LUO MIGU ADVEN SI – 2 DÖFI C

FOMBASO  I

Taroma Li Lowalangi

nihalö moroi ba zura Barukhi.-

He Yerusalema, heta khöu nukha wa’abu dödö awö wamakao andrö! Ehaogö ndra’ugö lakhömi nibe’e Lowalangi, sagötö fa’ara. Olohuni ndra’ugö baru wa’aduhu andrö khö Lowalangi, ba otakula haga lakhömi Lowalangi si lö mamalö. Omasi Lowalangi, ena’ö oroma lakhömiu föna soi niha fefu. Lowalangi zame’e khöu dania töi da’e sagötö fa’ara : “Banua wa’ohahau dödö, bua wa’aduhu”, ba “Lakhömi, mbua wangata’ufi Lowalangi.”

Faoso’ö, ya’ugö Yerusalema, sindro ba hili salaŵa yaŵa ! Fakhölö’ö ba gatumbukha luo: Hiza ndraonou moroi si sa. Tohare ira moroi ba wondrege danö. Lao’ö li Lowalangi ni’amoni’ö sogaoni ya’ira; oi omusomuso dödöra, me lö I’olifugö ira Lowalangi. Sowaöwaö ahe föna nudura ira, me föna, hulö gurifö, me aheta ira khöu, ya’ugö Yerusalema. Iada’e Ifuli I’ohe ira khöu Lowalangi, ni’osa’ö ira, hulö zi so yaŵa ba gosa’osa razo andrö.

No I’oroi’ö Lowalangi, ena’ö lafadaya fefu hili salaŵa awö hilihili fefu, ba ena’ö lafo’ösi fefu zobawa danö tobali tanö salo’o, irege tola itörö soiGu, Iraono Gizara’eli andrö, – Iŵa’ö So’aya,- ba wa’ahono dödö barö lakhömiGu. Hiza gatua sebua awö döla geu samohua göi, oi solumö’ö Iraono Gizara’eli, me no Iŵa’ö Lowalangi. Lowalangi samösa zamasao dania soiNia andrö mangawuli ba khöra si fao fa’omuso dödö ba bakha ba haga lakhömiNia, ba fa’ahakhö dödö ba fa’aduhu si’oroi khöNia.- Barukhi 5:1-9

Simanö daroma li Lowalangi.-

Sinunö Fanema Li : Psallite No 126                        (ma Laudate No 59B, 1-2)

FOMBASO  II

Taroma Li Lowalangi

nihalö moroi ba zura Waulo ba niha samati ba mbanua Wilifi.-

Ya’ami ira talifusö !

Ero na itörö tödögu ami, lö mamalö u’andrö saohagölö khö Lowalangi. Ero na mangandrö ndra’o salahimi fefu, omuso dödögu wangandrö. U’andrö saohagölö khö Lowalangi, börö me no mitolo ndra’o wangombakha turia somuso dödö andrö, i’otarai mböröta, irugi iada’a. Si no mamörögö halöŵö si sökhi andrö khömi, ya’ia Lowalangi samösa. Ba faduhu dödögu, wa Ya’ia dania zanohugö halöŵö si sökhi andrö, irege awai ba luo wangawuli Yesu Keriso.

No sasi khögu Lowalangi, wa humulu sibai dödögu falukha khömi, börö wa’omasi andrö si’oroi Yesu Keriso. Da’ö wangandrögu salahimi : Ena’ö itugu tedou wa’omasimi andrö ba fa’aboto ba dödö sindruhu ba ba ngawalö wangi’ila fefu, ena’ö tola mifatimba tödömi hadia ia zatulö. Na simanö ami, ba sökhi wa’aurimi, moroi ba zota’unöŵa ma moroi ba wangadugö hadia ia göi ba luo, na mangawuli Keriso andrö. Ya fahöna khömi mbuabua wa’atulö dödö andrö si’oroi Yesu Keriso, ba wamolakhömi Lowalangi ba ba wanuno Ya’ia.- Flf 1:4-6.8-11

Simanö daroma li Lowalangi.-

Sinunö Föna Injil : Psallite No 201                               (ma Laudate No 59, 3)

INJIL

Turia Somuso Dödö khö Yesu Keriso nisura Luka.-

Me no felelima fakhe wamatörö Kaisaro Tiberio (ba mbanua Roma), me kumandru ba Yudaia ya’ia Wondrio Filato, ba samatörö ba Galilaia ya’ia Herode; me mamatörö ba Gituraia ba ba Darakhoniti ya’ia Wilifo, talifusö Herode; me mamatörö ba Gabilene ya’ia Lisania; me ira Hanasi ba Kayafa no ere sebua, ba ginötö da’ö tohare daroma li Lowalangi möi khö Yohane, ono Zakharia andrö, ba danö si mate. Andrö möi Yohane ba danö ma’asagörö ba zinga nungo nidanö Yoridano ba imane ba niha sato : “Akha mitema wanasa ba mibörögö wa’auri si bohou, ena’ö I’efa’ö horömi Lowalangi. No musura ba zuraYesaya, sama’ele’ö andrö : So niha si’ao ba danö si mate : Mihaogö lala khö Zo’aya, mifadaya lalaNia. Mifo’ösi fefu mbawa danö ! Fefu hili awö hilihili, – mi’alo’oi; mi’adölö’ö lala sabila ba mi’alösö’i’ö lala si wede’ö. Awena tola la’ila fefu niha wangorifi andrö, si’oroi Lowalangi.”- Luk 3:1-6

Simanö duria somuso dödö khö Zo’aya ya’ita, Yesu Keriso.-

Erönua :

Bakha ba wombaso siföföna nihalö moroi ba zura Barukhi andrö, na tahaogö ta’angeraigö, ba no tobali sambua famarou dödö sebua ba niha samati. Hadia mbörö wa tobali ia sambua famarou dödö? Ya’ia da’ö, me ba wehedenia andrö sindruhu idönia’ö niha samati ba wangeheta ya’ia moroi ba wa’abu dödö, ba hiza ena’ö lö mamalö la’omusoi’ö dödöra. Ba wamarou dödö andrö lö mamalö I’andrö khöda ena’ö lafadaya zohilihili ba lafo’ösi fefu zobawa danö. Ba zimanö dania tesödra wa’omuso dödö si lö mamalömalö andrö, timba zi so ba gosaosa wa’arazo andrö.

Bakha ba wombaso simendrua, tarongo hewisa wa’omuso dödö Waulo na ero itörö tödönia niha samati andrö ba mbanua Wilifi. Omuso dödö Waulo ba mangandrö saohagölö dödönia börö me no latohugö wanuriaigö turia somuso dödö andrö ba zi lö mo’aetufa. Turia si lö  mo’aetufa andrö nituriaigö niha samati ba mbanua Wilifi ya’ia wa’omasi ba nawö, fa’aboto ba dödö hadia zindruhu, ba famalua satulö.

Da’ö wangandrögu salahimi : Ena’ö itugu tedou wa’omasimi andrö ba fa’aboto ba dödö sindruhu ba ba ngawalö wangi’ila fefu, ena’ö tola mifatimba tödömi hadia ia zatulö

Bakha ba wombaso turia somuso dödö andrö nisura Luka, ibörögö sifao fangombakha haniha manö niha si so kuaso ba ginötö da’ö. Fefu niha si so kuaso andrö itutunö Luka ba wangombakha wa sindruhu duria somuso dödö andrö nirongoda irugi ma ne ma’ökhö. Ba zimanö göi, wa kuaso si so ba niha ba gulidanö andrö, tebörögö kuaso sibohou si’oroi Lowalangi. Böröta kuaso andrö ya’ia wa’aso duria somuso dödö andrö nifa’ema zama’ele’ö sebua andrö, Yohane.

Ösi turia somuso dödö andrö ya’ia wamulö’ö fangerangera, moroi ba kuaso nösi gulidanö, numalö ba kuaso wa’atulö andrö khö Lowalangi. Famulö’ö kuaso andrö tebörögö ia ba wamalalini era’era sifao fanema fanasa ni’amoni’ö ba wanasai horö. Ba wanema fanasa andrö dania, tebörögö wa’auri sibohou ba khö Lowalangi. Ba zimanö dania göi, fao ita ba wangehaogö lala khö Zo’aya, tafadaya lalaNia. No tafo’ösi fefu mbawa danö ! Fefu hili awö hilihili, – ta’alo’oi; ta’adölö’ö lala sabila ba ta’alösö’i’ö lala si wede’ö. 

Ba gafuriatania, tola manofu ita ba dödöda zamösana, (1) hadia no tola tobali ita sanuriaigö turia somuso dödö andrö? (2) hadia notola göi tadönia’ö nawöda ba wanuriaigö turia somuso dödö andrö?

Sitölu ngawua fombaso nirongoda andre, edöna idönia’ö ita ba wamalalini era’era me banua zorugo andrö no ahatö ia khöda zamösana. Ba zi manö lö mamalö ena’ö so ita ba wama’anö ba ena’ö lö mamalö so ita göi ba wamohaouni era’era. Ba zimanö dania no sama’anö ita ba wangehaogö lala khö Zo’aya, no tafadaya lalaNia. No tafo’ösi fefu mbawa danö ! Fefu hili awö hilihili, – ta’alo’oi; ta’adölö’ö lala sabila ba ta’alösö’i’ö lala si wede’ö. Ba gafuriatania dania oroma ita wa ya’ita andrö no tobali sanuriaigö turia somuso dödö ba fangomuso dödö ba khö Lowalangi. Amen.

Nifa’anö Kat. Ingatan Sihura, S.Ag. 

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011