LUO MIGU SITO’ÖLÖ SI – 25 DÖFI B

 FOMBASO  I

Taroma Li Lowalangi

nihalö moroi ba zura Wa′atuatua.-

Lamane khö nawöra niha samini tödö : Datatabigö niha satulö andrö, me no tobali samawukaisi ba si fatuwu ba halöŵöda. Ifobahulu ita wanawö oroisa ba itahigö wamahaöda. Datafaigi ua, hadia atulö niŵa’önia, ba datatandraigö hadia zalua, ba ginötö wa’amatenia dania. Na sindruhu ono Lowalangi niha satulö andrö, (molo’ö fehedenia) tatu lö zi lö Ihakhösi tödö ia Lowalangi, awö wa I’efa’ö ia ba danga zi fa’udu khönia. Datatandraigö ia, tafakao ba ta’o’aya ia. Awena ta’ila, he irugi wolo’ö awö wa’ebolo dödönia andrö. Data’etu’ö wanguhuku ya’ia, huku famunu safaito tabe’e khönia, börö me no iŵa’ö, wa lö zi lö Itolo ia Lowalangi.- Fa’at 2:12.17-20

Simanö daroma li Lowalangi.-

Sinunö Fanema Li : Psallite No 54 ma 3                     (ma Laudate No 7, 1-2)

 

FOMBASO  II

Taroma Li Lowalangi

nihalö moroi ba zura Yakobo.-

Ya’ami ira talifusö !

Ba zi so fa’afökhö dödö ba fakhögusa, ba da’ö so göi wamakuyu awö ngawalö wolau si lö sökhi soya ngawalö. Niha si no mangokhögö fa’atuatua si otarai si yaŵa,  si otarai Lowalangi, si oföna sibai khönia fa’ohauhau, ba fanete da’ö omasi mangatulö, sökhi na humede ia ba molo’ö. Fahöna khönia wa’ahakhö dödö, i’owua si sökhi. Lö i’ebua’ö dödönia zambuana ba lö mamini tödö. Duhu wa fa’asökhi andrö no bua moroi ba danömö wa’atulö nifazaewe niha somasi atulö. Heza i’otarai fefu fa’udusa ba fasosota ba gotaluami ? Tenga no moroi ba wangisömi andrö si lö mo’aetufa fasöndra bakha ba mbotomi ba wanöndra fa’ohauhau dödö dali gulidanö ? Mangisö ami, – ba lö misöndra, andrö omasi ami mamunu. No afökhö dödömi, – ba lö mikhamö hadia ia ni’aluimi. Börö da’ö fasoso ami ba fa’udu. Lö manö misöndra hadia ia, börö me lö mi’andrö khö Lowalangi. Ba he na’i no mi’andrö, ba lö sa’atö misöndra, börö me si lö sökhi gohitö dödömi, na mangandrö ami. Hadia ia ni’andrömi andrö, ba no ba wangohauhau’ö tödömi samösa.- Yak 3:16-4:3

Simanö daroma li Lowalangi.-

Sinunö Föna Injil : Psallite No 255                                 (ma Laudate No 7, 3)

 

INJIL

Turia Somuso Dödö khö Yesu Keriso nisura Mareko.-

Me luo da’ö, latörö danö Galilaia Yesu awö ndra nifahaöNia. Lö omasi Yesu, la’ila niha sato, heza so Ia, börö me mamahaö ira nifahaöNia Ia. Imane khöra : “Tetou’ö dania Nono Niha andrö ba danga niha, labunu Ia. Na no labunu, ba ngaluo si tölu, ifuli auri Ia.” Ba lö aboto ba dödö ndra nifahaöNia niŵa’öNia andrö, ba hiza, ata’u ira wanofu khöNia. Larugi Gafanauma. Me larugi nomo, Isofu khöra : “Hadia nifadönimi ba lala mege ?” Lö latema li, börö me ba lala mege fa’udu ira ba wamadöni,  haniha zabölö ebua ba gotaluara. Mudadao Ia ba Ikaoni ndra nifahaö si felendrua ba Imane khöra : “Niha somasi tobali si föföna ia, lö tola lö tobali safuria ia ba tobali enoni nawönia fefu.”   Ihalö samösa ndraono, Ifa’aso ia ba gotaluara, Italagui nono andrö ba Imane : “Haniha zanema iraono andre börö Ndra’o, no itema Ndra’o niha andrö. Ba haniha zanema Ya’o, tenga ha Ya’o nitemania,  noa göi itema Lowalangi samatenge Ya’o.” Mrk 9:30-39

Simanö duria somuso dödö khö Zo’aya ya’ita, Yesu Keriso.-

Erönua:

SOMANSI IDEIDE DA’Ö NI’EBUA’Ö

Bakha ba wombaso siföföna andre nihalö moroi ba zura Wa’atuatua, edöna ifaehagö khöda so’amakhaita ba niha sanaha tödö. Ba da’e ta’ila wa fanandraigö andrö lö mamalö ifa’aso ia ba gotalua zi sökhi. Fanandraigö nifaluania, lö mamalö indregegö irege zuzu wamati niha sisamösamösa ba khö Lowalangi. Fanandraigö nifalua andrö tola irugi wa’amate ya’ia huku famunu safaito andrö.

Bakha ba wombaso sidua tugu ifangöhösi nasa khöda hewisa niha sangokhögö fa’afökhö dödö ba nawönia niha. Bua wa’afökhö dödö andrö siföföna sibai iwa’ö Yakobo yaia wamakuyu. Famakuyu andre no mobörö ia moroi ba wangisö si no fasoso bakha ba dödö. Börö wangisö ba fakhögusa si si ba dödö niha sisamösamösa ba tola manö ifalua wamakuyu andrö irege tola manö ibunu nawönia niha.

Ba zitambai wangisö andrö göi, I’oroma’ö khöda Yakobo wa niha si so fa’atuatua andrö sioroi siyawa khö Lowalangi, ba si oföna sibai so khönia wa’ohauhau, ba fanete da’ö omasi ia mangatulö, sökhi na humede ia ba molo’ö. Fahöna khönia wa’ahakhö dödö, i’owua si sökhi. Lö i’ebua’ö dödönia zambuana ba lö mamini tödö. Ba da’e sindruhu te’oroma’ö khöda wa fa’ohauhau dödö andrö mobörö ia na so wa’atuatua si’oroi Lowalangi.

Bakha ba duria somuso dödö tarongo hewisa me I’ombakha’ö Yesu wa tetou’ö dania Nono Niha andrö, labunu ba ba ngaluo sitolu ifuli auri. Ba hiza hadia zalua khö ndra nifaha’ö, so khöra wamadöni haniha zebua ba gotaluara. Andrö dania wa’ibe’e wamaha’ö: “Niha somasi tobali si föföna ia, lö tola lö tobali safuria ia ba tobali enoni nawönia fefu”.

Bakha ba duria somuso dödö andre sindruhu wa so ba gotalua ndra nifaha’ö andrö wa lö aboto ba dödö hadia zi no ifa’ema khöra Yesu. Fanou’ö ba danga niha Yesu andrö ba ba gafuriatania labunu, no sambua lala ba wolo’ö somasi Lowalangi. Fe’amoi tobali sebua andrö lö tola lö’ö tobali side’ide. Ba wa’atobali side’ide andre, da’e sindruhunia zafökhö, töratöra ba we’amöi sawuyu zato.

Ono side’ide nibe’e Yesu ba gotalua ndra nifaha’ö, no sambua famaedo ena’ö lö mamalö so ba wangidengide’ö. Fehede Yesu wanguma’ö: “Haniha zanema iraono andre börö Ndra’o, no itema Ndra’o niha andrö. Ba haniha zanema Ya’o, tenga ha Ya’o nitemania, noa göi itema Lowalangi samatenge Ya’o.” Fehede da’e so gamakhaitania ba wanema’ö safökhö andrö. Moguna aboto ba dödöda: “ba wanema’ö safökhö andrö tatema lakhömi ba wa’alowalangi ba ba we’amöida side’ide andrö ba da’ö dania tasöndra nahia sebua andrö.

Si tölu ngawua fombaso nirongoda andre, sindruhunia sambua fo’amakhaita. Na ta’ohe ia ba wa’aurida si’ero ma’ökhö, asese sibai abölö omasi ita wangai nahia sebua andrö ya’ia zaoha ba tatimbagö wa’afökhö andrö. Ba wanga’ida nahia sebua ba saoha andrö fa’itaria so wa’afökhö dödö ba fanandraigö ba nawö. Fefu da’ö börö wangisö si so bakha ba dödö niha si lö fa’atuatua. Ba hiza na so khöda wa’atuatua si’otarai Lowalangi andrö, so khöda wa’ohauhau wangerangera ena’ö sifao fanaha tödö wanema’ö fefu fanandraigö andrö. Ba wanema’ö sifao fanaha tödö andrö dania tasöndra wa’omuso dödö ba tefolakhömi Lowalangi ba wa’aurida. Amen.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Markus Injil Yang Belum Selesai Yogyakarta: Kanisius, 2019

St. Eko Riyadi, Pr, Markus “Engkau Adalah Mesias!” Yogyakarta: Kanisius, 2011