LUO MIGU SI – 3 BA GINÖTÖ FÖNA PASKA DÖFI C

Minggu, 20 Maret 2022

FOMBASO  I

Taroma Li Lowalangi nihalö moroi ba zura Moze si dua.-

 Me luo da'ö, ikubaloi mbiribiri Moze khö matuania Yetero,  si no ere ba danö Midiano. Irugi ba wondrege danö si mate i'ohe mbiribiri, irugi hili Lowalangi andrö, hili Horebi. Ba da'ö i'oroma'ö ia khönia mala'ika Zo'aya andrö ba holahola galitö, soroi ngafu ndroi. Me ifaigi ba zahatö Moze, oroma wa humolahola ngafu ndroi andrö, ba lö'ö sa akhozi. Imane dödönia Moze : "Möido sa mufaigi gangilata sebua andrö. Hana wa lö akhozi ngafu ndroi andrö ?" Me I'ila So'aya, möi Moze mufaigi, mu'ao khönia Lowalangi moroi ba ngafu ndroi andrö, Imane : "He Moze ! He Moze !" Imane Moze : "Ya'e ndra'odo !" Imane So'aya : "Böi hatö'ögö ! Heta mbadagahe ba gaheu, me no tanö ni'amoni'ö naha andrö, ba zi so'ö !" Ba Imane na : "Lowalangi namau Ndra'odo, Lowalangi Gaberahamo, Lowalangi Giza'aki, Lowalangi Yakobo." Awena ibini'ö mbawania Moze, me ata'au ia wamaigi Lowalangi. Imane So'aya : "No Ufaigi, wa lahöndrögö tou soiGu andrö, si so ba danö Mesirayi, ba no Urongo wangaröngaröra andrö, ena'ö aefa ira ba khö ndra mandrura andrö. Noa sa U'ila wa'abölö wamakaora andrö. Andrö möiDo tou sa'ae, ba wangefa'ö ya'ira ba danga niha Mesirayi, ba wamawu'a ya'ira ba danö andrö, ba wolohe ba danö si sökhi, si no ebolo, ba danö ba zi falawu susu ba ŵe ŵani." Imane Moze khö Lowalangi : "Na no urugi Ndraono Gizara'eli ba na umane khöra : Lowalangi ndra tuami andrö zamatenge ya'o khömi, ba na lasofu : Haniha döiNia ? – Ha uŵa'ö khöra ?" Imane Lowalangi khö Moze : "Ya'odo sa YAHWE – SI SO andrö." Ba Imane na : "Da'ö niŵa'öu ba Ndraono Gizara'eli : Yahwe andrö, Lowalangi ndra tuami, Lowalangi Gaberahamo, Lowalangi Giza'aki ba Lowalangi Yakobo zamatenge ya'o khömi. Da'ö döiGu irugi zi lö aetu.  Da'ö wamotöi Ya'odo götögötö wa'ara".-  2 Moz 3:1-8a.13-15

Simanö daroma li Lowalangi.-

 

Sinunö Fanema Li : Psallite No 103, 1-3                   (ma Laudate No 86, 1-2)

 

FOMBASO  II

Taroma Li Lowalangi

nihalö moroi ba zura Waulo si föföna

ba niha samati ba mbanua Gorindro.-

Ya'ami ira talifusö ! Mitörö tödömi, hadia zalua khö ndra tuada,  me aheta ira ba Mesirayi. Ahori so ira barö lawuo andrö solumö'ö ya'ira; ahori latörö nasi zukhu, irege ahori latema wanasa khö Moze ba lawuo ba ba nasi andrö. Fefu ira la'a ha sambalö gö moroi yaŵa ba labadu ha sambalö nidanö moroi yaŵa.  Labadu nidanö moroi ba gara andrö, si fao khöra. Ba kara andrö, ya'ia Keriso samösa. He ŵa'ae simanö, ato ba gotaluara andrö zi lö omasi Lowalangi, irege Itehegö, wa mate ira ba danö si mate. Tobali dumaduma khöda da'ö, ba wamangelama ya'ita, ena'ö böi omasi ita zi lö sökhi, simane nilaura. Ena'ö göi böi mifosumange hadia ia ni'olowalangigömi, simane nilaura ösa. Böi milaŵalaŵa Lowalangi, simane nilaura ösa ba khöra, irege mate ira nibunu mala'ika wa'amate andrö. Alua khöra da'ö ena'ö tobali famahaöda da'ö. Ba wamangelama ya'ita, wa tetanö da'ö ba zura ni'amoni'ö, ya'ita si fakhamö amozua götö danö andre. Andrö, na so zanguma'ö tödönia si zizio ia, ya mufaigi, fa böi alau.- 1 Kor 10:1-7a.10-12

Simanö daroma li Lowalangi.-

Sinunö Föna Injil : Psallite No 224C                            (ma Laudate No 86, 3)

 

INJIL

Turia Somuso Dödö khö Yesu Keriso nisura Luka.-

Me luo da'ö, so niha sanutunö khö Yesu sanandrösa ba niha Galilaia, nifabunu'ö Wilato, me lafasömba'ö wasömbata ba nomo Lowalangi, irege faruka ndrora ba ndro wasömbata andrö khöra. Imane khöra Yesu : "Hadia miwai da'ö dandra, wa abölö ebua horö niha Galilaia andrö moroi ba horö niha Galilaia bö'ö, me no göna ira da'ö ? Tenga simanö. Uŵa'ö khömi : Na lö mifalalini gera'erami sa, ba oi simanö wa'atekikomi dania. Ma si feleŵalu niha andrö, simate ba Ziloa, me ilangögö ira malige. Hadia miwai da'ö dandra, wa abölö ebua horöra moroi ba niha bö'ö, si so ba Yerusalema ? Tenga simanö. Ba Uŵa'ö khömi : Na lö mifalalini gera'erami sa, ba oi simanö wa'atekikomi dania." Ba Iŵa'ö gamaedola andre : "So samösa zokhö töla marafala, nitanö ba kabu nagu khönia. Möi niha andrö mangalui bua marafala andrö, ba lö nisöndrania. Andrö imane ba zohalöŵö ba kabu nagu : Hiza, no tölu fakhe ae möido ba da'e wangalui bua marafala andrö, ba lö nisöndragu. Obö döla geu andrö ! Hadia guna so ia ba da'e?  Alimagö danö khönia!  Imane sohalöŵö ba kabu andrö : He ama, akha auri döfi tö geu andre. Da'ufasui wogao tanö ba ulölö mbörönia. Ma'atö mowua ia ba ndröfia. Ba na lö'ö, hana na öfa'obö'ö ia."- Luk 13:1-9

Simanö duria somuso dödö khö Zo'aya ya'ita, Yesu Keriso.-

Moze ba Lowalangi [gambara moroi: sabda.org]

Erönua:

LOWALANGI ANDRÖ BA NO FA’OMASI

Bakha ba wombaso sisara andre nihalö moroi ba zura Moze si dua, tefarongogö hewisa gangi’ilata andrö ni’ila Moze. So galitö ba hiza lö akhozi. Ba meno irugi zinga nahia andrö Moze, awena aboto ba dödönia wa Lowalangi sogaoni ya’ia da’ö. Ba da’e sindruhu I’oroma’ö haniha zindruhunia ia Lowalangi andrö. Lowalangi andrö ba no Yahwe, Lowalangi Gaberahamo, Lowalangi Giza’aki, ba Lowalangi Yakobo. Lowalangi andrö göi ba no Lowalangi sahakhötödö samondrongo ngaröngarö dödö soiNia ba sangalui lala ba wangeheta soiNia moroi ba wa’abu dödö andrö.

Fehede Waulo andrö bakha ba wombaso sidua, sindruhu te’oroma’ö hewisa wolumö’ö Lowalangi Iraono Gizara’eli andrö. fanöröra asi zukhu ba folumö’ö lawuo andrö no sambua fanasa ba wahasambua wefao khö Moze. Fanöröra tanö simate andrö göi, sindruhunia no sambua tandra ba wamalalini era’era ba fanasa andrö no sambua ndrela wamohouni. Fefu zalua andrö sindruhunia no tobali tandra wa’ahakhö dödö Lowalangi ba soiNia samalalini era’era, hewa’ae ba gafuriata oya niha si lö nasa faduhu tödö khö Lowalangi.

Amaedola Yesu andrö bakha ba wombaso turia somuso dödö sindruhunia no tola tobali ösi wombaso turia somuso dödö andrö. Hadia mbörö? Hewa’ae hawa’ebua horö niha, lö manö nasa tola mulawa wa’ebua wa’ahakhö dödö Lowalangi andrö. Amaedola zohalöwö andrö solaunasa obula ba mbörö zinanö andrö ena’ö mowua, no sambua tandra wa lö mamalö ibe’e nasa ginötö ba wamalalini era’era andrö Lowalangi ba niha gulidanö.

Sitölu ngawua wombaso andre edöna I’oroma’ö wa Lowalangi andrö ba no fa’omasi. Fa’omasi Lowalangi andrö ya’ia wa’ahakhö dödö si lö mo’aetufa ba niha samalalini era’era. Fanörö inötö prapaskah andre no amaedola wanörö tanö simate ba wamalalini era’era. Ba wanörö tanö simate andrö sindruhu böi mangiwa dödö wa Lowalangi andrö lö faröi ia ba wolumö’ö. Ba hiza ya’aro dödö wa dozi samalalini era’era, isödra wa’ahakhö dödö Lowalangi me Lowalangi andrö no fondrege zahakhötödö. Ba wa’ahakhö dödöNia andrö lafotöi ia “LOWALANGI ANDRÖ BA NO FA’OMASI”.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011