TAROMA LI LOWALANGI LUO KAMI SAFUSI DÖFI B

Bacaan dan Renungan: Kamis Putih.

sumber: https://selisip.com

 

FOMBASO I

 Taroma Li Lowalangi nihalö moroi ba zura Moze si dua.-

Me luo da'ö, Imane So'aya khö ndra Moze A'aroni, ba danö Misirayi : Sia'a mbaŵa khömi dania mbaŵa da'e; böröta mbaŵa ia ba ndröfi. Mimane ba Ndraono Gizara'eli fefu : Ba zi mewulu ba mbaŵa da'e, ya mufaigi khönia nono mbiribiri zamösana, ero sambua omo, ba sarasara nono mbiribiri. Ono mbiribiri si lö hadia ia zi sala nifaigi, si matua ba si döfi fa'ebua; na tenga ono mbiribiri, ba ono nambi nitutuyu. Mihoe, irugi zi mewele'öfa mbaŵa, tanö owi lataba, dozi Iraono Gizara'eli. Ya muhalö ösa ndro ba lagule'ö ba gehomo, fatambai mbawandruhö ba ba högö mbawandruhö, ba nomo andrö, ba ni'a ya'ia. Ba ösinia, ba ba zi bongi andrö la'a, nitunu. Roti si lö mu'aisöni ba bulu ndru'u safeto nawö. Ba mimane wemanga : Si no mamöbö talu ami ba mbadagahe ba gahemi ba si'o ba dangami. Mita'ita'i wemanga ya'ia ! PASKA ia khö Zo'aya, eluaha : Fanörö Zo'aya. Börö ba zi bongi andrö Utöröi danö Mesirayi ba Ububunu nono sia'a fefu ba danö Misirayi, he ba niha ba he ba guriföra. Do andrö ba nomo, ba zi so ami, ba tandra khöGu, fangorifimi; Na U'ila ndro andrö, ba Utalu'i ami, lö göna ami famakiko andrö. Ba baŵa da'ö, ba baŵa wanörötödö khömi dania; si lö tebulö khömi wolau ya'ia, irugi zi lö aetu.-  (2 Moz 12:1-8.11-14)

 

Simanö daroma li Lowalangi.-                         Sato : Ma'andrö …

 

Sinunö Fanema Li : Psallite No 116B, Cara A    (ma  Laudate No  150 ma 99A)

 

 

FOMBASO II

Taroma Li Lowalangi

nihalö moroi ba zura Waulo si föföna

ba niha samati ba mbanua Gorindro.-

 Ira talifusö !

Moroi khö Zo'aya samösa wangohonogöi, zi no ufa'ema khömi : Yesu So'aya, ba zi bongi, me te'a mböliNia, Ihalö roti, I'andrö saohagölö khö Lowalangi, Iboboto roti andrö ba Imane : "Mitema ba mi'a : BotoGu da'e, nibe'e soguna khömi. Milau da'e ba wanörö tödö Ya'o !"-  Simanö göi me no aefa wemanga, Ihalö piala nagu ba Imane : "No amabu'ula li si bohou piala andre, nifotandro ba ndroGu."  Ero na mi'a roti andre, ya'ami ira talifusö, ba na mibadu nösi piala andre,  mituriaigö wa'amate Zo'aya irugi mangawuli Ia dania.-   (Kor 11:23-26)

 

Simanö daroma li Lowalangi.                          Sato : Ma'andrö …

 

Sinunö Fanema Li : Psallite No 119C                             (ma Laudate No 95)

INJIL

Turia Somuso Dödö khö Yesu Keriso nisura Yohane.-

 Me föna gowasa Paska andrö, aboto ba dödö Yesu, wa no irugi inötö aheta Ia ba gulidanö andre, möi Ia khö Nama. No I'omasi'ö dana khöNia ba gulidanö, föna, ba  I'omasi'ö ira irugi gamozua. Me manga ira, maoso Yesu ba ngai gö, Ibokai mbaruNia sebua Iböbö lembe löwilöwiNia. Ilau nidanö ba naha wanasa, Ibörögö isasai gahe ndra nifahaNia ba I'osi lembe andrö, ni'olembeNia. Me irugi Zimoni Fetero, imane Fetero khö Yesu : "Ya'ugö zanasai ahegu So'aya ?" Itema linia Yesu, Imane khönia : "Lö aboto ba dödöu iada'a hadia nilauGu, ba hiza, aboto ba dödöu dania." Imane khöNia Fetero : "Lö irai utehegö, wa Ösasai gahegu." Itema liNia Yesu Imane : "Na lö Usasai'ö, lö si faböbö khöGu ndra'ugö." Imane khöNia Simoni Fetero : "Na simanö, So'aya, böi ha ahegu Ösasai : tanga awö högö göi." Imane khönia Yesu : "No tehaogö mboto niha si no mondri. Lö moguna tesasai ia sa'ae; ha ahe zoguna nisasai. No muhaogö ami andre, ba lö dozi." Noa sa I'ila Yesu, haniha zi manga mböliNia.  Da'ö mbörö Iŵa'ö : "Lö dozi muhaogö ami." Me no aefa Isasai gahera Yesu, ifuli I'obaru mbaruNia ba dumadao Ia, Imane khöra : "Hadia, no aboto ba dödömi nilauGu khömi andrö mege ?  Mibe'e töiGu Guru ba So'aya. Si sökhi na miŵa'ö da'ö, börö me duhu. Na no Usasai gahemi, Ya'odo andre, So'aya ya'ami ba Guru khömi, mo'ömö göi ami, faoma misasai gahe nawömi. Ube'e dumaduma andre khömi, ena'ö göi milau simane nilaugu khömi.-  (Yoh 13:1.4-15)

 

Simanö duria somuso dödö khö Zo'aya ya'ita, Yesu Keriso.

*=============================================================*

Renungan:

FE’AMÕI ENONI SI LÕ MO’AETUFA

(PELAYANAN TIADA AKHIR)

Õsi Wombaso Sifõfõna:

Bakha ba wombaso sifõfõna tarongo hewisa me ibe’e goroisa Lowalangi ba Ndraono Gizara’eli ba wanaba ono mbiribiri ba ba wemanga ya’ia. Ba wemanga ono mbiribiri andrõ ba a’oi so goigoi. Sifõfõna lataba ia ba zimewele’õfa mbawa; simendrua, lataba ero zi sambua omo; simedõlu, ono nitaba ba si lõ sifasala ma si lõ sinendreõ; siõfa, ono mbiribiri andrõ simatua ba sidõfi fa’ebua; silima; lahoe I’onarai zimewulu irugi zimewele’õfa mbawa; si’õnõ, tanõ’owi lataba; sifitu, lahalõ õsa ndro ba lagule’õ ba gehomo mbawandruhõ fatambai ba ba hõgõ mbawandruhõ; siwalu, ba zibongi la’a nõsi nono mbiribiri andrõ nitunu ba bulugeu safeto nawõ sifao roti si lõ muaisõni; sisiwa, nifata’ita’I wemanga ya’ia. Fefu goigoi nibe’e andre moguna ba mo’amakhaita ia ba wanõrõ Zo’aya ba zibongi ba wangai ono sia’a ba sia’agurifõ. Ba hiza ba nomo ni’ila Zo’aya so ndro andrõ ba lõ ihalõ ba da’õ. Inõtõ andrõ ba no PASKA ia ma FANÕRÕ ZO’AYA geluahania.

Na tahaogõ ta’angeraigõ nõsi wombaso sifõfõna andre sindruhunia, moguna ba mo’amakhaita ia ba wolo’õ (ketaatan) niha sisamõsamõsa. Folo’õ oroisa Lowalangi ba wamalua si no ifa’ele’õ andrõ ba no sambua ndrela wangorifi ba niha solo’õ ya’ia. Iraono Gizara’eli solo’õ oroisa Lowalangi andrõ ba no teheta ira moroi ba wa’amate. Ba wanaba urifõ andrõ ba no tobali sambua famasõmba’õ ba fe’amõi enoni Lowalangi wolo’õ oroisania.

Õsi Wombaso Sidua:

Bakha ba wombaso sidua ifaduhu’õ gõi khõda Faulo hewisa gõi wangohonogõigõ Yesu fatomesa safuria andrõ ba gotalua ndra nifaha’õ. Ihalõ roti ba iboboto ba ibe’e khõ ndra Nifaha’õNia si no famaedo MbotoNia. Simanõ gõi mako si so agu andrõ si no famaedo NdroNia si no teduwagõ. Femanga roti si no tobali BotoNia ba famadu agu andrõ si no tobali DoNia, no sambua fanõrõtõdõ ba fanuriaigõ fa’amate Zo’aya.

Famaduhu’õ Waulo andre no sambua famaduhu sanga’aro’õ dõdõda ba wamati khõ Yesu Keriso si no Ono Lowalangi andrõ. Ba wanuriaigõ andrõ gõi da’e no tobali sambua ndrela khõda ba wangebua’õ amatõrõwa Lowalangi andrõ ba gulidanõ. Famaduhu’õ Waulo andre gõi no tobali danedane ba wamasindro nifotõi Perayaan Ekaristi khõda bakha ba Gereja Katolik Ni’amoni’õ. Fatomesa nifalua Yesu andre no sambua Paska ia sifao ira nifaha’õ ba sifao ya’ita gõi ira niha samati irugi ma ne ma’õkhõ.

Õsi Wombaso Turia Somuso Dõdõ:

Bakha ba wombaso Turia Somuso Dõdõ, sindruhu I’oroma’õ khõda Yesu hewisa we’amõi enoni andrõ. Fe’amõi enoni andrõ I’iagõ nahia zawuyu, ya’ia wanasa ahe. Ba we’amõiNia enoni andrõ, iheta nukhania sebua ba ibõrõgõ isasai gahe ndra nifaha’õNia, hewa’ae so ma’ifu wamabu’a khõ Wetero. Meno aefa wanasa ahe andrõ awena Isofu: “Hadia no aboto ba dõdõmi nilauGu khõmi andrõ mege?” Fanofu Yesu andre no ndrela wangombakhaNia geluaha wanasa ahe andrõ nifaluaNia. Eluaha nifaluaNia andre ya’ia ena’õ faoma tobali ngoningoni nawõ.

Ba Duria Somuso Dõdõ andre gõi edõna ifa’ele’õ khõda Yesu hewisa we’amõi enoni andrõ. Samõsa sondrõnia’õ andrõ no enoni zato. Ba we’amõi enoni andrõ moguna so wa’ahele dõdõ ba wame’e dumaduma ba niha nidõnia’õ. Da’e ni’oroma’õ Yesu andrõ me lõ khõnia fa’aiwõ ba lõ khõnia fa’alawõ ba wangai halõwõ fondrege zide’ide andrõ.

Amarahuta:

Fombaso ba Turia Somuso Dõdõ nirongoda ba zima’õkhõ andre, tola terahugõ ia ba we’amõi enoni si lõ mo’aetufa. Sambua ndrela salio oroma ba we’amõi enoni andrõ ya’ia na so wolo’õ. Ba wolo’õ andrõ tesõndra howuhowu. Ba wombaso sifõfõna ifaduhu’õ wa bõrõ wolo’õ andrõ lasõndra wangorifi Iraono Gizara’eli. Folo’õ no tobali bõrõ wangorifi ba niha. Simanõ gõi zimõi enoni andrõ, si lõ tola lõ’õ so wolo’õ li zamatenge ma samataro ya’ia.

Ba we’amõi enoni andrõ nasa tugu I’oroma’õ ba wombaso sidua ya’ia ba wa’atobali roti ba agu sauri andrõ. Ba wa’atobali roti andrõ awena tola moguna ia na tebagisi. Ba wanõndra agu sisõkhi andrõ, moguna itõrõ wolazi irege tesõndra nagu sisõkhi. Ba we’amõi enoni andrõ gõi moguna tebagisi ena’õ tola moguna ba zato. Hewisa lala wombagisi ma fanõrõ wolazi andrõ? Lalania ya’ia ba wombelegõ boto salahi zato, tõratõra we’amõi enoni zato. Ba da’e gõi lõ ifatou wa’ate’alania, tõratõra na so wolohi awõ wanandraigõ ba lala halõwõ andrõ. Ba zimane da’e asese oroma haniha zindruhu tola mõi enoni andrõ, ya’ia na tola itaõgõ fefu da’õ.

Yesu zame’e dumaduma ba we’amõi enoni andrõ ba zimanõ gõi irõi khõda goroisa ena’õ tatohugõ gõi ba wafaoma mõi ita enono nawõda. Fa’afõkhõ ba fa’akaosa ba we’amõi enoni andrõ tenga tobali bõrõ wombuwu gohitõ dõdõ ba we’amõi enoni ba hiza ena’õ tobali ia famehulu dõdõ (spirit/semangat) ba we’amõi enoni. Bõrõ da’õ: sanau õlõ irugi gamozua da’õ dania ni’orifi. Amen.