LUO MIGU PASKA SI - 4 Tahun B

FOMBASO  I

Taroma Li Lowalangi

nihalö moroi ba zura "Halöŵö ndra Rasul".-

 Me luo da'ö, nifatörö Geheha Ni'amoni'ö muhede Wetero, imane : "He ya'ami, sololohe soida, ba he ya'ami, satua mbanua ! Na lafareso ndra'aga, ma'ökhö andre, börö me no malau zi sökhi wamadöhö niha sombuyumbuyu ba na omasi ami mi'ila, hewisa lala wamadöhö ya'ia, ya aboto ba dödömi awö fefu Ndraono Gizara'eli : Börö wa'abölö ba kuaso Yesu Keriso, banua Nazareta, niforöfami, ba no ni'orifi Lowalangi mangawuli ba gotalua zi mate. Ba döiNia andrö, wa muzizio fönami niha da'e, si no döhö fökhö. Da'ö Yesu andrö niŵa'ö ba zura ni'amoni'ö : Kara nitibo'ömi, ya'ami sotomo, no tobali kara sabölö moguna. Ha khö Yesu tola te'orifi niha. Börö ba zi sagörö ulidanö, lö niha bö'ö si no manema kuaso moroi khö Lowalangi ba wangorifi ya'ita."- HalRas 4:8-12

 Simanö daroma li Lowalangi.-

 

Sinunö Fanema Li : Psallite No 118, 1+3+6             (ma Laudate No 97, 1-2)

 

FOMBASO  II

Taroma Li Lowalangi

nihalö moroi ba zura Yohane si föföna.-

 

He ya'ami ira talifusö !

Mifaigi, ha wa'ebua wa'omasi Nama khöda, irege tebe'e töida ono Lowalangi. Ba duhu simanö : No ono Lowalangi ita. Da'ö mbörö, wa lö aboto ba dödö niha gulidanö ita, börö me lö saboto ba dödöra Lowalangi. He ya'ami ni'omasi'ö ! Ono Lowalangi ita iada'e, ba lö'ö na mu'oroma'ö khöda, hewisa ita dania zindruhunia. No ta'ila : Na so Keriso dania, tobali ita simane Ya'ia, börö me tanehegö dania Ia, hewisa Ia zindruhunia.-  1 Yoh 3:1-2

Simanö daroma li Lowalangi.-

 

Sinunö Föna Injil : Psallite No 239                              (ma Laudate No 97, 3)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu : "Ya'odo gubalo si sökhi. Itehegö mate ia föna mbiribiri kubalo si sökhi. Enoni nibu'a gazi, tenga kubalo ia, ba tenga göi sokhö biribiri. Na i'ila tohare nasu gatua, ilau moloi ba iröi mbiribiri andrö. Ira'u mbiribiri andrö asu gatua ba ifazawili.  Moloi genoni nigazi andrö, börö me mohalöŵö ia börö gazi. Lö ba dödönia biribiri andrö.Ya'odo gubalo si sökhi. Simane fangila Nama Ya'o awö wangilaGu Ama simanö göi wangilaGu biribiriGu, ba la'ila göi Ndra'o. Utehegö nosoGu khöra. So nasa mbiribiri khöGu tanö bö'ö, si tenga moroi ba kandra andre. Lö tola lö'ö Uhalö ira göi, ba lafondrondrongo liGu dania, ba tobali ha sambua ngawawa ira ba ha samösa gubalo. Andrö I'omasi'ö Ndra'o AmaGu, börö me Utehegö nosoGu ba wanema Ya'ia mangawuli. Samösa lö si tola morabu fa'auri moroi khöGu, ba hiza, ba wa'aohagölö Utehegö nosoGu. Tola Ube'e wa'auriGu ba tola Ufuli Uhalö;  kuaso andrö no Utema khö NamaGu".-  Yoh 10:11-18

 Simanö duria somuso dödö khö Zo'aya ya'ita, Yesu Keriso.-

 

Erônua:

YESU GUBALO SI SŐKHI

Ya’ami ira talifusô ni’omasi’ô.

            Ba wombaso si-1, tarongo, wamaduhu’ô Wetero fôna ndra sololohe awô ndra satua mbanua Ndraono Gizara’eli sangandrô ba wamadôhô fôkhô niha si no ombuyumbuyu tôla. Imane Fetero: “He ya’ami, sololohe soida, ba he ya’ami, satua mbanua! Na lafareso ndra’aga, ma’ôkhô andre, bôrô me no malau zi sôkhi wamadôhô niha sombuyumbuyu ba na omasi ami mi’ila, hewisa lala wamadôhô ya’ia, ya aboto ba dôdômi awô fefu ndraono Gizara’eli: Bôrô wa’abôlô ba kuaso Yesu Keriso, banua Nazareta, niforôfami, ba no ni’orifi Lowalangi mangawuli ba gotalua zi mate. Ba dôiNia andrô, wa muzizio fônami niha da’e, si no dôhô fôkhô.”

            Ya’ami ira talifusô, moroi ba wa’abôlô Geheha Ni’amoni’ô si no môi tou khô Wetero lô ibatobato wamaduhu’ô sanandrôsa khô Yesu andrô, si no maoso moroi ba gotalua niha si no mate, imane wanguma’ô: “Da’ô Yesu andrô niŵa’ô ba zura ni’amoni’ô: Kara nitibo’ômi, ya’ami sotomo, no tobali kara sabôlô moguna. Ha khô Yesu tola te’orifi niha. Bôrô ba zi sagôrô ulidanô, lô niha bô’ô si no manema kuaso moroi khô Lowalangi ba wangorifi ya’ita.” Sifao famaduhu’ô Wetero andre, ya’ita gôi si no nifahaô Yesu, tola itugu barani ita ba wanuriagô, wa Yesu andrô si no Ibayoini Lowalangi faoma EhehaNia; bôrô kuaso nibe’e Lowalangi khôNia, tola tefadôhô ngawalô wôkhô si gôna niha gulidanô, ba tola gôi te’orifi ira.

            Ya’ami ira talifusô ni’omasi’ô. Bakha ba wombaso si-2 nomege, nihalô moroi ba zura Yohane; ba da’ô ibe’e wa’aboto ba dôdô khôda fefu sanandrôsa ba wa’ebua wa’omasi Lowalangi Ama ba khôda ya’ita samati khôNia. Imane wanguma’ô Yohane: “He ya’ami ni’omasi’ô! Mifaigi, ha wa’ebua wa’omasi Nama khôda, irege tebe’e tôida Ono Lowalangi. Ba duhu simanô: No Ono Lowalangi ita.” Itohugô nasa wanguma’ô Yohane: “He ya’ami ni’omasi’ô! Ono Lowalangi ita iada’e, ba lô’ô na mu’oroma’ô khôda, hewisa ita dania zindruhunia. No ta’ila: Na so Keriso dania, tobali ita simane Ya’ia, bôrô me tanehegô dania Ia. Hewisa Ia zindruhunia.”

            Bakha ba wombaso Injil, nihalô moroi ba Injil nisura Yohane; ba da’ô tedunôdunô khôda sanandrôsa khô Yesu andrô, si no kubalo si sôkhi ba wa’auri niha samati. Moroi ba wombaso Injil nomege, ba da’ô I’ombakha’ô Yesu gamaehutara “gubalo sindruhu” faoma “si tenga kubalo”. Imane Yesu: “Ya’odo gubalo si sôkhi. Itehegô mate ia fôna mbiribiri kubalo si sôkhi. Enoni nibu’a gazi, tenga kubalo ia, ba tenga gôi sokhô biribiri. Na i’ila tohare nasu gatua, ilau moloi ba irôi mbiribiri andrô. Ira’u mbiribiri andrô asu gatua ba ifazawili. Moloi genoni nigazi andrô, bôrô me mohalôŵô ia bôrô gazi. Lô ba dôdônia biribiri andrô.”

            Ya’ami ira talifusô ni’omasi’ô. Sakali tô Ifangôhôsi wanguma’ô Yesu, wa ya’ia gubalo si sôkhi, Imane: “Ya’odo gubalo si sôkhi. Simane fangila Nama Ya’o awô wangilaGu Ama simanô gôi wangilaGu biribiriGu, ba la’ila gôi Ndra’o. Utehegô nosoGu khôra.” Bôrô da’ô ya’ami ira talifusô, so dua ngawalô zi tobali fanofu khôda ya’iada’ô: 1) Hadia talulu wa’aurida tobali rorogôfô gubalo si sôkhi andrô ya’ia Yesu, irege lô tola te’ala ba lô tekiko wa’aurida? 2) Ya’ita gôi no tobali kubalo, bôrô Wanasa Ni’amoni’ô si no tatema luo no, hadia no gôi tobali ita kubalo si sôkhi bakha ba ngasi halôŵôda ero zamôsana ita? Ya Faoma itolo ita Lowalangi ba wa’atobali kubalo si sôkhi bakha ba gotalua wa’atalifusôta. Amen.  

 

Nifa’anö Kat. Ingatan Sihura, S.Ag.

 

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia!” Yogyakarta: Kanisius, 2011