LUO MIGU SI - 7
FOMBASO I
Taroma Li Lowalangi
nihalö moroi ba zura Zamueli, si föföna.-
Me luo da'ö, maoso Zaulo, i'ohe 3000 ndra matua sabölö, nitutuyu ba ndraono Gizara'eli, numalö ira ba danö si mate sotöi Sifi, ba wangalui Dawido ba da'ö. Ba zi bongi, mörö Zaulo bakha ba barö göli kureta ndra saradadu, ba no mutaru'ö ba danö dohonia, tanö ba högönia. Abineri, bohalima andrö, awö ndra saradadu khö Zaulo, no lafasui ia ba wemörö.
Möi ba golombaseŵa ndra Dawido Abiza'i, lakumokumoi wofanö, lasawö ndra saradadu, awö Gabineri, bohalima, ba larugi zi so Zaulo. Imane Abiza'i khö Dawido : "No Ibe'e ba dangau nudumö andrö Lowalangi ma'ökhö. Da'utandro ia ba danö faoma toho, ha samuza, alakha lö mendrua." Imane Dawido khö Gabiza'i : "Böi bunu ia ! Haniha sa zi no mombambaya nibayoini Zo'aya, lö fotu ?" Ba i'ohe sa'ae doho andrö, awö mako nidanö, si so tanö ba högö Zaulo, Dawido, ba lalau mofanö, lö sangila ya'ira, lö sanehe, lö si tokea; no ahori mörö ira, me no ihawui ira femörö sabölöbölö si oroi Zo'aya.
Ba möi miyefo Dawido, i'agö zaröu ma'ifu, ba zuzu hili, tobali aröu gotaluara. Mu'ao Dawido, imane : "He razo, ya'e dohomö ! Ya möi miyefo ba da'e zamösa ba wangai ya'ia. So'aya zanulöni ba zamösana fa'atulönia ba fa-lö-faröi. Noa sa Ibe'e ba dangagu ndra'ugö So'aya ma'ökhö andre. Ba lö edönado ube'e dangagu wamunu razo nibayoini Zo'aya andrö."- 1 Sam 26:2.7-9.12-13.22-23
Simanö daroma li Lowalangi.-
Sinunö Fanema Li : Psallite No 103, 1+2+4 (ma Laudate No 90, 1-2)
FOMBASO II
Taroma Li Lowalangi
nihalö moroi ba zura Waulo si föföna
ba niha samati ba mbanua Gorindro.-
Ya'ami ira talifusö ! No tesura ba mbuku ni'amoni'ö : Niha si föföna andrö, Adamo, si tobali si so noso. Ba hiza, Adamo safuria andrö (Keriso), no tobali Eheha same'e fa'auri. Si oföna so, tenga si so Eheha, si so noso zi oföna, awena si so Eheha. Tewöwöi moroi ba danö Gadamo si föföna andrö; ba Adamo sidua, no moroi ba zorugo. Niha gulidanö andre no hulö Gadamo si föföna, niwöwöi moroi ba danö. Niha si otarai zorugo, no hulö Gadamo si otarai zorugo. Iada'e foloheda famaedo niha si otarai ba danö andrö, dania foloheda famaedo Niha si otarai zorugo (ya'ia Yesu Keriso).- 1 Kor 15:45-49
Simanö daroma li Lowalangi.-
Sinunö Föna Injil: Psallite No 255 (ma Laudate No 90, 3)
INJIL
Turia Somuso Dödö khö Yesu Keriso nisura Luka.-
Me luo da'ö, ba imane Yesu khö ndra nifahaöNia : "Ba ya'ami samondrongo, ba da'ö liGu khömi : Mi'omasi'ö zi fa'udu khömi, mitolo zi fatiu tödö khömi, mifahowu'ö zangelifi ya'ami; mi'angandrö soguna ba zangosiwawöi ya'ami. Na so zamalisi bo'ömö, ba oro'ö khönia zi tambai göi, ba na so zangai lembeu, ba lulu khönia mbaru göi. Fefu haniha zangandrö khöu, ba be'e khönia, ba na so zangai si so khöu, ba böi andrö mangawuli. Ba hadia zomasi ami lalau khömi niha, da'ö milau khöra, simanö göi. Ba na mi'omasi'ö zangomasi'ö ya'ami, ba hadia wa'ebua dödö khömi ? He niha si lö atulö, la'omasi'ö göi zangomasi'ö ya'ira. Ba na mitolo sa zanolo ya'ami, ba hadia wa'ebua dödö khömi ? Simanö sa göi zi so horö andrö. Ba na mibe'e nifalali ba nidönadönami mitema mangawuli, ba hadia wa'ebua dödö khömi ? Labe'e göi nifalali si lö atulö ba zi lö atulö, ena'ö latema mangawuli zimanö zui. Ba mi'omasi'ö zi fa'udu khömi ba mitolo ba mibe'e nifalali ba zi lö midönadöna hadia ia mangawuli, ba ebua zulö khömi, ba ono Wondrege Zalaŵa ami, me ebua dödöNia ba zi lö mangandrö saohagölö göi ba ba zi lö sökhi. Ya sahakhö tödö ami, simane fa'ahakhö dödö Namami andrö. Ba böi mihuku niha, ba lö'ö manö tehuku ami göi. Mi'efa'ö zala, ba te'efa'ö zalami. Mibe'e, ba tebe'e khömi; su'asu'a nifozuzu, nisösö, nihöndrögö, si falawu, lafaduwa ba gahetami; su'asu'a ni'anu'a'ömi, la'anu'a'ö zui khömi dania."- Luk 6:27-38
Simanö duria somuso dödö khö Zo'aya ya'ita, Yesu Keriso.-
Erönua:
Ya’ami ira talifusö ni’omasi’ö!
Bakha ba wombaso siföföna nihalö moroi ba zura Zamu’eli siföföna tarongo hewisa wahö’ösa Zaulo andrö ba wamunu Dawido. Ba hiza börö wa’ebua dödö Lowalangi khö Dawido, lö ibe’e te’ala Dawido andrö. Ba hiza hewa’ae so ginötö khö Dawido wamunu Saulo, lö edöna Dawido wamunu ya’ia. Ebolo dödö Dawido me i’ila wa no razo nibayoini Zo’aya Zaulo andrö. Ba da’e ta’ila hewisa wa lö isulöni zi lö sökhi awönia si lö sökhi andrö Dawido.
Bakha ba wombaso simendrua nihalö moroi ba zura Waulo siföföna ba mbanua Gorindro tarongo hewisa Gadamo siföföna ba Adamo sibohou andrö. Adamo siföföna ba ya’ia niha gulidanö, ba Adamo Sibohou andrö ba ya’ia Yesu Keriso. Ba da’e edöna ifaehagö Faulo wa si lö tola lö’ö taröi mboto wa’adamo siföföna andrö ba da tobali ita Adamo Sibohou. Ba wa’atobali Adamo sibohou andrö ba ya’ia ena’ö si lö mamalö ta’o’ö zi no ifaha’ö ita Yesu Keriso ba wamalua si sökhi.
Bakha ba wombaso turia somuso dödö, tarongo hewisa wehede Yesu ba wangomasi’ö awöda niha. Fondrege wangomasi’ö andrö ya’ia ba wame’e gö zifa’udu ba ba wamalua khö zifa’udu khöda. Ba da’e göi ibe’e khöda sambua wangöhösi, ya’ia wehede wanguma’ö: “Ba hadia zomasi ami lalau khömi niha, da'ö milau khöra, simanö göi. Ya sahakhö tödö ami, simane fa'ahakhö dödö Namami andrö. Ba böi mihuku niha, ba lö'ö manö tehuku ami göi. Mi'efa'ö zala, ba te'efa'ö zalami. Mibe'e, ba tebe'e khömi; su'asu'a nifozuzu, nisösö, nihöndrögö, si falawu, lafaduwa ba gahetami; su'asu'a ni'anu'a'ömi, la'anu'a'ö zui khömi dania."
Bakha ba zi tölu ngawua wombaso andre edöna ifaehagö khöda sambua gereönua ena’ö lö mamalö tobali ita Adamo sibohou andrö samalua si sökhi ba zifatiu tödö khöda. Dawido zame’e khöda dumaduma ba wa lö manulöni ba zifatiu tödö khönia. Ba zimanö ibe’e wangöhösi khöda Yesu: “Hadia zomasi lalau khöda niha bö’ö, ba ena’ö oföna tafaluaba nawöda niha”. Ba wamalua simanö, ba da’ö no tobali ita Adamo sibohou andrö ba tatema zulö si’oroi Lowalangi. Amen.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Lukas Injil Kaum Marginal Yogyakarta:
Kanisius, 2019
St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011
0 comments:
Posting Komentar