LUO MIGU SI – 4 BA GINÖTÖ FÖNA PASKA DÖFI C

 Nifa’anö Kat. Ingatan Sihura, S.Ag.

FOMBASO  I

Taroma Li Lowalangi nihalö moroi ba zura Yosua.-

Imane So'aya khö Yosua, sololohe Iraono Gizara'eli : "Ma'ökhö andre Uheta khömi wa'aila andrö, wa no sawuyu ami ba danö Mesirayi." Ba molombase Ndraono Gizara'eli ba Giligala, si so ba ndraso ba Yerikho andrö, ba lalau gowasa Paska andrö, ba zi fele'öfa desa'a ba mbaŵa si föföna, me no bongi. Ba la'a mbua danö, me sara wongi aefa da'ö, ba roti si lö mu'aisöni ba böra nifakoe. Ba tebato manna andrö, me sara wongi aefa da'ö, me la'a mbua danö, ba lö'ö sa'ae roti manna andrö ba Ndraono Gizara'eli. La'a mbua danö Gana'ana, ba ndröfi andrö.- Yos 5:9a.10-12

Simanö daroma li Lowalangi.-

Sinunö Fanema Li : Psallite No 34, 1-3                 (ma Laudate No 103, 1 + 4)

 

FOMBASO  II

Taroma Li Lowalangi nihalö moroi ba zura Waulo si dua

ba niha samati ba mbanua Gorindro.-

Ya'ami ira talifusö !

Niha si no ha sambua khö Keriso, no sibohou mu'a'asogö niha andrö. No aheta zi tohöna ba niha andrö, ba no tobali bohou ma'afefu. Ba fefu da'ö Lowalangi zangohalöŵögöigö. Ba mböröta si fatiu tödö ita khö Lowalangi, ba I'atulö'ö ita khöNia, si fao fama'ema Yesu Keriso. Ba khögu no Ibe'e halöŵö wanuriaigö turia fangatulö andrö. Lowalangi sa zi no mangatulö'ö khöNia ösi gulidanö, ba khö Keriso, lö Ibe'e ömöra lalöra andrö. Ba no Ifohalöŵö ndra'o Lowalangi ba wanuriaigö turia andrö. Börö da'ö, ya'aga andre no tengetenge Keriso ba fahuhuo ndra'aga khömi hulö na Lowalangi samösa zi fahuhuo khömi : Ba döi Keriso, ma'andrö sibai : Mifa'atulö'ögö ami khö Lowalangi ! Lö horö Keriso, ba no Ibali'ö Ia Lowalangi solu'i horöda, ena'ö börö wa-ha-sambua khö Keriso tobali sökhi gamakhaitada khö Lowalangi.-  2 Kor 5:17-21

Simanö daroma li Lowalangi.-

 

Sinunö Föna Injil : Psallite No 225C                              (ma Laudate No 165)

INJIL

Turia Somuso Dödö khö Yesu Keriso nisura Luka.-

 

Me luo da'ö, ato niha sangozara beo awö niha bö'ö nifotöi sebua horö zangondrasi Yesu ba wamondrondrongo huhuoNia. Me la'ila da'ö ira Farizai'o ba ira sangila amakhoita, anuzu dödöra, lamane : "Hiza, Itema niha si lö sökhi Niha andre ba manga Ia awöra." Börö da'ö Ilau khöra gamaedola Yesu, Imane : "So samösa niha si so ono matua, darua. Imane siakhi khö namania : "He ama, be'e khögu dana khögu ba haratoda !" Ba ibagibagi harato andrö ba ndraononia si darua. Lö ara furi ö, ifamawa fefu harato nitemania andrö siakhi, awena ilau mofanö ba danö saröu. Ba da'ö ihorigö gefenia andrö ba zi lö boto. Me no ahori hadia ia khönia, itörö lofo sabölöbölö danö andrö, ba ibörögö alua wo'amböta ba zoguna. Möi ia mu'olembai samösa niha ba danö andrö, manga gazi. Ifatenge ia niha andrö wokubaloi bawi ba mbenua. Omasi ia ifo'ösi dalunia lölö mbanio, ö mbawi, ba samösa lö same'e khönia. Awena maniasa ia, imane : "Ha wa'ato zohalöŵö khö namagu, si lö ambö ö, ba ya'o, arakhagö tekiko ndra'o wa'olofo ba da'e. Mofanödo, möido khö namagu ba umane khönia : He ama, no ufazökhi horö föna Lowalangi ba tanö fönau. Lö sa'ae sinangea ndra'o, latötöi ndra'o onou. Akha hulö zohalöŵö khöu ndra'o, ama." Mofanö ia, mangawuli khö namania. Me aröu ia nasa moroi ba nomo, no i'ila ia amania ba ahakhö dödönia, fagohi ia, italagui mbagi, fa'ago bawa ia khönia. Ba imane khönia ono : "He ama, no ufazökhi horö föna Lowalangi ba tanö fönau. Lö sinangea sa'ae ndra'o latötöi ndra'o onou." Ikaoni ndra sohalöŵö khönia amania, imane : "Mi'alio'ö mihalö nukha sabölö sökhi andrö ba mibe'e khönia. Mibe'e laeduru ba durunia ba badagahe ba gahenia. Awena mihalö nono zaŵi satabö ba mitaba. Talau manga ba ta'omusoi'ö dödöda, börö me no mate nonogu andre ba no ifuli auri iada'e.  No taya ia, ba hiza, no musöndra mangawuli." Ba ibörögö la'omusoi'ö dödöra. Gasagasa da'ö, no so ba nowi nono sia'a. Me mangawuli ia, me no ahatö ia ba nomo, ba irongo wanunö ba folaya. Ikaoni samösa zohalöŵö khöra, isofu khönia : "Hadia da'ö ba nomo ?" Imane sohalöŵö andrö : "No mangawuli nakhiu, ba no ifataba'ö nono zaŵi sabölö atabö amau, börö me no ifuli isöndra nakhiu, me lö si göna ia hadia ia." Mofönu sibai nono sia'a andrö, irege lö edöna möi ia yomo. Börö da'ö möi baero namania, muhedehede ia khönia. Ba imane khö namania : "Hiza, no ha'uga fakhe mohalöŵö ndra'o khöu, ama, ba lö irai ufadaö niŵa'öu. Ba khögu lö irai öbe sara nono mbiribiri, ena'ö u'omusoi'ö dödögu, si fao ira si fahuwu khögu. Ba me no so nonou andrö, si no mangohori haratomö si fao ira alawe sohoröhorö, no öfataba'ö khönia nono zaŵi satabö." Itema linia amania, imane : "He onogu, si lö tebulö fao khögu ndra'ugö, ba fefu zi so khögu ba no khöu. Ba hiza, lö tola lö'ö talau manga ba ta'omusoi'ö dödöda, me akhiu si no mate andrö, no ifuli auri; no taya ia, ba no musöndra mangawuli."- Luk 15:1-3.11-32

Simanö duria somuso dödö khö Zo'aya ya'ita, Yesu Keriso.-

 

Erönua:

 

Gambara Famaedo [Dok. Pribadi]

NA SO WAMALALINI ERA’ERA BA TESÖNDRA WANGEFA

 Bakha ba wombaso siföföna tarongo wehede Zo’aya khö Yosua ba wangeheta khöra fa’aila wa no sawuyu. Tandra wa’aheta khöra wa’aila ba wangosawuyu andrö ba lalau gowasa paska, lalau manga sami ba wanaba ono mbiribiri satabö. Tandra andre ba no fangefa’ö moroi ba gawalö wangosawuyu ba fe’amöi tobali niha sibohou. Itehegö khöra So’aya wolau gowasa paskah andrö börö me I’ila so khöra wamalalini era’era So’aya.

Bakha ba wombaso sidua, tarongo wamaha’ö Waulo andrö ba mbanua Gorindro. Famaha’ö Waulo andrö so’amakhaita ba wa’atobali niha sibohou fefu niha sino hasambua ba khö Keriso. Fahasambua ba khö Keriso andrö tabörögö ba wanemada Fanasa Ni’amoni’ö. Ba wanasa ni’amoni’ö andrö tesasai ita moroi ba ngawalö horö ba tesou ita tobali niha sibohou.

Turia Somuso Dödö andrö nisura Luka, edöna I’ombakha’ö khöda hewisa gamuata nono selungu andrö. Ono selungu andrö ba no sangohori okhöta. Ba hiza börö me so khönia wamalilini era’era andrö ba lö mamalö isöndra wa’ahakhö dödö namania. Ba wamalalininia era’erania, ba da’ö isöndra wa’auri sibohou.

Ba zitölu ngawua wombaso andre edöna ifaehagö khöda sambua gerönua, ya’ia da’ö: “na so wamalalini era’era ba tesöndra wangefa”. Ba wamobörö ibe’e khöda dumaduma Ndraono Gizara’eli andrö sedöna mamalalini era’era. Ba wamalalini era’erara andrö itehegö teheta ira moroi ba wa’aila ba fangosawuyu andrö. Famalalini era’era andrö ena’ö si’oroi dödö ba wamalua ya’ia. Ono siakhi andrö nifotöi selungu andrö dumadumania.

Ba wa’auri si’ero ma’ökhö, fasalata ba famalua si fatimba ba hörö Lowalangi, lö mamalö tola aefa fefu niha samati. Ba hiza börö wamati ba fahasambua ba wanasa ni’amoni’ö andrö, sifao ita ba wa’amate ba khö Keriso, ba sifao ita göi ba wemaosonia andrö solakhömi. Inötö Föna paska andre no inötö sisökhi ba wangahatö’ö mangawuli ba khö Lowalangi ba wamalalini era’era. Na si’oroi dödö wamalalini era’era, ba lö mamalö tesöndra wangefa. Ba gafuriata, amaedola zatua zanguma’ö: “na si’oroi dödö tö wowengu ba na si’oroi dödö tö we’e, ba alua yawa dawa hörö ana’ate. Ba na tenga tö si’oroi dödö tö wowengu, ba na tenga tö si’oroi dödö tö we’e, ba alua yawa nidanö hörö mane sibai gitö gae”. Yafaoma itolo ita Lowalangi. Amen.

  

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011