TAROMA LI LOWALANGI LUO MIGU SI – 24 DÖFI C

Liturgi Döfi A/B/C hlm. 625

FOMBASO  I

Taroma Li Lowalangi nihalö moroi ba zura Moze si dua.-

Me luo da'ö, Imane So'aya khö Moze : "Labu, ae mitou ! Soimö andrö, si no öfasao moroi ba danö Mesirayi, no so ba mbawa wa'atekiko. No alio sibai laröi lala andrö, nifakhoiGu khöra. No lafazökhi nono zaŵi nifahele ba no mangalulu ira khönia. No lafasömba'ö wasömbata khönia, lamane : Da'ö ndra lowalangimi, ya'ami Iraono Gizara'eli, sangeheta ya'ami ba danö Mesirayi." Ba Imane na So'aya khö Moze : "U'ila sa'ae, wa no niha sabe'e börö du'i niha andrö. Böi taha Ndra'o wanuwagö fönuGu khöra ba wangohorigö ya'ira. Aefa da'ö Ubali'ö furugö soi sebua ndra'ugö."

Ba itandraigö i'alösi dödö Zo'aya, Lowalanginia Moze, imane : "He So'aya, hana wa mofönu sibai Ndra'ugö ba soiMö andrö nihetaU ba danö Mesirayi ba wa'abölöMö ba faoma tangaU sabe'e ? Törö tödöU ndra enoniU, Aberahamo, Iza'aki ba Izara'eli. Törö tödöU, wa no möi ba hölu Ndra'ugö ba khöU samösa, awö wa no Öfabu'u li khöra wanguma'ö : U'oya'ö dania ma'uwumi, timba ndröfi ba mbanua si yaŵa. Ba tanö andre, niŵa'öGu, Ube'e ba ma'uwumi, tobali tana khöra irugi zi lö aetu."

Awena mangesa dödö Zo'aya ba wamunu ya'ira andrö, nidaödaö'öNia folau ba soiNia andrö.- 2 Moze 32:7-11.13-14

Simanö daroma li Lowalangi.-

 

Sinunö Fanema Li : Psallite No 80A                               (ma Laudate No 101)

FOMBASO  II

Taroma Li Lowalangi nihalö moroi ba zura Waulo si föföna khö Dimoteo.-

Talifusögu ni'omasi'ö !

U'andrö saohagölö khö Keriso Yesu, So'aya ya'ita, sangabölö'ö ya'o. I'ila tödöNia, lö faröi ndra'o; Ifataro ndra'o tobali enoniNia. Me luo no, utandraŵaisi Ia, ugohi Ia ba u'o'aya Ia. Ba hiza, no falukhado wa'ahakhö dödöNia, me lö na u'ila wetahögö wolau da'ö fefu ba me lö nasa faduhu dödögu khöNia. Ba no fahöna khögu wa'ebua dödö Zo'aya ya'ita, he göi famati awö wa'omasi ba khö Keriso Yesu.

Sindruhu daroma li andrö ba sinangea tafonaha ba dödöda : No möi ba gulidanö Keriso Yesu ba wangorifi niha si so horö. Ba gotalua niha si so horö andrö, ya'o zabölö ebua horö. Andrö abölö Ihakhösi tödö ndra'o Yesu Keriso, ena'ö ba khögu, niha sebua horö, I'oigö wangoroma'ö fa'ebolo dödöNia. Tobali dumaduma ndra'o ba niha fefu, wa tola lasöndra wa'auri si lö aetu, na faduhu dödöra khöNia. Börö da'ö, ya tefosumange ba tefolakhömi Lowalangi, Razo si lö tebulö, Lowalangi si lö mamalö, si lö oroma ba si ha samösa andrö, sagötö fa'ara. Amen.- 1 Tim 1:12-17

Simanö daroma li Lowalangi.-

 

Sinunö Föna Injil : Psallite No 254                                   (ma Laudate No 97)

 

INJIL

Turia Somuso Dödö khö Yesu Keriso nisura Luka.-

Me luo da'ö, ato niha sangozara beo awö niha bö'ö nifotöi sebua horö zangondrasi Yesu ba wamondrondrongo huhuoNia. Me la'ila da'ö ira farizai'o ba ira sangila amakhoita, anuzu dödöra, lamane : "Hiza, Itema niha si lö sökhi Niha andre ba manga Ia awöra." Börö da'ö Ilau khöra gamaedola Yesu, Imane : "Na so ba gotaluami zokhö otu nga'eu mbiribiri, ba taya sageu, hadia nilaunia ? Tatu iröi mbiribiri si siŵa wulu a siŵa, nga'eu andrö ba mbenua, ba möi ia wangalui si sageu andrö, irugi isöndra. Ba na no isöndra mangawuli mbiribiri andrö, i'onoro ba galisinia si fao fa'omuso dödönia, i'ohe ba nomo. Awena ikaoni ndra si fahuwu khönia, awö zi fahatö omo khönia, imane khöra : Mi'aine, ta'omusoi'ö dödöda. No usöndra mangawuli mbiribirigu si taya andrö. Uŵa'ö khömi : Simanö göi so wa'omuso dödö ba zorugo, ba niha samalalini era'era, he ha samösa, moroi ba wa'omuso dödö ba zi siŵa wulu a siŵa, si lö moguna famalalini era'era.

Ma zui na samösa ndra alawe sokhö fulu ngawua gefe firö, atoru sambua, hadia nilaunia ? Tatu itunu wandru ba ibözini nomonia, ihaogö wangalui kefe andrö irege isöndra. Na no isöndra gefe andrö, ikaoni nawönia awö zifaola omo khönia ba imane khöra : Omuso sibai dödögu, me no usöndra gefegu satoru andrö. Mi'aine ta'omusoi'ö dödöda. Simanö göi mala'ika ba zorugo, na mangesa dödö zi samösa niha moroi ba horönia."-

( ) Fahuhuo zui Yesu, Imane : "So samösa niha si so ono matua, darua. Imane siakhi khö namania : "He ama, be'e khögu dana khögu ba haratoda !" Ba ibagibagi harato andrö ba ndraononia si darua. Lö ara furi'ö, ifamawa fefu harato nitemania andrö siakhi, awena ilau mofanö ba danö saröu. Ba da'ö ihorigö gefenia andrö ba zi lö boto. Me no ahori fefu hadia ia khönia, itörö lofo sabölöbölö danö andrö, ba ibörögö alua wo'amböta ba zoguna. Möi ia mu'olembai samösa niha ba danö andrö, manga gazi. Ifatenge ia niha andrö wokubaloi bawi ba mbenua. Omasi ia ifo'ösi dalunia lölö mbanio, ö mbawi, ba samösa lö same'e khönia. Awena maniasa ia, imane : "Ha wa'ato zohalöŵö khö namagu, si lö ambö ö, ba ya'o, arakhagö tekiko ndra'o wa'olofo ba da'e. Mofanödo, möido khö namagu ba umane khönia : He ama, no ufazökhi horö föna Lowalangi ba tanö fönau. Lö sa'ae sinangea ndra'o, latötöi ndra'o onou. Akha hulö zohalöŵö khöu ndra'o, ama."- Mofanö ia, mangawuli khö namania. Me aröu ia nasa moroi ba nomo, no i'ila ia amania ba ahakhö dödönia, fagohi ia, italagui mbagi, fa'ago bawa ia khönia.  Ba imane khönia ono : "He ama, no ufazökhi horö föna Lowalangi ba tanö fönau. Lö sinangea sa'ae ndra'o latötöi ndra'o onou." Ikaoni ndra sohalöŵö khönia amania, imane : "Mi'alio'ö mihalö nukha sabölö sökhi andrö ba mibe'e khönia. Mibe'e laeduru ba durunia ba badagahe ba gahenia. Awena mihalö nono zaŵi satabö ba mitaba. Talau manga ba ta'omusoi'ö dödöda, börö me no mate nonogu andre ba no ifuli auri iada'e. No taya ia, ba hiza, no musöndra mangawuli." Ba ibörögö la'omusoi'ö dödöra.

Gasagasa da'ö, no so ba nowi nono sia'a. Me mangawuli ia, me no ahatö ia ba nomo, irongo wanunö ba folaya. Ikaoni samösa zohalöŵö khöra, isofu khönia: "Hadia da'ö ba nomo ?" Imane sohalöŵö andrö : "No mangawuli nakhiu, ba no ifataba'ö nono zaŵi satabö amau, börö me no ifuli isöndra nakhiu, me lö si göna ia hadia ia." Mofönu sibai nono sia'a andrö, irege lö edöna möi ia yomo. Börö da'ö möi baero namania, muhedehede ia khönia. Ba imane khö namania : "Hiza, no ha'uga fakhe mohalöŵö ndra'o khöu, ama, ba lö irai ufadaö niŵa'öu. Ba khögu lö irai öbe'e sara nono mbiribiri, ena'ö u'omusoi'ö dödögu, si fao ira si fahuwu khögu. Ba me no so nonou andrö, si no mangahori haratomö si fao ira alawe sohoröhorö, no öfataba'ö khönia nono zaŵi satabö." Itema linia amania, imane : "He onogu, si lö tebulö fao khögu ndra'ugö, ba fefu zi so khögu ba no khöu. Ba hiza, lö tola lö'ö talau manga ba ta'omusoi'ö dödöda, me akhiu si no mate andrö, no ifuli auri; no taya ia, ba no musöndra mangawuli."- Luk 15:1-3.11-32

Simanö duria somuso dödö khö Zo'aya ya'ita, Yesu Keriso.-

Belas kasih mengunjungi orang sakit [Dok. Pribadi]

Erönua:

FA’AHAKHÖ DÖDÖ NAMA SI LÖ OLA

Bakha ba wombaso siföföna nihalö moroi ba zura Moze sidua andrö, sindruhu te’oroma’ö khöda hewisa wönu Lowalangi andrö ba ndraono Gizara’eli. Sindruhu sa wa no afönu dödö Lowalangi wamalua fönuNia ba ndraono Gizara’eli, ba hiza lö a’ozu alua börö gangandröwa Moze enoniNia. Moze zondrara tödö Lowalangi me ifasugi zi no ifabu’u khö genoniNia Aberahamo, Iza’aki ba Yakobo ma Izara’eli. Ba da’e oroma hewisa wamalua fönu andrö, ba börö wamelegönia ya’ia zi samösa sifahuwu, fönu andrö tola lö alua.

Ba wombaso sidua andrö nihalö moroi ba zura Waulo andrö khö Dimoteo, sindruhu ifaduhu’ö khöda Faulo hadia dani wa möi ba gulidanö Yesu ba hewisa göi worasoinia bua wangöhöli Yesu andrö. Fe’amöi Yesu ba gulidanö, ya’ia ba wangöhöli soi niha moroi ba huku horö fa’amaate. Ba da’e oroma wa da’ö fefu no famelegöNia ia Yesu salahi niha gulidanö. Ba zimanö fefu niha te’efa’ö moroi ba huku horö fa’amate ba isöndra wa’auri si lö aetu. Fefu da’ö ifalua Yesu me itehegö aduwagö ndroNia ba döla röfa.

Bakha ba duria somuso dödö andrö, te’oroma’ö khöda tölu ngawua gamaedola Yesu. Siföföna amaedola zitaya biribiri, ba na no isöndra mbiribiri andrö sokhö, ba I’omusoi’ö dödönia awö zi fahuwu khönia. Amaedola simendrua yaia da’ö amaedola ndra’alawe sitaya kefe firö, ba wangalui firö andrö itunu wandru. Ba na no isöndra I’omusoi’ö dödönia awö zi fahuwu khönia. Amaedola sitölu andrö ba ya’ia gamaedola nono selungu. Ba gamaedola andre sindruhu oroma hewisa wa’ahakhö dödö zisamösa ama. Hewa’ae no ebua ifalua horö ononia, ba na no mangesa dödönia, ba lö mamalö I’oroma’ö wa’ahakhö dödönia ama andrö. Si tölu ngawua amaedola andre, sindruhu tebotokhi hewisa wa’ahakhö dödö nama andrö ba ndraononia. Ba wa’ahakhö dödö andrö, tola iröi danöbö’ö ba wangalui selungu andrö; ibe’e wamohaga ba wangalui, ba ba gafuriata ifalua wa’omuso dödö na no mangawuli.

Ba zi tölu ngawua wombaso andre, sindruhu te’oroma’ö hawa’ebua wa’omasi nama. Fa’omasi nama andrö ba no si lö ola. Lö mamalö wönu zi samösa ama. Ba hiza moroi ba wamobörö no so göi ba dödönia wa’omasi irege fönu nifaluania andrö ba lö a’ozu ba hiza I, ibali’ö fanema’ö si lö tebulö. Faulo zamaduhu’ö wa niha samalua horö andrö ba no hulö zi lö mangila wetahögö.

Niha ba wamati lö mamalö alau ba horö. Ba hiza moguna mamati ita wa lö mamalö wa’ahakhö dödö nama ba khöda. Moguna so wamalalini era’era, ba so göi ba dödö wa mohouni si’oroi ba dödö. Ba zimanö lö mamalö tasöndra wa’ahakhö dödö Lowalangi ba fangefa horö andrö. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011