TAROMA LI LOWALANGI LUO MIGU SI - 19 DÖFI A

FOMBASO  I

 Taroma Li Lowalangi nihalö moroi ba zura Razo, si föföna.-

 Me luo da'ö, me irugi hili Lowalangi andrö, Horebi, Eliya, möi ia bakha ba dögi narö hili ba wemörö ba da'ö. Ba hiza, i'anema'ö irongo li Zo'aya, sanguma'ö : "Ae baero, agö hili, fönaGu !" Ba Itörö So'aya. FönaNia so nangi sabölöbölö sibai,  irege fabali hili ibe'e ba arasa gara. Ba hiza, lö So'aya bakha ba nangi andrö. Me aefa nangi andrö, so ndruru danö. Ba hiza, lö So'aya bakha ba ndruru danö andrö. Me aefa ndruru danö andrö, so galitö. Ba hiza, lö So'aya bakha ba galitö andrö. Me aefa galitö andrö itörö angi sihohohoho. Me irongo da'ö Eliya, i'anema'ö ibalugö mbawania fao barunia sebua, ba möi ia baero, muzizio ia ba zinga mbawa dögi andrö. Ba muhede khönia Zo'aya. 1 Raz 19:8-9.11-13

Simanö daroma li Lowalangi.-                    Sato : Ma'andrö...

 
 FOMBASO II

 Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö !

Uŵa’ö zindruhu ba khö Keriso, si no tobali sasi ba wehedegu.  Tödögu, nifatörö Geheha Ni'amoni'ö, sanga'aro'ö tödögu, wa sindruhu niŵa'ögu. Abu sibai dödögu ba tefakao gera'eragu, börö ndra talifusögu si sambua soi khögu. Omasido mena'ö, na mu'elifi ba na mufabali ndra'o moroi khö Keriso salahira, ena'ö te'orifi ira,  si sambua soi khögu molo'ö ösi niha. Iraono Gizara'eli ira, soi nifili Lowalangi ba nisou tobali onoNia. Khöra Ifa'ema Lowalangi lakhömiNia, awö gamabu'ula li andrö. Khöra Ibe'e ngawalö goroisa ba Ifahaö ira wanömba Lowalangi Ibe'e khöra ngawalö wawu'usa li ba wangorifi ya'ira. Nga'ötö ndra furugö soi ira, Aberahamo, Iza'aki ba Yakobo. Ba mendrua manö moroi khöra - molo'ö ösi niha i'otarai Keriso. Börö da'ö, ya nisuno Ia, Ya'ia Lowalangi, si so yaŵa ba danö bö'ö fefu, irugi zi lö aetu.- Amen.- Rom 9:1-5

Simanö daroma li Lowalangi.-                    Sato: Ma'andrö …

 

INJIL

Turia Somuso Dödö khö Yesu Keriso nisura Matai'o.-

Me luo da'ö, me no abuso niha sato, Ifarou ndra nifahaöNia Yesu, ena'ö möi ira ba nowo, woloyo miyefo, gasagasa Ifofanö niha sato. Me no Ifofanö niha sato, möi Ia yaŵa ba hili, ha Ya'ia, mangandrö. Me ibörögö bongi, so nasaYesu ba da'ö. Owo ndra nifahaö no so ba dalu mbaŵa Genezare, no tosasa ba ndrulu, noa sa zuzumö nangi. Me miwo manu, möi khöra Yesu, mowaöwaö ba dete nidanö. Me la'ila Ia ira nifahaö andrö mowaöwaö ba dete nidanö, tokea sibai ira. Mu'ao'ao ira, börö wa'ata'ura, lamane : "Bekhu !" I'anema'ö muhede khöra Yesu, Imane : "Mihonogö ami ! Ya'odo da'e, böi mi'ata'ufi !" Itema liNia Fetero, imane : "He So'aya, na sindruhu Ya'ugö da'ö, ŵa'ö khögu, ena'ö möido khöU ba dete nidanö." Imane Yesu: "Aine!" Möi tou Wetero moroi ba nowo, mowaöwaö ia ba dete nidanö, i'ondrasi Yesu. Me irasoi nangi sabölöbölö, ata'u sibai ia ba ibörögö ahöndrö. Mu'ao ia : "He So'aya, orifido!" I'anema'ö I'oro'ö dangaNia Yesu, Ira'u Wetero, Imane khönia : "He ya'ugö sambö famati, hana wa mangiwa dödöu ?" Ba me möi ira yaŵa ba nowo, tebato nangi. Ira nifahaö Yesu si so ba nowo, mangalulu ira khönia, lamane:  "Duhu, Ono Lowalangi Ndra'ugö!"- Mat 14:22-33

 Simanö duria somuso dödö khö Zo'aya ya'ita, Yesu Keriso.-

 

FA’ARO DÕDÕ BA WAMATI ZOLOHE BA WA’AURI SILÕAETU

Ba wombaso sisara idunõdunõ hewisa Gelia sama’ele’õ andrõ me omasi Zo’aya wangoroma’õ ya’ia khõnia. Bawangoroma’õ andrõ, I’andrõ So’aya ena’õ inehegõ Elia moroi ba hili. Sifõfõna tohare ya’ia da’õ: Angi sabõlõbõlõ sibai ba hiza lõ So’aya bakha ba nangi andrõ. Simendrua ba ndruru danõ. Ba da’õ gõi lõ So’aya. Simedõlõ ya’ia galitõ siholahola. Lõ zui So’aya ba da’õ. Bagafuriata ba itõrõ angi sihohohoho. Me’I’ila da’õ Elia, ba ibalugõ mbawania faoma barunia sebua.

Nata’angeraigõ tõdõda ba zalua khõ Gelia andre, hadia geluaha nangi sabõlõbõlõ, ndruru danõ ba alitõ siholahola. Sitõlu ngawalõ andre no amaedola salua sedõna manandraigõ famati niha, sameheu, ba same’e aukhu dõdõ niha. Hulõ simane Elia nirongoda mege lõ khõnia fangiwa dõdõ ba zalua andrõ.

Ba wombaso sidua I’oroma’õ khõda Faulo wangiwa dõdõnia ba ndraono Gizara’eli andrõ. Abu dõdõnia ba tefakao gera’erania, bõrõ me aboto ba dõdõnia wa Iraono Gizara’eli andrõ ba no soi nifili Lowalangi ba nisouNia tobali onoNia. Edõna mena dõdõ Waulo wamabali ya’ia moroi ba khõ Keriso salahi Ndraono Gizara’eli andrõ, hadia mbõrõ me Iraono Gizara’eli andrõ no latema lakhõmi Lowalangi, amabu’ula Li Lowalangi ba oroisa ba wanõmba Lowalangi.

Ba wombaso sidua andre edõna ifaehagõ gõi khõda wa sindruhunia, Iraono Gizara’eli andrõ no saro tõdõ meno latema lakhõmi Lowalangi, amabu’ula Li Lowalangi ba oroisa ba wanõmba Lowalangi. Salua khõ Ndraono Gizara’eli andrõ ba no fangiwa dõdõ si lõ mamalõ, irege edõna Waulo ba wamelegõ ya’ia salahira.

Ba wombaso injil tarongo hewisa me moloyo ndra nifaha’õ andrõ ba mbawa Genezare. Ba woloyora, Lõ fao khõra Yesu bõrõ memangandrõ Yesu ba hili. Nata’angraigõ tõdõda sindruhunia, ira nifaha’õ andrõ ato ira zohalõwõ ba nasi. Foloyo andrõ ba dalu nasi ba no lala halõwõra bongi ma’õkhõ. Me lala halõwõra bongi ma’õkhõ ba no aro dõdõra wa tola moloyo manõ ira. Ba hiza salua khõra tosasa ira ba ndrulu ba angi. Baero da’õ, fe’aso Yesu khõra ba nowo, lawalinga bekhu sowaõwaõ ba dete nasi. Hewa’ae no muhede khõra Yesu, Fetero nasa zanandraigõ ya’ia. "He So'aya, na sindruhu Ya'ugõ da'õ, ŵa'õ khõgu, ena'õ mõido khõU ba dete nidanö." Imane Yesu: "Aine!" Mõi tou Wetero moroi ba nowo, mowaõwaõ ia ba dete nidanõ, i'ondrasi Yesu. Ba hiza hadia zalua khõ Wetero; me irasoi nangi sabõlõbõlõ, ata'u sibai ia irege ibõrõgõ ahõndrõ ia. Awena mu'ao ia : "He So'aya, orifido!" ba we’aonia andrõ iuyu dangania Yesu ba imane khõnia: "He ya'ugõ sambõ famati, hana wa mangiwa dõdõu ?" fehede Yesu andrõ ifaduhu’õ nasa wa so wangiwa dõdõ ndra nifaha’õ khõNia. Ba gafuriata me mõi Yesu ba nowo, awena ahono ndrulu ba angi irege ohahau saae dõdõ ndra nifahaõ woloyo. Ba zimanõ ira nifahaõ awena lafaduhu’õ wa khõ Yesu wanguma’õ: "Duhu, Ono Lowalangi Ndra'ugõ !"

Ba wombaso injil sindruhu I’oroma’õ khõda wangiwa dõdõ ndra nifahaõ ba woloyo ba nasi. Baero da’õ, fangiwa dõdõ ndra nifaha’õ nasa ba we’aso Yesu sowaõwaõ ba dete nidanõ, lawalinga “bekhu”. Aefa da’õ, fangiwa dõdõ Wetero wangondrasi Yesu ba wowaõwaõ ba dete idanõ. Fangiwa dõdõ ndranifaha’õ andre alua bõrõ me lahalõ sabe’e dõdõra wa’abõlõra samõsa.

Nata’angeraigõ tõdõda ba zitõlu ngawua wombaso ba zima’õkhõ andre, hadia manõ geluaha wangiwa tõdõ andrõ ba wo’amakhaitania ba nowo andrõ, ndrulu, angi sabõlõ, ndruru danõ, ba alitõ? Nowo andrõ no amaedola gowuluada ya’ita niha samati. Owuloada andrõ ya’ia da’õ: Fongambatõsada (Keluarga), Stasi/Parokida, fa’atalifusõtada, fa’abanuasada, ba tanõbõ’õnia na. ba gofanõwa gangowuloada andre, asese sibai oya manõ wanandraigõ sanaisi simane fekõkõ, faguaguasa, famadõni, fanandrawaisi ba tanõbõ’õnia na. Fanandraigõ andre zi no amaedola ndrulu, angi sabõlõ, ndruru danõ ba alitõ.

Fangiwa dõdõda na so wanandraigõ sanaisi andrõ asese sibai aetu wanõtõnada. Fa’aro dõdõ ba wanaõgõ fanandraigõ gõi andrõ, tenga zi lõ aboto ba dõdõda. Ba ginõtõ si no tatalu’i, no lafaha’õ ita ba no la’ombakha’õ khõda lala wamati andrõ ba khõ Zo’aya ya’ita Yesu Keriso. Ba hiza bõrõ wa’aro dõdõda ba wa’atuatua nisõndrada ba ba wa’abe’e dõdõ wa’anihada, asese tabaerogõ amatida. Da’e wa’omasi ibelegõ ia Faulo mena’õ salahi niha samati andrõ ba mbanua Roma.

Fangiwa dõdõ ba wamati andrõ sasese alua khõda bongi ma’õkhõ, ya’ia zalua khõ ndranifaha’õ soloyo andrõ. No tahalõ saro dõdõda manõ zalua ba hiza asese aetu wanõtõnada bõrõ wolohi wõkhõ, fa’ambõ soguna ba tanõbõ’õnia na. bazalua andrõ fa’itaria tabe’e tahida Lowalangi wa lõ ibe’e howuhowuNia khõda. Olifu ita wa no ta’erogõ Ia.

Elia zame’e khõda dumaduma wa’arodõdõ andrõ, ya’ia nirongoda ba wombaso sifõfõna. Bawa’afalukhania khõ Zo’aya andrõ lõ mamalõ aro dõdõnia. He so nangi sabõlõbõlõ, ndruru danõ ba alitõ andrõ lõ khõnia fangiwa dõdõ ba I’ila wa lõ So’aya ba da’õ. Ena’õ gõi simanõ ita, bõi zi lõ mamalõ aro wamatidan ba ta’andrõ ena’õ bõi farõi khõda Zo’aya andrõ. Na aro dõdõda khõNia da’õ dania zolohe ya’ita ba wondrugi fa’auri si lõ aetu. Bagafuriata iwaõ amaedola nono niha:

 

sonekhe wanõrõ tundraha, sonekhe wanõrõ asi,

adõlõ’õ gamuri ba bõi tebulõ zinali, fabõi itandraõlõ angi.

Sonekhe wanõrõ tundraha, sonekhe wanõrõ owo.

Timba zao bulu loyo, olembai Yesu sanolo,

fabõi tekiko mboto awõ noso.

 

Yafaoma itolo ita Lowalangi, Amen.