HEWISA ZISÖKHINIA WANEMA’ÖDA BA ZONDRÖI ULIDANÖ ANDRÖ?

 Fombaso ba mböröta wo’erönusi.

 

Fa’amate andrö sökhi [Gambara nihalö moroi ba mbuku “Kematian adalah Nikmat”]

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra nifahaöNia : "Böi abu dödömi ! –  Mi'amati khö Lowalangi ba mi'amati khöGu !  Oya nahia ba nomo NamaGu. Na tenga simanö mena'ö, ba lö Uŵa'ö khömi. MöiDo sa muhaogö naha khömi. Ba na no möiDo, na no Uhaogö naha khömi, mangawuliDo,ba Uhalö ami khöGu, ena'ö so ami göi ba zi so Ya'o. Ba no mi'ila lala ba zi möi Ndra'o." Imane khöNia Toma : "He So'aya, lö ma'ila, heza möi Ndra'ugö, ba he moroi ma'ila lalaU ?" Imane khönia Yesu : "Ya'odo lala, Ya'odo wa'aduhu, Ya'odo wa'auri. Lö sondrugi Ama, na lö itörö Ndra'o".- Yoh 14:1-6

Simanö duria somuso dödö khö Zo'aya ya'ita, Yesu Keriso.-

 

Lala wanema’ö Fa’amate [Gambara nihalö moroi ba mbuku “Kematian adalah Nikmat”]

Erönua Sadogodogo:

Ba wa’auri niha ba gulidanö andre, so sambua gabula dödö sasese lafotöi ia “högö wangabu dödö”. Högö wa’abu dödö andrö ya’ia wa’amate niha. Na so niha simate, fefu zoroiyomo ba talifusö saröu ba sahatö, oi fao ba wa’abu dödö me niha si no mate andrö ba no tobali falukhata safuria saae ginötö andrö.

Hewa’ae fa’amate andrö i’ohe wa’abu dödö ba zoroiyomo irugi, so sa’atö ginötö ba zoroiyomo ba wa’aheta ira moroi ba wa’abu dödö andrö. Mondrege wa’ara, döfi la’ohe wa’abu dödö ba wa’amate andrö. Ba hiza aefa da’ö si lö tola lö’ö göi maoso zoroiyomo ma’afefu moroi ba wa’abu dödö andrö ba wanohugö nasa lala wa’aurira.

Moroi ba zimane da’e, sindruhu moguna tabotokhi ba dödöda wa fa’amate andrö lö mu’ila mutimbagö. Dozi sauri sanörö hunö wa’aniha andrö ba si lö tola lö’ö itörö mbawandruhö wa’amate. Andrö wa lö moguna abu sibai dödö, börö me fefu niha itörö mbawandruhö wa’amate, ha ya’i inötö ba lala wa’amate zifaehu.

Na tahaogö göi ta’angraigö, hadia moguna göi abu dödöda na so zimate ba gotalaua wongambatöda? Moguna! Moguna göi abu dödöda na so moroi ba gotalua wongambatöda zondröi ulidanö. Hadia zinagea ta’abusitödö ya’ia wa’anihada ba masimasi si no tatema moroi ba zoroiyomo andrö ba mendrua manö ba wo’ambötada ba wangomasi’ö ya’ia sagötö fa’aurinia. Ba hiza fa’abudödö ba da’e lö moguna mulahisi sibai.

Ba wa’abu dödö andre tatu manö so nifotöi fondrara dödö. Fondrara dödö nibe’e ndra talifusö ba sifao awö ba wa’abu dödö andrö ha irugi wehede. Ba hiza fondrara dödö si lö mamalö andrö ya’ia zi sambua taroma li Lowalangi simane nirongoda ba wombaso. Moroi ba wombaso andre iwa’ö Yesu: “Böi abu dödömi!”. Hadia mbörö wa lö abu dödö simane niwa’ö Yesu andre, ya’ia na so khöda wamati ba na so khöda fanötöna saro me Ya’ia lala, Ya’ia wa’aduhu, Ya’ia wa’auri. Lö sondrugi Ama, na lö itörö Yesu andrö.

Hewisa ena’ö so khöda wamati ba fanötöna saro mo’amakhaita ba wa’amate andrö:

1.    Moguna so wanema’ö sifao famati. Fa’amate andrö lö mu’ila mutimbagö, me niha gulidanö andrö ba no okhöta Lowalangi. Khönia fefu ginötö ba khönia so gangetula haniha nihalöNia somasi Ia mangawuli ba khöNia. Ba zimanö moguna tatema’ö wa’amate andrö tenga afuriata, ba hiza böröta gofanöwa sibohou ba wamati ba khö Lowalangi. Ba zimanö sökhi na tawa’ö tenga simate ba hiza sondröi ulidanö. Ba da’e so khöda wanötöna wa so nasa wa’auri na no aefa wa’amate andrö.

2.    Moguna so wanötöna saro. Fa’amate andre lö moguna mulahisi sibai wa’abu dödö, ba hiza ena’ö tobali ia fangaro ba famahatö wamati ba khö Lowalangi. Fa’amate andre ba no möi famasugi ba dödö hadia no sinangea ma no sindruhu mama’anö dozi zamösana na so ia? Börö da’ö, na so zondröi ulidanö andrö ifasugi ba dödö dozi samati wanötöna saro andrö ba khö Keriso.

3.    Fa’amate andrö ba no si sökhi. Fa’amate andrö iheta niha moroi ba ngawalö wolau sala tanöföna Lowalangi mendrua manö ba wa’afökhö wanörö lala wa’auri ba gulidanö. Ba hiza fa’asökhi wa’amate andre tenga ena’ö I’etu’ö samösa ia niha. Ba hiza na nihalö Lowalangi sifao fa’asökhi ia.

Taroma li Lowalangi andre ba no sambua fondrara dödö sebua sitebai ibe’e niha. Taroma li andrö göi ba no same’e fa’aro dödö ba niha ba wanema’ö fa’amate andrö sifao famati ba fanötöna saro. Ya lö mamalö sanema’ö sifao famati ba fanötöna saro ita na so zondröi ulidanö andrö ba tenga sifarahu bakha ba wa’abu dödö. Amen.