Liturgi Taroma Li Döfi A/B/C hlm. 21.
FOMBASO I
Taroma Li Lowalangi
nihalö moroi ba zura Yesaya, sama'ele'ö.
Ha wa'asökhi na tohare niha si fagohi moroi yaŵa ba
hili, si'ao'ao : Fa'atulö ! Niha
solohe turia somuso dödö, sanuriaigö: No te'orifi ita ! Niha sanguma'ö ba mbanua Yerusalema : No razo
Lowalangimi !
Fondrondrongo, mu'ao ndra sanaro mbanua, ba owuawua
dödöra fefu, me i'ila höröra wangawuli Zo'aya ba hili Ziona. Mifehi'a, ya'ami adudula Yerusalema, dozi mifarongogö.
Irara sa'ae dödö soiNia So'aya, I'orifi Yerusalema. I'oroma'ö wa'abölö dangaNia
ni'amoni'ö andrö, So'aya, ba zanehe soi niha fefu. La'ila wangorifi andrö khö Lowalangi dozi wondrege
danö.-
Yes 52:7-10
Simanö daroma li Lowalangi. Sato: Ma'andrö …
Sinunö Fanema Li : Psallite
No 98 Ant. 2
(ma Laudate No 41,1-2 ma 42)
FOMBASO I
Taroma Li Lowalangi nihalö moroi ba zura ba niha Heberai'o.-
Ya'ami ira talifusö !
Me föna, ba no asese muhede Lowalangi ndra tuada, nifa'ema ndra
sama'ele'ö, ba oya
ngawalö lala I'oguna'ö. Ba ginötö safuria andre, no muhede Lowalangi khöda si fao
fama'ema NonoNia. Si
fao fama'emaNia,
wa no I'a'asogö Lowalangi gulidanö
ma'asagörö. Börö da'ö Ifataro Ia
Lowalangi göi ba wanema ondröita fefu
hadia ia. Ba khöNia tefohaga lakhömi Nama ba tefofamaedo wa'alowalangiNia. Ya'ia zanaya
fefu hadia ia taroma li fa'abölöNia andrö. No I'a'asogö wangehao ulidanö ba wameta
horö, ba dumadao sa'ae Ia ba zorugo, ba gambölö Lowalangi fondrege zalaŵa.
Ba no tohude Ia moroi khö ndra mala'ika, ndrohundrohu
wa'atohude döi andrö nitemaNia moroi ba
döira. Lö irai Iŵa'ö Lowalangi khö samösa mala'ika : "OnoGu Ndra'ugö, ma'ökhö andre no
U'adonogö Ndra'ugö." Ma zui : "AmaNia Ndra'odo, ba
OnoGu Ia." Ba ginötö Ifatenge NonoNia sia'a Lowalangi ba
gulidanö andre, Imane : "Ya mangalulu mala'ika Lowalangi fefu khöNia !" Heb 1:1-6
Simanö daroma li Lowalangi.- Sato : Ma'andrö …
Sinunö Föna Injil : Psallite No 212 (ma Laudate No 41,
3 ma 23A)
INJIL
Turia somuso dödö
khö Yesu Keriso nisura Yohane.-
Ba mböröta, fatua lö mu'a'asogö gulidanö, ba no so Daroma li andrö. Fao khö Lowalangi
Daroma li andrö, ba Taroma li andrö no fagölö Ia khö Lowalangi. I'otarai
mböröta no so Daroma li andrö si fao
khö Lowalangi. Iwöwöi hadia ia fefu Lowalangi faoma Taroma li andrö. Sambalö
lö hadöi ba gulidanö andre
ni'a'asogö baeroNia. Taroma li andrö zame'e fa'auri, ba fa'auri andrö zame'e haga ba niha. Lö mamalö muhaga Zihaga andrö bakha ba zogömigömi, ba tebai itayaigö Haga andrö sogömigömi. No
so ba gulidanö Daroma li andrö. Ba he ŵa'ae I'a'asogö gulidanö
andre Lowalangi si fao Taroma li, ba
lö sa'atö aboto ba
dödö niha gulidanö Ia. Möi Ia ba mbanuaNia, ba hiza, lö
latema Ia. Ba so ösa zanema Ya'ia
ba mamati ira khöNia. Ya'ira andrö zi tobali ono Lowalangi. Tobali ira ono Lowalangi, tenga börö wa'atumbura ma zui börö nga'ötö wa'aniha, ha börö me Lowalangi samösa zombali'ö ya'ira onoNia. No tobali
Niha Daroma Li andrö, ba no I'iagö ba gotaluada. No
ta'ila
lakhömiNia, lakhömi wa'a'ono Lowalangi si ha samösa. Samösa lö niha sangila Lowalangi. Ha
Ono Lowalangi si ha
samösa andrö, si fao khö Lowalangi, sahatö sibai khö Nama, Ya'ia zangoroma'ö Lowalangi khöda.- Yoh 1:1-5.9-14.18
Simanö duria somuso dödö khö Zo'aya ya'ita, Yesu Keriso.-
FA’ATUMBU ZO’AYA: SOLOHE FA’ATULÖ
Bakha ba wombaso siföföna,
tarongo gangi’ilata Yesaya sama’ele’ö andrö. Angi’ilatania andrö ya’ia ba wangi’ila
hawa’asökhi na so niha solohe turia fa’atulö. Na so niha solohe fa’atulö, ba
fefu niha samondrongo ba oi omuso dödö. Omusola dödö andrö ya’ia wa’omasi
Lowalangi si rugi niha gulidanö, turia wa’omuso dödö ba wangöhöli. Ba zibongi
me’owi, no ta’owasini wa’omasinia andrö sahöli dödö niha, ya’ia wa’atumbunia ba
gandra andrö.
Ba wombaso sidua andrö nihalö
moroi ba zura ba niha Heberai’o, te’ombakha’ö khöda hewisa wa’omasi Lowalangi
andrö i’oroi mböröta. No fahuhuo ia khödra tuada nifa’ema ndra sama’ele’ö. Iada’a,
fahuhuo Lowalangi ba khöda niha gulidanö börö wombasoda Sura Ni’amoni’ö. Fefu wa’omasi
Lowalangi andrö tarasoi göi ia ba lala wa’aurida sero ma’ökhö. Ni’owasainida ba
zima’ökhö andre ba no bua wa’omasi Lowalangi andrö si lö mo’aetufa sagötö tanö.
Turia somuso dödö andrö nisura
Yohane, sindruhu ibe’e khöda khalakhala hewisa wa’atobali niha Lowalangi andrö.
I’oroi mböröta danö andrö ba no so Lowalangi, ba ya’ia zanga’asogö hadia ia
fefu moroi ba daroma Li-Nia. Moroi ba da’ö fefu, börö wa’omasiNia niha gulidanö,
andrö wa ibali’ö ia niha ena’ö lö tekiko dozi samati khöNia. Ya’ia haga andrö
sitebai saae ihalö ia sogömigömi. Da’e wamatida ya’ita niha Keriso. Fe’aso
Lowalangi ba gotaluada, no sindruhu tobali tandra khöda wa ya’ita andre ono
haga si no tehöli.
Fe’aso Lowalangi ba gotalua
niha gulidanö, timba wa’atohare niha si’ao fa’atulö. Ba we’asoNia ba gulidanö,
no möi fangomuso dödö ba niha gulidanö. Töratöra we’asoNia ba gotalua niha, lö
mamalö I’ohe wa’omuso dödö si’ogötö’ö. Fe’asoNia ba gotalua niha ba gulidanö
salio ta’ila ya’ia Zura Ni’amoni’ö nibasoda bongi ba ma’ökhö. Ba wombasoda, fo’erönusida,
ba fangofa’aurida daroma li andrö, no göi möi börö wa’atobalida solohe turia
somuso dödö ba niha ba zifasuida. Tola nasa göi ta’angeraigö hewisa woloheda turia
somuso dödö andrö, ya’ia na lö mamalö ta’ohe wa’atulö andrö ba lala halöwöda
bongi ma’ökhö. Oroisa Natal andrö nifa’anö KWI sifao PGI sindruhu ibe’e khöda
wangaro dödö ba wangalui lala bö’ö ba wanuriaigö turia somuso dödö andrö. Fangalui
lala bö’ö, ya’ia na tawu’ai ita moroi ba watiusa numalö tobali fa’omasi. Me ba
woloheda fa’omasi, lö mamalö tasöndra göi wa’omasi andrö. Amen.
Nifa’anö Kat. Ingatan Sihura, S.Ag.
Umbu:
Biro Liturgi
Keuskupan Sibolga, Liturgi Taroma Li Döfi
A/B/C Buku Bacaan Untuk Upacara Hari Minggu dan Hari Raya dalam Bahasa Nias,
Gunungsitoli, Keuskupan Sibolga, 2012
Dianne Bergant,
CSA & Robert J. Karris, OFM (ed) Tafsir
Alkitab Perjanjian Lama Yogyakarta Kanisius, 2002
Dianne Bergant,
CSA & Robert J. Karris, OFM (ed) Tafsir
Alkitab Perjanjian Baru Yogyakarta Kanisius, 2002
Martin Harun,
OFM, Yohanes Injil Cinta Kasih Yogyakarta: Kanisius,
2019
St. Eko Riyadi,
Pr, Yohanes “Firman Menjadi Manusia” Yogyakarta: Kanisius,
2011
0 comments:
Posting Komentar