FANGANDRÖ BA WANOU’Ö BA DÖDÖ MARIA SI LÖ SINEGU
Basilika Santo Petrus
25 Maret 2022
He Maria, Ina Lowalangi ba Inama göi, ba ginötö wanandraigö andre möiga tanöfönau. Me no ya’ugö Ninama, No ö’omasi’ö ba no ö’ila göi haniha ndra’aga: lö hadöi si lö ö’ila hadia ia zitobini bakha ba dödöma. He Ina sahakhö tödö, no asese marasoi we’asomö bakha ba gotaluama ba wolohe khöma fa’atulö! Lö irai ölulu ndra’aga ba wanuturu lala khöma saekhu ba khö Yesu, Razo wa’atulö.
Ba hiza no elungu ndra’aga moroi ba lala satulö andrö. No olifu ndra’aga ngawalö wamahaö moroi ba ngawalö zalua ba ndröfi safuria andre, irege ato niha si no mate börö wasuwöta simendrua ba zi sambua soi ba gulidanö andre. No faröi ndra’aga maroi ba wahasaradödö sino mafabu’u bakha ba zisambua gamakhaita ba gotalua ngawalö soi. No ma’ositengagö wa’atulö ba fanötöna niha sato sifao göi wanötöna ndraono sibohou ebua, irege mofökhö ndra’aga börö wangokhögö tödö fakhögusa, börö me ohitö dödöma ba ni’angeraigöma ha soguna ba ngawalö soima ero zamösana, irege lö ba dödöma ba wangobadödöi awöma niha, irege aekhu ndra’aga bakha ba wa’aombö dödö ba fa’abudödö. No mahalö khöma lala ba wa lö ba dödöma Lowalangi, omuso dödöma ba owuawua dödöma ba ngawalö ni’era’erama samösa, irege itugu fayawa ba afaito ndra’aga ba wamakao niha si lö horö, meno ma’okhögö ngawalö gamagama ni’oguna’ö ba wasuwöta. No maröi we’amöi ba wa’atobalima enoni ba nawöma niha ba ba nösi nomoma. No mafakiko ngawalö zinanö si sökhi si no tohöna ba gulidanö andre börö wasuwöta ba ngawalö horö nifaluama, no mafesokho dödö Nama ba zorugo, sanötöna wa sifatalifusö ndra’aga. Ba hiza, tobali ndra’aga niha si lö mangobadödöi nawöma niha, baero ndra’aga samösa. Iada’a sifao fa’afönu wa’aila ndra’aga we’ao: Hakhösi tödö ndra’aga, he So’aya!
Ina Ni’amoni’ö, bakha ba dalu gotalua wa’afökhö horö nifaluama, sifao fo’erönuisima ba wa’ambö fa’abölöma ba ngawalö zalua ba wasuwöta ba fa’afaito si lö sökhi nifaluama, öfasugi ba dödöma wa lö erai Iröi ndra’aga Lowalangi, ba hiza lö mamalö Ifaigi ndra’aga moroi ba wa’omasiNia, ba lö mo’aetufa wa’ahakhö dödöNia, irege I’ohe ndra’aga bakha ba wa’auri sibohou. No Ifili ndra’ugö khöma ba Ibali’ö ndra’ugö so tödö si lö sinegu, sohahau ba ni’amoni’ö ba tobali nahia wolu’mö’ö Gereja ba ngawalö soi fefu niha. Sifao ohitö dödö Lowalangi sahakhötödö, lö mamalömalö fao’fao ndra’ugö khöma; mendrua manö ba ginötö wa’abasaki safökhö nirasoima bakha ba gofanöwa lala wa’aurima, lö faröi ndra’ugö khöma ba wame’e menemene sifao fa’omasi ba fa’ahele dödö.
Iada’a möiga tanö fönau ba wanoko mbawandruhö dödömö. Ba ya’aga andre iraono ni’omasi’ömö, wa ero na inötö lö mamalömalö so ndra’ugö khöma ba ökaoni ndra’aga ba wamalua famalalini era’erama. Ba ginötö wa’ogömigömi dödöma andre, ma’andrö wanolou ba amualagö khöma wa’atulömö andrö ba ohede khöma samuza tö: “hadia tenga no so ndra’o ba da’e, ya’o ba no inau?” Irege tola ö’efa’ö ndra’aga moroi ba zamöbö tödöma ba ö’etu’ö gamakhaita ginötöma. Ba hiza khöu matou’ö wa’aro dödöma ba faduhu dödöma, wa lö mamalömalö ö’efa’ö ndra’aga moroi ba ngawalö wanandraigö andre töratöra ba ginötö iada’e, ya öfondrondrogo gangandröwama andre ba iagö ba gotaluama ba wanolou ya’aga.
Da’ö göi nifaluamö ba mbanua Kana ba danö Galilaia, ba ginötö ö’andrö khö Yesu ba ba da’ö
dania Ifalua zahölöhöli dödö
siföföna. Ba wondrorogö fa’omusodödö ba wangowalu andrö, öwa’ö khöNia: “No ahori khöra nagu” (Yoh 2:3). Iada’a he ina, ya öfuli öwa’ö wehede ba fangandrö andrö, me ba
ginötö da’e, no ahori khöma nagu wanötöna ba fa’omuso dödöma itugu ahoe ba
fa’atalifusötama si no awuwu. No ma’olifugö lala wa’auri si sökhi ba wa’anihama ba mawöwösi howuhowu wa’atulö andrö. No mabokai dödöma ba wa’afaito ba ba wa’elungu. Sindruhu lömamalö matötöna ndra’aga ba ma’andrö wanolou me ina ndra’ugö khömö!
Börö da’ö, he inama maria, fondrondrongo gangandröwama.
Döfi nasi, böi tehegö tedulu ba te’ohe ndra’aga bakha ba dalu gotalua wasuwöta,
Tawöla Gamabu’ula li Sibohou, ya öbe khöma wangerangera si sökhi ena’ö tebokai lala khöma ba wolohe ya’aga bakha ba wa’atulö.
Ratu Zorugo, ya te’ohe mangawuli wa’atulö Lowalangi ba gulidanö andre.
Ya tetayaigö ba dödöma watiusa ba fa’owökhi dödö ba wolau balö, ba ya öfaha’ö ndra’aga ba wangefa’ö sala olalöwama.
Ya te’efa’ö ndra’aga moroi ba wasuwöta, lumö’ö danöma moroi ba ngawalö gamagama wasuwöta samakiko ulidanöma andre.
Ratu Rosari, ya öbokai dödöma ba ngawalö zoguna ba wangandröma sifao fa’omasi.
Ratu Soi Niha, tuturu khöma lala ba wa’atalifusöta ba nawöma niha.
Ratu Wa’atulö, ya ö’amualagö ba öfangele wa’atulö soguna ba gulidanöma andre.
He ina, ya börö we’ao ba wa’abu dödömö andrö zangehaogö fa’abe’e dödöma. Ya moroi ba dawahörömö, zombali’ö danö soköli tobali ena’ö sökhi ba tebohouni mangawuli börö watuwusama ba fatiusa bakha ba dödöma. Ba dalu gotalua wasuwöta moroi ba li ba dözödözö wana, ya börö wangandrömö tola tebulö’ö wangerangerama ba tobali atulö ndra’aga. Ya sifao fa’abölö dangau me ina ndra’ugö khöma, zombambaya ba samahono tödö ndra niha nifakao soloi börö nono wana alitö. Ya ölumö’ö ba ötalagui ira he ina ba wame’e khöra fondrara dödö ba khö ndra talifusöma si no moloi moroi ba wa’abua gölöra ba wondröi omo awö nahia danö wa’atumbura. Ya moroi ba wa’abu dödömö andrö, zamehulu tödöma ba wamalua fa’ahakhö dödö ba fa’omasi, irege tola teboka dödöma sifao fangerangerama ba wanoloni ba ba wondrorogö ndra talifusöma si no mesokho ba si no tefosafi ba te’aröu’ö moroi ba gotalua niha sato.
Ina Lowalangi fondrege Ni’amoni’ö, ba ginötö so ndra’ugö ba gahe röfa, Ifaigi Yesu ndra nifaha’ö andrö si so ba ngaimö ba Imane: “Hiza nonou, alawe” (Yoh 19:26). Ba wehedenia andrö no itou’ö ndra’aga ba dangau. Ba khö ndra nifaha’ö andrö ba ba khöma göi gofu haniha manö Iwa’ö: “Hiza ninau” (ayati 27). Inama Maria, iada’e omasiga matema’ö ndra’ugö bakha ba wa’auri ba ba gofanöwa lala wa’aurima. Ba ginötö andre, fefu niha sitebai ba saetu fanötöna no musindro ira ba ngaimö ba gahe röfa ba latou’ö ma’asambua mbotora ba wa’afaduhu dödö ba khöu ena’ö ba zifao ndra’ugö tola te’amoni’ö mbotora ba khö Keriso. Ba zi sambua soi ba Ukraina ba Rusia, lafolakhömi ndra’ugö sifao fa’omasi sebua, iada’a möiga tanö fönau ba walömamalö mohulu dödöu bakha ba wa’ahakhö dödö ba khöra ba zi dozi soi ba ba niha si no tefakao börö wasuwöta, fa’olofo, falö’atulö ba fa’anumana.
Börö da’ö, he Ina Lowalangi ba Inama göi, ba dödömö andrö no si lö sinegu, sifao fehulu dödö matou’ö ba mabe’e mbotoma sifao Gereja ma’asambua ba fefu soi niha, töratöra ba soi Rusia ba Ukraina. Ya’ötema nifaluama sifao fa’afönu wamati ba fa’omasi andre. Ena’ö fasuwöta andrö tola teböhöi irege tola tesöndra wa’atulö andrö ba zisagörö gulidanö. Ba wehede “ya itörö khögu” si tumbu moroi bakha ba dödömö tobali ofanöwa ba lala wa’aurima ba wondrugi mbawandruhö ba khö Razo Wa’atulö. Faduhu dödöma wa sifao tödömö, fa’atulö andrö tola tefatumbu’ö mangawuli. Khöu mafasömba’ö lala wa’auri fefu dozi niha, he soguna ba wanötöna ba zi dozi niha ma’afefu sifao fangiwa dödö ba tötönafö ba zisagörö gulidanö.
Sifao fangandrömö, ya lö mamalömalö mangele wa’ahakhö dödö Lowalangi yawa ba gulidanö andre sifao fa’atulö si sökhi, irege tola tefo’ösi mangawuli ngaluo si sökhi ba wa’aurima. He Inama, si no tefahowu’ö moroi ba Geheha Ni’amoni’ö, ya ö’ehaogö mangawuli wa’aurima sifao fa’atulö soroi Lowalangi. Ya lömamalö ndra’ugö “gumbu wanötöna wa’auri”, sangele bakha ba dödöma si no oköli andre. Bakha ba dabinamö tobali niha Yesu; ya ötoloni ndra’aga ena’ö itugu te’abölö’ö ndra’aga bakha ba wa’atalifusötama, me ya’ugö zi no irai mangötö lala ba wo’anöröi gulidanöma andre, iada’a ya öfahaö ndra’aga saekhu bakha ba lala wa’atulö. Amen.-
 |
| Paus Fransiskus mengajak umat berdoa dalam Upacara Konsekrasi Kepada Hati Maria yang Tak Bernoda |
Fangandrö andre, sindruhunia tefalua ba ginötö wangowasaini “Fanuriagö Fa’atumbu Zo’aya” ba ngaluo Jumat, 25 Maret 2022, ba hiza börö wahasara dödö ndra Uskup ba zi sambua soi ba Indonesia andre, andrö sifao fanötöna ena’ö “Fangandrö ba Wanou’ö ba Dödö Maria Si Lö Sinegu” andre tola te’olohesi wangandrö andre ba ngaluo migu si-4, 27 Maret 2022 ba ginötö föna Paska.
0 comments:
Posting Komentar