TAROMA LI LOWALANGI LUO MIGU SI - 21

FOMBASO I

Taroma Li Lowalangi nihalö moroi ba zura Yesaya, sama'ele'ö.-

Simane niŵa'ö Yahwe, So'aya samatörö fefu hadia ia : Labu, ae yomo ba nomo razo khö mandru andrö, Sebena, ba ömane khönia : Ya'ugö, fangaila yomo ba nomo zokhö ya'ugö. Utimba ndraugö ba naha nifataro ya'ugö andrö. Lasöbi ndra'ugö, laheta'ö ba nahau. Na luo da'ö, Ukaoni genoniGu, Eliaki andrö, ono Hilikia. Ba Ube'e khönia mbaru sebua andrö khöu, awö mböbö talumö. Famatörömö mege, ba Ube'e ba dangania, ena'ö amaedola nama ia ba mbanua Yerusalema ba ba ma'uwu Yuda. Uhare'ö ba galisinia nono kusi mbawandruhö nomo Dawido andrö, ena'ö lö sokusi, na ibokai, - ba lö samokai, na ikusi. U'aro'ö wamatörönia, amaedola la'osö zaita ba naha saro, nahiania dania molakhömi bakha ba nomo namania.- Yes 22:19-23

Simanö daroma li Lowalangi.-                    Sato : Ma'andrö ... 

Sinunö Fanema Li : Psallite No 138                               (ma Laudate No 90)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.- 

Ya'ami ira talifusö!

Ha lö abakha wa no a'oi so khö Lowalangi. No fondrege wa'atuatua awö wangi'ilaNia. Si lö aboto ba dödö niha gangetulaNia ba si lö i'ila niha lala andrö khöNia. Haniha zangila era'era dödö Zo'aya ba haniha zi no mamolala tödöNia ? Ma haniha zi no mangöhönagö fame'e khöNia hadia ia, nisulöni dania ? Moroi khöNia sa fefu hadia ia, börö Ia wa so fefu hadia ia, ba ba khöNia lualua hadia ia fefu. KhöNia lakhömi götögötö wa'ara ! Amen.- Rom 11:33-36

Simanö daroma li Lowalangi.-                    Sato : Ma'andrö  …

 

Sinunö Föna Injil : Psallite No 261                     (ma Laudate No 82 ma 83)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Irugi Yesu danö ahatö mbanua Kaisaria Wilifi. Ba da'ö Isofu khö ndra nifahaöNia, Imane : "Molo'ö fanguma'ö niha, haniha Nono Niha andrö ?" Latema li ira nifahaö Yesu, lamane : "So zanguma'ö Yohane same fanasa; so zanguma'ö Eliya; ba so göi zanguma'ö Yeremia ma zui samösa ba gotalua ndra sama'ele'ö." Isofu khöra Yesu : "Molo'ö ya ami, haniha Ndra'odo andre ?" Itema li Simoni Fetero, imane: "Keriso Nibayoini andrö sa Ndra'ugö, Ono Lowalangi sauri." Itema linia Yesu, Imane khönia : "Tefahowu'ö ndra'ugö, Simoni ono Yona, me tenga niha zama'ele'ö khöu da'ö, no AmaGu andrö si so ba zorugo.- Ba Ya'odo göi Uwa'ö khöu : Fetero - Gowe saro ndra'ugö. Yaŵa ba dete gowe andrö Ufasindro GerejaGu andrö dania. Gowe andrö, ba tebai ni'alaini, he fa'amate, he narako. Ube'e dania khöu nono kusi gamatöröŵa Lowalangi andrö. Hadia nitenaŵau ba gulidanö, no nitenaŵa göi ba zorugo. Ba hadia ni'atulö'ö ba gulidanö, no ni'atulö'ö göi ba zorugo." Aefa da'ö Ifangelama ndra nifahaöNia, ena'ö böi la'ombakha'ö gofu ha'ökhö, wa Ya'ia Keriso.- Mat 16:13-19

Simanö duria somuso dödö khö Zo'aya ya'ita, Yesu Keriso.-

 

LUO MIGU SITO’ÖLÖ SI XXI

FA’AFADUHU DÖDÖ ZOLOHE WAGAMATÖRÖWA LOWALANGI

Ba wombaso siföföna idunödunö khöda Yesaya sama’ele’ö hewisa me möi ia ba nomo ba nomo Razo. Fe’amöinia ba nomo razo andrö ba wanegu Sebena andrö sangoguna’ö kefe ba zi lö atulö. Bazimanö laheta ia moroi ba gurusi wamatörö andrö, ba tebe’e khö Eliaki Ono Hisikia. Famindrakö kuaso andrö, tefotandra ia ba wohare’ö onokusi andrö ba galisi Eliaki. Onokusi nibe’e khönia andrö zangetu’ö fokusi ba famokai hadia ia fefu.

Ba wombaso siföföna andre edöna ifaehagö khöda wa razo andrö ba no same’e famatörö ba nono mbanua. Ba wamatörö andrö, tola atulö ba hiza tola göi lö atulö. Sebena no songoguna’ö kuasonia ba zi lö atulö, ba hiza Eliaki si no fogatinia andrö tehare’ö khönia kuaso sebua ba wangetu’ö hadia ia sifao fa’asinangea. Na satulö ba ifaduhu’ö atulö, ba na fasala ba ihuku. Ba gafuriata heza zomasi ita, hadia abölö sinangea ita moroi khö Zebena ?

 Ba wombaso sidua idunödunö göi khöda Faulo hewisa wa’afaduhu dödönia khö Lowalangi. Ba wa’afaduhu dödönia andrö I’ila hewisa wa’alawa wangerangera Lowalangi andrö irege lö dozi aboto ba dödönia fefu hadia ia nifaluaNia. Baero da’ö ifaduhu’ö göi wa moroi khö Lowalangi fefu hadia ia ba ya’ia göi dania lualua fefu hadia ia.

Famaduhu’ö Waulo andre edöna ifaehagö khöda hewisa ita göi ba lala wamati andrö. Na mamati ba na faduhu dödöda khö Lowlaangi andrö, sinangea ta’ofeta’ö ita ba bawamaduhu’ö ba ba woakui wa Lowalangi andrö no böröta ba amozua fefu hadia ia ba gulidanö andre. Moroi khöNia ita ba ba khönia göi tasawa dania na inötö khöda zamösana andrö. Ba zimanö na faduhu dödöda ba khöNia andrö, böi zi lö mamalö tasuno ba tafolakhömi Ia si no amada sendroro ya’ita. 

Ba wombaso injil tarongo hewisa me itandraigö isofu Yesu khöndra nifahaöNia haniha Ia. Söföna isofu haniha ia moroi ba wamaigi niha. Tarongo mege so zanguma’ö Yohane, so Zanguma’ö Elia, so göi zangumaö samösa moroi ba gotalua zama’ele’ö. Ba zimanö isofu göi Yesu khö ndra nifaha’öNia. Haniha göi Ia ba wamaigira. Fetero sifai fa’abarani ba fa’afönu wamati zanema li wanguma’ö: Keriso Nibayoini andrö sa Ndra'ugö, Ono Lowalangi sauri." Ba wehede Wetero andrö I’ila Yesu wa si’oroi ba dödönia irege ifahowu’ö Wetero. Baero da’ö, ibe’e göi kuaso khö Wetero ba wololohe ba ba wango’ozui halöwö wanuriaigö taromali andrö. Kuaso andrö tefontandra sifao onokusi gamatöröwa Lowalangi.

Ba wombaso injil andre edöna göi isofu khöda Yesu hadia sindruhu aboto ba dödöda haniha sindruhunia Ia andrö ba hörö dödöda zamösana? Hadia famatida andrö khönia ha börö wefao ba nawöda? Fetero zame’e khöda dumaduma hewisa wa’afaduhudödö si’oroi ba dödö. Ba da’ö dania tasöndra gamatöröwa Lowalangi andrö faudu molo’ö famatida zamösana.

Bawa’aurida si’ero ma’ökhö, asese göi tesofu khöda hadia sindruhu aboto ba dödöda haniha nifatida andrö? Hadia sindruhu göi ta’ila haniha Yesu andrö na isofu khöda zamösana? Asese sibai alua khöda ba wamati andre ba wa’atobalida katolik ha si no amaedola KTP. Hadia KTP da’ö? So tölu faosatö: KTP siföföna yaia Katolik Tanda Pembaptisan. Ha’awai oroma ba Gereja ma ta’akui Lowalangi andrö ha ba ginötö lasarani ita idanö ma ba ginötö lasarani nonoda. KTP sidua yaia da’ö: Katolik Tanda Perkawinan. Ha’awai oroma ba Gereja ma ta’akui Lowalangi andrö ha ba ginötö wangowaluda. KTP sitölu yaia da’ö: Katolik Tanda Pemakaman. Safuriata oroma wa katolik ita ya’ia ba ginötö lakoo ita ba lewatö.

Famati si’oroi ba dödö andrö siföföna sibai te’oroma’ö ia moroi ba wa’afaduhu dödö ba ba wamaduhu’öda Lowalangi andrö. Na sindruhu tafaduhu’ö ia, ta’oroma’ö ia wa matida ba fanunoda Lowalangi. Faulo zame’e dumaduma khöda wanuno Lowalangi ba wa’aboto ba dödönia wa fefu hadia ia andrö no moroi khö Lowalangi ba molualua ia göi dania ba khö Lowalangi. Famaduhu’ösabölö na sa I’oroma’ö khöda Fetero wa sindruhu Ono Lowalangi Yesu andrö. Ba wamatida andrö tebe’e khöda kuaso göi ba wanuriaigö turia somuso dödö ba lala wa’aurida si’ero ma’ökhö. Böi dania simane Sebena andrö; me tenga si’oroi ba dödönia wamatörö andrö ba teheta khönia.

Amaedola Zanguma’ö: 

Na moroi ba dödö tö wowengu, na moroi ba dödö tö we’e, Alua ya wa idanö hörö ana’ate. Ba Natenga tö soroi ba dödö tö wowengu, na tenga tö soroi ba dödö tö we’e, Ba alua yawa dawa hörö mane sibai gitö gae.