua andrö ba da’ö göi ifaduhu’ö wa ira’alawe andrö no amaedola wa ha sambua boto ba ni’omasi’ö awö nirorogö. Fanehegö Moze göi ba wame’e sura wabalisa andrö tenga börö wa itehegö gohitö dödö ndramatua niha Yahudi andrö me labali’ö okhötara ndra’alawe ba tola lafalua manö zomasi ira. Fanehegö Moze wame’e sura wabalisa andrö ena’ö lö mamalö lasöndra göi wa’ohahau dödö ira alawe andrö.

Faosatö sidua sedöna mu’oroma’ö khöda ya’ia wanema’ö ba folo’ö. Fanema’ö ba folo’ö andre sindruhu te’oroma’ö ia ba wombaso sidua ba bagafuriata duria somuso dödö andrö. Fe’amöi Yesu andrö ba gulidanö no ba wolo’ö oroisa Nama. Fanema’ö Yesu oroisa Nama andrö no möi börö wa tefotakula ia faoma sumange ba lakhömi. Lala wanema’ö ba folo’ö andre sindruhu te’oroma’ö ia bakha ba mboto ndraono andrö si lö mamalö mangoroma’ö fa’ahele dödö ba tenga börö wa so gohitö dödö tanöbö’ö.

Ba gafuriata tola ta’ila, wa hewa’ae so dombua faosatö zedöna te’oroma’ö khöda, ba hiza ha sambua sa’atö wurugönia ya’ia bakha ba wongambatösa. Bakha ba zisambua fongambatösa andrö, siföföna sibai tebotokhi ba dödöda wa sifaronga andrö ira alawe ba ira matua andrö no si ha sambua boto ba tebai mufabali. Ha fa’amate zi tola mamabali ya’ia.

Bakha ba gofanöwa wongambatösa andrö göi lö manö ira mo’ofanöwa sifao fa’asökhi. Fa’itaria göi tesöndra watitisa. Hewa’ae simanö, fatitisa andrö tenga möi börö wabalisa. Fatitisa andrö si lö tola lö’ö latema’ö ia sifao folo’ö oroisa Lowalangi wa fanandraigö andrö ba gafuriata tobali fanga’aro’ö wamatida ba khö Lowalangi. Börö wanema’öda ngambatöda zamösana sifao fa’asökhi ba fo’ambötania, no möi börö wa tefotakula ita faoma sumange ba lakhömi andrö bakha ba gamatöröwa Lowalangi. Amen.

 Nifa’anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Markus Injil Yang Belum Selesai Yogyakarta: Kanisius, 2015

St. Eko Riyadi, Pr, Markus “Engkau Adalah Mesias” Yogyakarta: Kanisius, 2011