TAROMA LI LUO MIGU, 27 FEBRUARI 2022 LUO MIGU SI - 8

FOMBASO  I

Taroma Li Lowalangi

nihalö moroi ba zura Yesu Ono Zirakhi.-

 

Na lafadögödögö dafi, - sasao zi toröi yaŵa. Simanö göi na lafareso wa'a-lö-sökhi niha, oroma ba huhuonia. Simane famareso bowoa tanö, latunu ba galitö, simanö göi niha, ba wehedenia tetandraigö. Bua zinanö zangoroma'ö fa'asökhi nowi, simanö göi niha, huhuonia zangoroma'ö ösi dödönia. Böi suno gofu haniha, fatua lö fahuhuo ia, me da'ö sa lala ba wanandraigö niha.- Sir 27:4-7.11+13

 

Simanö daroma li Lowalangi.-

 

Sinunö Fanema Li : Psallite No 92, 3-4                          (ma Laudate No 101)

 

FOMBASO  II

Taroma Li Lowalangi

nihalö moroi ba zura Waulo si föföna ba niha samati ba mbanua Gorindro.-

 

Ya'ami ira talifusö !

Ba ginötö maoso niha si no mate andrö ba wa lö obou sa'ae, awena itörö daroma li andrö si so ba zura ni'amoni'ö : “No tefufu wa'amate andrö ba no musöndra wemöna. He zo wemönau, fa'amate ? Hezo zöfumö fa'amate ?” Söfu wa'amate, ya'ia horö. Ilau halöŵönia horö andrö ba goroisa. Ta'andrö saohagölö khö Lowalangi, me no Ibe'e khöda wemöna andrö, si fao fama'ema Zo'aya ya'ita, Yesu Keriso. Börö da'ö, ya'ami ira talifusö ni'omasi'ö, mi'abölö'ö ami ba mi'a'aro'ö dödömi. Böi mifamalö wohalöŵö khö Zo'aya soroi ba dödö, börö me no mi'ila : tenga zayazaya gölö wa'erege dödömi andrö khö Zo'aya.-  1 Kor 15:52b.54b-58

 

Simanö daroma li Lowalangi.-

 

Sinunö Föna Injil : Psallite No 258                                  (ma Laudate No 98)

 

INJIL

Turia Somuso Dödö khö Yesu Keriso nisura Luka.-

 

Me luo da'ö, Iŵa'ö gamaedola andrö Yesu khö ndra nifahaöNia, Imane : "Hadia tola i'ohe danga niha sau'a niha sau'a bö'ö, ba lala ?  Tenga faoma aekhu ira ba dögi ? Lö hadöi nifahaö sabölö ebua moroi khö zamahaö ya'ia. Ba nifahaö, si no awai manörö sekola, fagölögölö ia khö gurunia. Hana wa ö'ila golowingö ba hörö dalifusöu, ba boto geu ba hörömö, lö ö'ila ? Hewisa wa tola öŵa'ö khö dalifusöu : He talifusö, aine, da'uheta golowingö andrö ba höröu ! – ba hiza, boto geu andrö ba  hörömö lö ö'ila ? He samini tödö ! Heta ua mboto geu ba hörömö, awena öfaigi lala wangeheta olowingö ba hörö dalifusöu. Töla geu si sökhi lö i'owua mbua si lö sökhi, simanö göi döla geu si lö sökhi, lö i'owua mbua si sökhi. Fefu ngawalö döla geu, ba mu'ila moroi ba mbuania.  Manaze sodoi lö i'owua mbua marafala; ba sa'asa'a mao lö i'owua mbua nagu. Niha si sökhi i'owua mbua si sökhi si oroi dödönia si sökhi. Niha si lö sökhi i'owua mbua si lö sökhi si oroi dödönia si lö sökhi. Hadia sa zi no fahöna ba dödönia, da'ö tobali wehede mbewenia".- Luk 6:39-45

 

Simanö duria somuso dödö khö Zo'aya ya'ita, Yesu Keriso.-

Famaedo Wangata'ö olowingö

Erönua:

LÖ ARÖU MBUA MOROI BA DÖLA

Ya’ami ira talifusö ni’omasi’ö!

Bakha ba wombaso siföföna nihalö moroi ba zura Yesu ono Zirakhi andrö tedunödunö hewisa wanandraigö ena’ö tola ta’ila hawa’asökhi dödö niha si samösa. Fanandraigönia andrö te’oroma’ö ia ha ba huhuonia ba ba wanandraigö ya’ia. Fanandraigö ba huhuo andre sindruhu ha nirongoniha. Ba hiza fehede salua baeha andrö hadia tola sindruhu I’olohia’ö boto ma lö’ö. Andrö na lawa’ö: “fehede si’olohia’ö boto, ba famarou si’olohia’ö buabua”. Ba zitambai da’ö, böi dania alua niwa’ö zatua föna wanguma’ö: “no ihaogö mbawa ba no ihaogö li ba so sa dödönia zilatao wa’alö sökhi”.

Bakha ba wombaso sidua andrö nihalö moroi ba zura Waulo ba niha samati ba mbanua Gorindro, sindruhu no sambua menemene ia ba fangaro dödö. Fa’amate mboto tanö khöda lö mu’ila mutabigö, börö me moroi ba danö tehalö ia ba mangawuli ba danö. Ba hiza, femaoso mboto niha samati andrö no sambua ndrela wangawulida ba nomo nama, ba simaoso andrö no boto sauri andrö nihöli Zo’aya ya’ita Yesu Keriso moroi ba huku horö fa’amate. Ba da’e I’a’aro’ö dödöda Faulo wa lö söfu wa’amate andrö börö wamatida khö Yesu Keriso. Femöna Yesu andrö moroi ba wa’amate, ba no göi möi femönada ba wogamö fa’auri si lö aetu.

Bakha ba wombaso turia somuso dödö tarongo gamaedola Yesu so’amakhaita ba niha sau’a ba ba niha sangata’ö olowingö nawönia. Amaedola Yesu andre edöna ifaehagö khöda wa lö mamalö oföna ua tafaha’ö ita awena dania tafaha’ö nawöda – oföna ua tafaigi ba tasului ita samösa, awena tafaigi ba tasului nawöda. Ba da’e moguna sibai gamaedola sanguma’ö: “Tufotufoi mbeweu bulu lato, atö muhede’ö”.

Amaedola Yesu andre göi edöna ifaehagö khöda wa hadia geluaha na ta’ila tawa’ö ba nawöda ma ta’ata’ö nawöda na lö ta’ila ta’o’ö buabuada. Fehede Yesu ba wangata’ö olowingö nawö ba botogeu siso ba höröda, sindruhu ibe’e khöda sambua wanegu wa tola manö abölö ebua zifasala ita moroi ba zifasala nawöda andrö. Ba zimanö moguna tafaha’ö ita moroi ba nilau Yesu si no dumaduma khöda.

Ya’ami ira talifusö ni’omasi’ö!

Ba zitölu ngawua wombaso andre sindruhu ebe’e khöda sambua degudegu ba fangaro dödö wa lö mamalö ena’ö:

1)      Oföna ua ta’oroma’ö ia ba mbuabuada, awena tafa’ema ia ba niha. Amaedola Latin zanguma’ö: “Nemo dat quod non habet” eluahania: lö u’ila ube’e hadia ia zi lö khögu.

2)      Lö mamalö moguna tabohouni ba tafaha’ö ita moroi khö Yesu andrö si no samahaö sebua ia khöda. Börö wolo’öda buabua Yesu andrö, sindruhu no delada ba wemöna awönia. Irege dania lö sa’ae söfu wa’amate andrö börö wemönada ba wefao khö Keriso.

3)      Famatida ba khö Yesu keriso andrö lö mamalö ena’ö oroma ia I’otarai wehededa numalö ia ba mbuabuada. Hadia wamati si so ba dödö, oroma ia ba wamalua fa’omasi ba nawö. Ba hadia ia zalua baeha andrö sindruhu si’oroi dödö side’ide ba tenga börö gohitö dödö tanöbö’ö.

Ba gafuriata, taroma li Lowalangi nirongoda andre sindruhu tarasoi ia bawa’aurida si’ero ma’ö wa “ha amuata nifaigi ba ha buabua nitöngöni”. Amen.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011

Stefan Leks, Tafsir Injil Lukas Yogyakarta: Kanisius, 2003